ஈரான் மற்றும் இஸ்ரேல்-அமெரிக்கக் கூட்டணிக்கு இடையே நிலவி வரும் போர்ச் சூழலால், சர்வதேச அளவில் எரிசக்தித் தட்டுப்பாடு அபாயம் எழுந்துள்ளது. இதைக் கருத்தில் கொண்டு, இந்தியப் பொதுமக்களுக்குத் தடையற்ற எரிபொருள் கிடைப்பதை உறுதி செய்ய Kerosene Supply (மண்ணெண்ணெய் விநியோகம்) குறித்த அதிரடி அறிவிப்பை ஒன்றிய அரசு இன்று (மார்ச் 30, 2026) வெளியிட்டுள்ளது.
ரேஷன் கடைகளில் மீண்டும் மண்ணெண்ணெய்
மண்ணெண்ணெய் பயன்பாடே இல்லாத ‘மண்ணெண்ணெய் இல்லா மாநிலங்கள்’ என அறிவிக்கப்பட்ட 21 மாநிலங்கள் மற்றும் யூனியன் பிரதேசங்களில், அடுத்த 60 நாட்களுக்கு அவசரக்கால நடவடிக்கையாக மீண்டும் ரேஷன் கடைகள் மூலம் மண்ணெண்ணெய் விநியோகிக்க அனுமதி அளிக்கப்பட்டுள்ளது. வளைகுடா நாடுகளில் இருந்து பெட்ரோல், டீசல் மற்றும் எல்பிஜி வரத்து குறைந்துள்ளதால், சமையல் மற்றும் இதர தேவைகளுக்காக மக்கள் சிரமப்படுவதைத் தவிர்க்க இந்த முடிவு எடுக்கப்பட்டுள்ளது.
பெட்ரோல் பங்க்-களிலும் விற்பனை
ரேஷன் கடைகள் தவிர்த்து, பொதுமக்களின் வசதிக்காகப் புதிய விதிமுறைகள் அமல்படுத்தப்பட்டுள்ளன:
- நேரடி விற்பனை: ஒவ்வொரு மாவட்டத்திலும் மாநில அரசால் அடையாளம் காணப்படும் 2 பொதுத்துறை பெட்ரோல் பங்க்-களில் பொதுமக்கள் நேரடியாக மண்ணெண்ணெய் பெற்றுக்கொள்ளலாம்.
- சேமிப்பு அளவு: சாதாரண பெட்ரோல் பங்க்-களில் 2,500 லிட்டர் வரையிலும், தேர்ந்தெடுக்கப்பட்ட சிறப்பு பங்க்-களில் 5,000 லிட்டர் வரையிலும் மண்ணெண்ணெய் சேமித்து வைக்கத் தற்காலிக அனுமதி வழங்கப்பட்டுள்ளது.
ஹார்முஸ் நீரிணை முடக்கம் – காரணம் என்ன?
உலகளாவிய கச்சா எண்ணெய் போக்குவரத்தின் முக்கியப் பாதையான ஹார்முஸ் நீரிணையை (Strait of Hormuz) ஈரான் முடக்கியுள்ளதால், சர்வதேச சந்தையில் எரிபொருள் விலை கடும் ஏற்ற இறக்கத்தைச் சந்தித்துள்ளது. சில நாடுகளின் கப்பல்கள் மட்டுமே அந்தப் பாதையைக் கடக்க அனுமதிக்கப்படுவதால், இந்தியா போன்ற நாடுகள் மாற்று எரிசக்தித் திட்டங்களை நோக்கி நகர்ந்து வருகின்றன. அதன் ஒரு பகுதியாகவே இந்த Kerosene Supply திட்டம் மீண்டும் புத்துயிர் பெற்றுள்ளது.
