இலங்கை கடற்படையினரால் சிறைப்பிடிக்கப்பட்ட மீனவர்களை விடுதலை செய்ய வலியுறுத்தி, ராமேசுவரம் மீனவர்கள் வெள்ளிக்கிழமை ஐந்தாவது நாளாக வேலை நிறுத்தப் போராட்டத்தில் ஈடுபட்டனர்.
ராமேசுவரம் மீன்பிடித் துறைமுகத்தில் இருந்து கடந்த அக்டோபர் 3 அன்று கடலுக்குச் எடின் புரோகர் என்பவருக்குச் சொந்தமான விசைப்படகை இலங்கை கடற்படையினர் சிறைப் பிடித்து, அந்தப் படகில் இருந்த எபிஸ்டன், மத்தியா, ஜான்ஜெய்சன், ஸ்டீவன்சன், சுபார்டன், அபிஸ்டன், மோபிஸ், அந்தோணி பிரதீப், அந்தோணி புரூடஸ் ஆகிய 9 மீனவர்களும் கைது செய்யப்பட்டு யாழ்ப்பாணம் சிறையில் அடைக்கப்பட்டுள்ளனர்.
இலங்கை கடற்படையினரால் சிறைப் பிடிக்கப்பட்ட மீனவர்களையும், படகுகளையும் விடுவிக்க வேண்டும், இந்திய – இலங்கை இரு நாட்டு மீனவ பேச்சுவார்த்தையை நடத்த வேண்டும் உள்ளிட்ட கோரிக்கைகளை வலியுறுத்தி ராமேசுவரம் மீனவர்கள் கடந்த திங்கட்கிழமை வேலை நிறுத்தப் போராட்டத்தை தொடங்கினர்.
இந்நிலையில், வெள்ளிக்கிழமை ஐந்தாவது நாளாக ராமேசுவரத்தில் விசைப்படகு மீனவர்கள் தொடர் வேலை நிறுத்தப் போராட்டத்தில் ஈடுபட்டனர்.
இந்த வேலைநிறுத்தப் போராட்டத்தில் ராமேசுவரம் மீன்பிடி துறைமுகத்தில் 500-க்கும் மேற்பட்ட விசைப் படகுகள் ஆழமற்ற கடற்பகுதிகளில் நங்கூரமிடப்பட்டிருந்தது. மேலும், 2000-க்கும் மேற்பட்ட மீனவர்கள் கடலுக்கும் செல்லவில்லை. இதனால் சுமார் ரூ.10 கோடி மதிப்பிலான மீன் ஏற்றுமதி வா்த்தக இழப்பும் ஏற்பட்டுள்ளது.
