இந்தியாவின் முன்னணித் தொழில் மாநிலமான தமிழ்நாடு, பொருளாதார வளர்ச்சியில் ஒரு வரலாற்றுச் சிறப்புமிக்க மைல்கல்லை எட்டியுள்ளது. 2025-26 நிதியாண்டிற்கான தரவுகளின்படி, தமிழ்நாடு தொடர்ச்சியாக இரண்டாவது நிதியாண்டிலும் இரட்டை இலக்கப் பொருளாதார வளர்ச்சியை (Double-digit GDP growth) பதிவு செய்து சாதனை படைத்துள்ளது. இது மாநிலத்தின் தொழில் கொள்கை மற்றும் முதலீட்டுச் சூழலுக்குக் கிடைத்த மிகப்பெரிய வெற்றியாகப் பார்க்கப்படுகிறது.
ஒன்றிய புள்ளியியல் மற்றும் திட்ட அமலாக்க அமைச்சகம் வெளியிட்டுள்ள சமீபத்திய அறிக்கையின்படி, கடந்த 2024-25 நிதியாண்டில் தமிழ்நாடு 11.19 சதவீத வளர்ச்சியைப் பதிவு செய்திருந்தது. தற்போது முடிவடைந்துள்ள 2025-26 நிதியாண்டில், 10.83 சதவீத வளர்ச்சியைப் பதிவு செய்து, தனது நிலையான முன்னேற்றத்தை உறுதிப்படுத்தியுள்ளது. தேசிய அளவிலான சராசரி வளர்ச்சியை விட இது கணிசமாக அதிகம் என்பது குறிப்பிடத்தக்கது.
தமிழக அரசின் “ஒரு டிரில்லியன் டாலர் பொருளாதாரம்” (1 Trillion Dollar Economy) என்ற இலக்கை நோக்கிய பயணத்தில் இந்த வளர்ச்சி மிக முக்கியமானது. குறிப்பாக உற்பத்தித் துறை, தகவல் தொழில்நுட்பம், வாகன உதிரிபாகங்கள் உற்பத்தி மற்றும் புத்தொழில் (Startups) நிறுவனங்களின் அபார வளர்ச்சியே இந்த இரட்டை இலக்க வெற்றிக்குக் காரணமாகக் கூறப்படுகிறது. சமீபத்தில் நடைபெற்ற உலக முதலீட்டாளர்கள் மாநாடு மூலம் ஈர்க்கப்பட்ட முதலீடுகள் செயல்பாட்டுக்கு வரத் தொடங்கியுள்ளதும் இந்த வளர்ச்சிக்கு வலு சேர்த்துள்ளது.
மாநிலத்தின் நிதி மேலாண்மை மற்றும் உள்கட்டமைப்பு மேம்பாடு ஆகியவற்றில் தமிழக அரசு காட்டி வரும் தீவிரம், சர்வதேச முதலீட்டாளர்களைத் தமிழகத்தை நோக்கி ஈர்த்து வருகிறது. இந்தத் தொடர் வளர்ச்சியானது வேலைவாய்ப்புகளை உருவாக்குவதுடன், மக்களின் தனிநபர் வருமானத்தையும் உயர்த்தும் எனப் பொருளாதார வல்லுநர்கள் கணித்துள்ளனர். அண்டை மாநிலங்களுடன் ஒப்பிடுகையில், தமிழ்நாடு தனது உற்பத்தித் திறனைத் தொடர்ந்து சீராகத் தக்கவைத்து வருவது இந்தியப் பொருளாதாரத்திற்கே பெரும் பலமாக அமைந்துள்ளது.
