மத்திய பாஜக அரசு கொண்டு வரத் துடிக்கும் நாடாளுமன்றத் தொகுதி மறுவரையறை (Delimitation) மசோதா குறித்துக் காங்கிரஸ் மூத்த தலைவரும், முன்னாள் மத்திய நிதியமைச்சருமான P. Chidambaram தனது எக்ஸ் (X) தளத்தில் மிக முக்கியமான எச்சரிக்கையைப் பதிவு செய்துள்ளார். கடந்த ஒரு வாரமாகத் தான் கூறி வந்த அச்சம் தற்போது நிஜமாகி வருவதாகவும், இது இந்தியாவின் கூட்டாட்சி சமநிலையை அடியோடு தகர்க்கும் செயல் என்றும் அவர் குற்றம் சாட்டியுள்ளார்.
39 என்பது 46 ஆக மாறுவது வெறும் மாயை
மக்களவை உறுப்பினர்களின் எண்ணிக்கை 543-லிருந்து 815-ஆக உயர்த்தப்படும் போது, தமிழ்நாட்டின் எம்.பி-க்கள் எண்ணிக்கை 39-லிருந்து 58-ஆக உயரும் என்று கூறப்படுவது வெறும் “கண் துடைப்பு” என P. Chidambaram விளக்கியுள்ளார். தொகுதி மறுவரையறை முழுமையாக அமலுக்கு வரும்போது, விகிதாச்சார அடிப்படையில் 58 ஆக இருக்க வேண்டிய தமிழகத்தின் பிரதிநிதித்துவம் இறுதியில் 46-ஆகக் குறைக்கப்படும். அதே சமயம், உத்தரப் பிரதேசத்தின் பலம் 80-லிருந்து 140-ஆகப் பன்மடங்கு உயரும் என அவர் சுட்டிக்காட்டியுள்ளார்.
தென் மாநிலங்களின் அதிகாரம் பறிப்பு
மக்கள்தொகையைக் கட்டுப்படுத்துவதில் முன்னுதாரணமாகத் திகழும் 5 தென் மாநிலங்களின் தற்போதைய நாடாளுமன்றப் பிரதிநிதித்துவம் 24.3 சதவீதமாக உள்ளது. ஆனால், இந்த மறுவரையறைக்குப் பிறகு இது 20.7 சதவீதமாகக் குறைந்துவிடும். இதன் மூலம் மக்களவையில் தென் மாநிலங்களின் குரல் திட்டமிட்டு ஒடுக்கப்படும் என P. Chidambaram கவலை தெரிவித்துள்ளார். மக்கள்தொகையைச் சிறப்பாகக் கட்டுப்படுத்திய மாநிலங்களைத் தண்டிக்கும் வகையில் இந்த நடவடிக்கை அமைந்துள்ளதாக அவர் சாடினார்.
More Read
ஒற்றுமையாக எதிர்க்க அழைப்பு
“இது ஒரு விஷமத்தனமான மற்றும் கொடூரமான நடவடிக்கை. கூட்டாட்சி சமநிலையை மொத்தமாக மாற்றியமைக்க வேண்டும் என்ற நோக்கம் கொண்ட இந்த வஞ்சகமான, தீய முயற்சியை அனைத்து மாநிலங்களும் ஒற்றுமையாக எதிர்த்துத் தோற்கடிக்க வேண்டும்” என்று அவர் அழைப்பு விடுத்துள்ளார். மேலும், இவ்வளவு பெரிய அரசியல் சாசன மாற்றத்தைச் செய்ய மத்திய அரசு தேர்ந்தெடுத்திருக்கும் நேரம் (தேர்தல் காலம்) கடும் கண்டனத்திற்குரியது என்றும் P. Chidambaram தனது அறிக்கையில் குறிப்பிட்டுள்ளார்.
இந்தத் தொகுதி மறுவரையறை விவகாரம் தற்போது தமிழகம் உள்ளிட்ட தென் மாநிலங்களில் பெரும் அரசியல் புயலைக் கிளப்பியுள்ளது.
