நாடாளுமன்றச் சிறப்புக் கூட்டத்தொடரின் இரண்டாம் நாளான இன்று (ஏப்ரல் 17, 2026), தொகுதி மறுவரையறை (Delimitation) மற்றும் மகளிர் இட ஒதுக்கீடு சட்டத் திருத்த மசோதாக்கள் மீதான விவாதம் நடைபெற்றது. இதில் திமுக சார்பில் பங்கேற்றுப் பேசிய அக்கட்சியின் துணைப் பொதுச்செயலாளரும் எம்.பி-யுமான Kanimozhi Karunanidhi, மத்திய பாஜக அரசின் திட்டங்களைக் கடுமையாகச் சாடினார்.
மகளிர் இட ஒதுக்கீடு ஒரு ‘பொறி’
கருப்புச் சேலை அணிந்து தனது எதிர்ப்பைப் பதிவு செய்த Kanimozhi Karunanidhi, “மகளிர் இட ஒதுக்கீட்டுடன் தொகுதி மறுவரையறையை முடிச்சுப் போடுவது ஒரு மிகப்பெரிய சூழ்ச்சி. பெண்களின் உரிமைகளை பாஜக ஒரு மனிதக் கேடயமாகப் (Human Shield) பயன்படுத்துகிறது. தொகுதி மறுவரையறையை எதிர்த்தால், நாங்கள் பெண்களுக்கு எதிரானவர்கள் என்ற சித்திரத்தை உருவாக்கப் பார்க்கிறார்கள். ஆனால், உண்மை என்னவென்றால், பெண்களுக்கான இட ஒதுக்கீட்டை 2029-லேயே அமல்படுத்த முடியும்; அதற்குத் தொகுதி மறுவரையறை தேவையில்லை,” என்று முழக்கமிட்டார்.
அரசிதழ் அறிவிப்பு குறித்துக் கேள்வி
விவாதத்தின் போது மிக முக்கியமான ஒரு சட்டச் சிக்கலை கனிமொழி எழுப்பினார். “மகளிர் இட ஒதுக்கீடு தொடர்பான திருத்தங்களை விவாதிக்கும் முன்பே, அது குறித்து அரசிதழில் (Gazette) வெளியிட்டது ஏன்? நாடாளுமன்றத்தின் அதிகாரத்தை மத்திய அரசு அவமதிக்கிறதா? விவாதமே நடைபெறாத ஒரு விஷயத்தை எப்படி அதிகாரப்பூர்வமாக வெளியிட முடியும்?” என்று கேள்வி எழுப்பியது அவையில் பரபரப்பை ஏற்படுத்தியது.
More Read
தென் மாநிலங்களின் குரல்
தமிழகத்தின் 8 கோடி மக்களின் குரலாகப் பேசுவதாகக் குறிப்பிட்ட அவர், “மக்கள் தொகையைக் கட்டுப்படுத்தியதற்காகத் தமிழ்நாட்டின் குரலை நாடாளுமன்றத்தில் நசுக்கப் பார்க்கிறார்கள். தொகுதி மறுவரையறை அமலுக்கு வந்தால், தென் மாநிலங்களின் வாக்குரிமை மதிப்பற்றுப் போகும். இது இந்தியாவின் கூட்டாட்சித் தத்துவத்தின் மீது நடத்தப்படும் மிகப்பெரிய தாக்குதல்,” என்று எச்சரித்தார்.
பிரதமர் மோடியின் ‘காலா टीका’ (கருப்புப் பொட்டு) விமர்சனத்திற்கும் பதிலடி கொடுத்த அவர், “கருப்பு என்பது அன்னை காளியின் நிறம்; அநீதிக்கு எதிரான போராட்டத்தின் நிறம். மாநில உரிமைகளைக் காக்கத் திமுக இறுதிவரை போராடும்” என்று தனது உரையை நிறைவு செய்தார்.
