‘நீட் முறைகேடுகளுக்கு எதிராக பேரணியில் ஈடுபட்டிருந்த சிஜேபி அமைப்பைச் சேர்ந்தவர்கள் மீது காவல் துறையைக் கொண்டு ஒடுக்குமுறையை மேற்கொள்கிறது. ஜனநாயகத்தில் இது ஏற்றுக்கொள்ள முடியாத ஒன்றாகும்’ என தமிழக சட்டப்பேரவை எதிர்க்கட்சித் தலைவர் உதயநிதி ஸ்டாலின் கண்டனம் தெரிவித்துள்ளார்.
இதுகுறித்து அவர் வெளியிட்ட எக்ஸ் பதிவில், ‘நீட் தேர்வு முறைகேடுகளுக்கு எதிராக அமைதியான முறையில் பேரணியில் ஈடுபட்டிருந்த சிஜேபி அமைப்பைச் சேர்ந்த இளைஞர்கள் மீது காவல்துறை காட்டிய அடாவடித்தனத்தை நான் வன்மையாகக் கண்டிக்கிறேன்.
டெல்லியிலிருந்து வரும் காட்சிகள் அதிர்ச்சியளிக்கின்றன. அவர்களின் கவலைகளுக்குத் தீர்வு காண்பதற்குப் பதிலாக, அரசு தனது காவல்துறையைக் கொண்டு ஒடுக்குமுறையை மேற்கொள்கிறது. ஜனநாயகத்தில் இது ஏற்றுக்கொள்ள முடியாத ஒன்றாகும்.
கடந்த பத்தாண்டுகளுக்கும் மேலாக, நீட் தேர்வை ரத்து செய்ய வேண்டும் என்று திமுக வலியுறுத்தி வருகிறது. இன்று, நீட் தேர்வுக்கு எதிரான தமிழ்நாட்டின் குரல், நாட்டின் தலைநகரம் உட்பட நாடு முழுவதும் எதிரொலிக்கிறது. நாட்டின் இளைஞர்களின் கோரிக்கை தெளிவாக உள்ளது; அவர்களின் குரலுக்குச் செவிசாயுங்கள்’ என்று அவர் தெரிவித்துள்ளார்.
பின்னணி என்ன? – நீட் உள்ளிட்ட தேர்வுகளில் நடந்த முறைகேடுகள், வினாத்தாள் கசிவு ஆகியவற்றுக்கு எதிராக கரப்பான்பூச்சி ஜனதா கட்சி சார்பில் இன்று நாடாளுமன்றம் நோக்கி பேரணி நடத்தப்படும் என அறிவிக்கப்பட்டு இருந்தது.
More Read
இதனையடுத்து, நாடாளுமன்றத்தை நோக்கிச் சென்ற போராட்டக்காரர்கள், சன்சத் மார்க் காவல் நிலையத்துக்கு வெளியே பாதுகாப்புப் படையினரால் தடுத்து நிறுத்தப்பட்டனர். கூட்டத்தைக் கட்டுப்படுத்த பாதுகாப்புப் படையினர் தடியடி நடத்தினர். காயமடைந்த சில போராட்டக்காரர்களுக்கு அங்கேயே முதலுதவி அளிக்கப்பட்டது.
இதனையடுத்து, நாடாளுமன்றத்தை நோக்கிப் பேரணியைத் தொடங்கிய போராட்டக்காரர்கள் மீது, ‘பிரஸ் கிளப் ஆஃப் இந்தியா’ அருகே கண்ணீர்ப் புகைக் குண்டுகள் வீசப்பட்டன.
கரப்பான்பூச்சி ஜனதா கட்சியின் போராட்டம் தீவிரமடைவதன் காரணமாக, நாடாளுமன்றம் மற்றும் குடியரசுத் தலைவர் மாளிகையின் நுழைவுவாயில்கள் மூடப்பட்டுள்ளன. மேலும், ஜந்தர் மந்தர் மற்றும் நாடாளுமன்ற வளாகம் உள்ளிட்டப் பகுதிகளில் இணைய சேவை துண்டிக்கப்பட்டுள்ளது.
