தமிழ்நாடு பள்ளிக்கல்வித் துறையில் மாணவர்களின் எதிர்காலத்தைக் கருத்தில் கொண்டு, உலகளாவிய சவால்களைச் சந்திக்கும் வகையில் பல்வேறு தொலைநோக்கு சீர்திருத்தங்கள் மேற்கொள்ளப்பட்டு வருகின்றன. இதன் ஒரு கட்டமாக, பள்ளி மாணவர்களுக்கான புதிய பாடத்திட்டம் முழுமையாகவும் புதுமையாகவும் குழந்தைகளை மையப்படுத்திய கல்வியாக மாற்றப்பட உள்ளது. அத்துடன், மாணவர்களின் நீண்டகாலப் பிரச்சனையான புத்தகப் பையின் சுமை படிப்படியாகக் குறைக்கப்படும் எனப் பள்ளிக்கல்வித்துறை அமைச்சர் ராஜ்மோகன் அவர்கள் அதிகாரப்பூர்வமாக அறிவித்துள்ளார்.
தமிழக பள்ளிக்கல்வித் துறையில் புதிய பாடத்திட்ட மாற்றம் மற்றும் சீர்திருத்தப் பணிகள் தொடர்பான உயர்நிலைக் கலந்தாய்வுக் கூட்டம் சென்னை அண்ணா நூற்றாண்டு நூலகத்தில் நேற்று மிகச் சிறப்பாக நடைபெற்றது. இக்கூட்டத்திற்குப் பள்ளிக்கல்வித் துறை அமைச்சர் ராஜ்மோகன் தலைமை தாங்கி, புதிய கல்வி மாற்றங்கள் குறித்த முக்கிய வழிகாட்டுதல்களை வழங்கினார். இதில் இந்திய விண்வெளி ஆராய்ச்சி நிறுவனத்தின் (இஸ்ரோ) தலைவர் வி. நாராயணன், இஸ்ரோவின் முன்னாள் மூத்த விஞ்ஞானி மயில்சாமி அண்ணாதுரை, பள்ளிக்கல்வித்துறை முதன்மைச் செயலர் பி. சந்திரமோகன், பள்ளிக்கல்வி இயக்குநர் ச. கண்ணப்பன் மற்றும் துறை சார்ந்த உயர் அலுவலர்கள், பல்வேறு பாடத்திட்டக் குழுக்களின் முதன்மை உறுப்பினர்கள் கலந்து கொண்டு தங்களது கருத்துகளையும் ஆலோசனைகளையும் பதிவு செய்தனர்.
இக்கூட்டத்தில் விரிவாக விவாதிக்கப்பட்ட முக்கிய அம்சங்கள் குறித்தும், புதிய பாடத்திட்டத்தின் சிறப்பம்சங்கள் குறித்தும் அமைச்சர் ராஜ்மோகன் செய்தியாளர்களிடம் விரிவாகப் பேசினார். அப்போது அவர் கூறுகையில், “பள்ளி மாணவர்களின் புத்தகப் பையின் சுமை வெகுவாகக் குறைக்கப்படும். வெறும் உரைநடை எழுத்துகளாக மட்டுமே பாடப்புத்தகங்கள் அமைக்கப்படாமல், குழந்தைகள் பார்த்துப் புரிந்து கொள்ளும் வகையில் வண்ணப் படங்கள் நிறைந்ததாகப் பாடநூல்கள் மாற்றியமைக்கப்படும். மேலும், பாடப் புத்தகங்களில் நவீன க்யூஆர் (QR) குறியீடுகள் இடம்பெறும். அவற்றை ஸ்கேன் செய்வதன் மூலம் மாணவர்கள் எளிதாகக் காணொலிகள் (Video) மற்றும் ஒலி வடிவக் (Audio) கற்றல் மூலமாகப் பாடங்களை நேரடியாகக் கண்டு உணர்ந்து கற்க முடியும்” என்று தெரிவித்தார்.
கணிதப் பாடம் என்றாலே பல மாணவர்களுக்கு ஏற்படும் தேவையற்ற பயத்தைப் போக்கும் வகையில், கதைகளின் வழியே கணிதத்தை மிக எளிதாகக் கற்பிக்கும் புதிய மற்றும் சுவாரஸ்யமான கற்பித்தல் முறைகள் அறிமுகப்படுத்தப்படும் என்றும் அவர் கூறினார். இதுதவிர, வழக்கமான அறிவியல் பாடங்களோடு கலையையும் ஒருங்கிணைத்து ஸ்டீம் (STEAM – Science, Technology, Engineering, Arts, and Mathematics) என்னும் சர்வதேசத் தரம் வாய்ந்த ஒருங்கிணைந்த கல்விமுறை தமிழ்நாட்டுப் பள்ளிகளில் முழுமையாகச் செயல்படுத்தப்படும். மாணவர்களிடையே அன்றாட உலக நடப்புகளையும் வாசிப்புப் பழக்கத்தையும் ஊக்குவிக்கும் நோக்கில், பள்ளிகளில் தினமும் செய்தித்தாள்கள் வாசிப்பதற்கெனத் தனியாக நேரம் ஒதுக்கீடு செய்யப்படும் என்றும் குறிப்பிடப்பட்டது.
இன்றைய நவீனத் தொழில்நுட்பக் காலத்தில் மாணவர்களை வெறும் ஏட்டுச்சுரைக்காய் மனப்பாடக் கல்வியுடன் நிறுத்தாமல், அதிநவீன அறிவியல் கண்டுபிடிப்புகளில் ஈடுபடுத்த அரசு திட்டமிட்டுள்ளது. அதன்படி, பள்ளி மாணவர்களே நேரடியாகச் சிறிய அளவிலான செயற்கைக்கோள்களை (Satellites) உருவாக்கி, அதனை நிலவை வட்டமிடச் செய்யும் மாபெரும் வரலாற்றுச் சிறப்புமிக்கத் திட்டம் புதிய பாடத்திட்டத்தின் கீழ் செயல்படுத்தப்பட உள்ளது. இதற்காக இஸ்ரோ விஞ்ஞானிகளின் வழிகாட்டுதல்களும் ஆலோசனைகளும் நேரடியாகப் பெறப்பட உள்ளன.
More Read
அதேபோல, தற்போதைய டிஜிட்டல் உலகின் தவிர்க்க முடியாத அங்கமாக மாறியுள்ள செயற்கை நுண்ணறிவை (Artificial Intelligence) மாணவர்கள் திறம்படக் கையாளும் வகையில் ‘ப்ராம்ப்ட் இன்ஜினீயரிங்’ (Prompt Engineering) பயிற்சிகளும் பள்ளிப் பாடத்திட்டத்தில் நேரடியாகச் சேர்க்கப்படும் என்று அமைச்சர் ராஜ்மோகன் சுட்டிக்காட்டினார். இதன் மூலம் தமிழ்நாட்டுப் பள்ளி மாணவர்கள் உலகளாவிய தொழில்நுட்பப் போட்டியில் முன்னணி வகிப்பார்கள் என எதிர்பார்க்கப்படுகிறது.
இருப்பினும், பாடத்திட்டத்தில் செயற்கை நுண்ணறிவைச் சேர்ப்பதைப் போலவே ‘இயற்கை நுண்ணறிவுக்கும்’ (Natural Intelligence) சமமான முக்கியத்துவம் அளிக்கப்படும். சக மனிதர்கள் மீது பரிவும், கருணையும், அக்கறையும் கொண்ட அறிவாற்றல் கொண்டவர்களாக மாணவர்களை வளர்த்தெடுப்பதே நமது முக்கிய நோக்கம். பாடங்களை மனப்பாடம் செய்து மதிப்பெண்கள் மட்டும் பெறும் பழைய முறையை முழுமையாக ஒழித்து, ஆழமான புரிந்துணர்வுடன் கூடிய கற்றலுக்கும், மாணவர்களை அச்சுறுத்தாத பயமற்ற மதிப்பீட்டு முறைக்கும் வழிவகை செய்யப்படும். இதன் மூலம் மாணவர்களிடம் சிக்கல்களுக்குத் தீர்வு காணும் திறன் (Problem Solving), விரைவான முடிவெடுக்கும் ஆற்றல், தன்னம்பிக்கை மற்றும் மென்திறன்கள் (Soft Skills) ஆகியவை இயல்பாகவே வளரும் என்று விவரிக்கப்பட்டது.
வகுப்பறைகளிலும் பள்ளி வளாகங்களிலும் மாணவர்கள் மத்தியில் எவ்விதப் பாகுபாடும் நிலவக்கூடாது என்பதில் அரசு மிக உறுதியாக உள்ளது. பள்ளிகளில் எந்தக் குழந்தையையும் அவர்களின் நிறம், உடல் உருவம் அல்லது பின்னணியைக் கொண்டு கேலி செய்வதோ, பகடி (Bullying) செய்வதோ முற்றிலும் தடுக்கப்படும். இதற்கான விழிப்புணர்வுப் பாடங்கள் பாடத்திட்டத்தில் சேர்க்கப்படும்.
மேலும், பெண் உரிமைகள், பாலின சமத்துவம், பெற்றோரை மதிப்பதல் போன்ற உயரிய நற்பண்புகளுக்குப் பாடநூல்களில் அதிக முன்னுரிமை வழங்கப்படும். தமிழ்நாட்டின் தொன்மையான நாகரிகத்தை உணர்த்தும் கீழடி அகழ்வாராய்ச்சி உள்ளிட்ட உள்ளூர் வரலாற்று மரபுக் கல்விக்கும், நமது தேசத்தின் வரலாற்றுச் சாதனையாளர்களின் வீர வரலாற்றிற்கும் புதிய பாடத்திட்டத்தில் மிக முக்கிய இடம் அளிக்கப்படும் என்று அமைச்சர் ராஜ்மோகன் தெளிவுபடுத்தினார்.
