தமிழகச் சட்டமன்றத் தேர்தல் பணிகள் தீவிரமாக நடைபெற்று வரும் சூழலில், மத்திய பாஜக அரசு கொண்டு வரத் துடிக்கும் நாடாளுமன்றத் தொகுதி மறுவரையறை (Delimitation) விவகாரம் தமிழக அரசியலில் பெரும் அதிர்வலைகளை ஏற்படுத்தியுள்ளது. இது தொடர்பாக விவாதிக்க, திமுக தலைவரும் முதலமைச்சருமான MK Stalin இன்று (ஏப்ரல் 15, 2026) காலை 11 மணியளவில் திமுக நாடாளுமன்ற உறுப்பினர்களுடன் அவசர ஆலோசனைக் கூட்டத்தை நடத்தினார். காணொலிக் காட்சி வாயிலாக நடைபெற்ற இந்தக் கூட்டத்தில், மத்திய அரசின் இந்த நகர்வைத் தடுத்து நிறுத்துவதற்கான சட்டப் போராட்டங்கள் மற்றும் அரசியல் வியூகங்கள் குறித்து விவாதிக்கப்பட்டது.
ஜனநாயக விரோதச் செயல் – ஸ்டாலின் சாடல்
கூட்டத்தில் உரையாற்றிய முதலமைச்சர் MK Stalin, “தமிழகம் மற்றும் மேற்கு வங்கத்தில் தேர்தல் பிரச்சாரம் உச்சக்கட்டத்தில் உள்ள இந்த நேரத்தில், அவசரக அவசரமாக நாடாளுமன்றச் சிறப்புக் கூட்டத்தொடரைக் கூட்டி தொகுதி மறுவரையறை மசோதாவைக் கொண்டு வருவது பாஜக அரசின் அப்பட்டமான ஜனநாயக விரோதச் செயலாகும். தேர்தல் பணிகளில் நாங்கள் பிஸியாக இருப்போம், அந்த நேரத்தில் டெல்லியில் சைலண்டாகத் தொகுதி மறுவரையறைப் பணிகளை முடித்துவிடலாம் என்று மட்டும் யாரும் நினைக்க வேண்டாம். அப்படி நடந்தால், இதுவரை நீங்கள் பார்த்திராத ஒரு தமிழ்நாட்டைப் பார்க்க வேண்டியிருக்கும்,” என்று பிரதமர் மோடிக்குக் கடும் எச்சரிக்கை விடுத்தார்.
தமிழகத்தின் பிரதிநிதித்துவம் குறையும் அபாயம்
மக்களவைத் தொகுதிகளின் எண்ணிக்கையை 543-லிருந்து 850-ஆக உயர்த்தும் மத்திய அரசின் திட்டத்தை விசிக, காங்கிரஸ் உள்ளிட்ட கூட்டணிக் கட்சிகளும் எதிர்த்து வருகின்றன. இது குறித்துப் பேசிய MK Stalin, “மக்கள்தொகையைக் கட்டுப்படுத்துவதில் முன்னோடியாக இருக்கும் தமிழ்நாடு போன்ற தென் மாநிலங்களைத் தண்டிக்கும் வகையில் இந்த மறுவரையறை அமைந்துள்ளது. இது மாநில சுயாட்சிக்கும், கூட்டாட்சித் தத்துவத்திற்கும் எதிரானது. இந்த மசோதாவைத் தடுத்து நிறுத்த திமுக எம்.பி.க்கள் நாடாளுமன்றத்தில் மிக வலுவான குரலை எழுப்புவார்கள்,” என்று உறுதியளித்தார்.
More Read
1950-60-களின் போராட்டக் களம் திரும்பும்
தமது வீடியோ பதிவின் மூலம் மத்திய அரசுக்குத் தனது இறுதி எச்சரிக்கையை விடுத்த முதலமைச்சர், “தமிழ்நாட்டின் உரிமைகளுக்குப் பாதிப்பு ஏற்பட்டால், 1950 மற்றும் 1960-களில் இந்தித் திணிப்பிற்கு எதிராகத் திமுக எப்படிப்பட்ட போராட்டங்களை முன்னெடுத்ததோ, அதேபோன்ற ஒரு மாபெரும் மக்கள் எழுச்சியை இந்தியா மீண்டும் காணும். ஒவ்வொரு குடும்பமும் வீதிக்கு வந்து போராடும்,” என்று தெரிவித்தார். இதனைத் தொடர்ந்து இன்று நண்பகல் 12 மணிக்கு திமுக மாவட்டச் செயலாளர்களுடனும் அவர் ஆலோசனை நடத்த உள்ளார்.
பாஜகவின் இந்த “புல்டோசர்” அரசியலுக்கு எதிராகத் தேசிய அளவில் எதிர்க்கட்சிகளை ஒருங்கிணைக்கும் பணியிலும் MK Stalin தீவிரமாக ஈடுபட்டு வருகிறார்.
