‘ராமாயணா’ படத்தின் இறுதிக்காட்சி மற்றும் அதற்கு முந்தைய காட்சியின் ஒவ்வொரு நொடியையும் தான் ரசித்ததாக இயக்குநர் ராஜமவுலி தெரிவித்துள்ளார்.
நிதேஷ் திவாரி இயக்கத்தில் இரண்டு பாகங்களாக உருவாகி வரும் இந்திய இதிகாசமான ராமாயணத்தின் முதல் பாகம் இன்று (நவ.5) வெளியாகி உள்ளது. இதில் ரன்பீர் கபூர் ராமராகவும், சாய் பல்லவி சீதையாகவும், யஷ் ராவணனாகவும், சன்னி தியோல் அனுமனாகவும் நடித்துள்ளனர். இந்தப் படத்தின் பிரம்மாண்டம் பாராட்டு பெற்று வரும் நிலையில், இயக்குநர் ராஜமவுலி படத்தின் காட்சிகள் பிரம்மிப்பூட்டுவதாக சிலாகித்துள்ளார்.
படம் பார்த்த அனுபவம் குறித்து தனது எக்ஸ் தள பக்கத்தில் அவர் பதிவிட்டுள்ளார். அதில் அவர், ‘ராமாயணா படத்தின் பிரம்மாண்டமும், அதன் காட்சி அமைப்புகளும் பெரிய திரையில் பார்ப்பதற்கு அற்புதமாக இருந்தன.
ராமனாக ரன்பீர், குறிப்பாக வனவாசத்தில் இருந்து அமைதியாகவும், கம்பீரமாகவும் இருக்கிறார். ராவணனாக யஷ் மிரட்டலான தோற்றம் தருகிறார். சீதையாக சாய் பல்லவி அழகாக இருக்கிறார்.
படத்தின் இறுதிக்காட்சி மற்றும் அதற்கு முந்தைய காட்சியில் ஒவ்வொரு நொடியையும் ரசித்தேன். இத்தகைய பிரம்மாண்ட படைப்பை திரையில் கொண்டு வந்ததற்கு நமித் மல்ஹோத்ரா, நிதேஷ் திவாரி மற்றும் ஒட்டுமொத்த படக்குழுவுக்கு என் வாழ்த்துகள்’ என்று பாராட்டு தெரிவித்துள்ளார்.
நிதேஷ் திவாரி இயக்கத்தில் உருவாகி இருக்கும் இப்படத்தை நமித் மல்ஹோத்ராவின் பிரைம் ஃபோக்கஸ் ஸ்டூடியோஸ் நிறுவனத்துடன் இணைந்து, நடிகர் யஷ்ஷின் மான்ஸ்டர் மைண்ட் கிரியேஷன்ஸ் தயாரித்துள்ளது. முதல் பாகம் இப்போது வெளியாகி உள்ள நிலையில், இரண்டாம் பாகம் 2027 தீபாவளிக்கும் வெளியாக இருக்கிறது.
