ஆக்சியம்-4 திட்டத்தின் கீழ் சர்வதேச விண்வெளி நிலையத்திற்குச் சென்றுள்ள இந்திய விண்வெளி வீரர் சுபன்ஷு சுக்லா, அங்கு பல்வேறு முக்கிய ஆய்வுகளை மேற்கொண்டு வருகிறார். போலந்தைச் சேர்ந்த ஸ்லாவோஸ் உஸ்னான்ஸ்கி, ஹங்கேரியைச் சேர்ந்த திபோர் கபு மற்றும் அமெரிக்காவைச் சேர்ந்த பெக்கி விட்சன் ஆகியோருடன் இணைந்து கடந்த ஜூன் 25 ஆம் தேதி விண்வெளிப் பயணத்தைத் தொடங்கிய சுபன்ஷு சுக்லா, விண்வெளிக்குச் சென்ற இந்தியாவின் இரண்டாவது வீரர் என்ற பெருமையைப் பெற்றார். 15 நாட்கள் நீடிக்கும் இந்தப் பயணத்தில், ஆக்ஸியம்-4 குழுவினர் 60 அறிவியல் பரிசோதனைகளை மேற்கொள்ள திட்டமிட்டுள்ளனர்.
பிரதமர் மோடியுடன் சுபன்ஷு சுக்லாவின் உரையாடல்
சர்வதேச விண்வெளி மையத்திற்குச் சென்று இந்தியாவைப் பெருமைப்படுத்திய சுபன்ஷு சுக்லாவுடன் பிரதமர் மோடி அண்மையில் உரையாடினார். இந்த உரையாடல் குறித்துப் பேசிய பிரதமர் மோடி, குரூப் கேப்டன் சுபன்ஷு சுக்லாவுடன் அற்புதமான உரையாடல் நிகழ்த்தியதாகவும், சர்வதேச விண்வெளி ஆய்வு மைய அனுபவங்களை சுபன்ஷு சுக்லா பகிர்ந்து கொண்டதாகவும் தெரிவித்தார்.
மாணவர்களுக்கு அறிவியல் விளக்கம் மற்றும் முக்கிய ஆய்வுகள்
விண்வெளி நிலையத்திற்குச் சென்றுள்ள இந்திய வீரர் சுபன்ஷு சுக்லா, அங்குப் பல்வேறு ஆய்வுகளை மேற்கொண்டு வருகிறார். சமீபத்தில், மனித செரிமான அமைப்பு விண்வெளியின் தனித்துவமான சூழலுக்கு எவ்வாறு பொருந்துகிறது என்பதை விளக்கும் வகையில், இளம் இந்திய மாணவர்களை இலக்காகக் கொண்ட ஒரு கல்வி வீடியோவைப் படமாக்கினார். இந்தக் கல்வி முயற்சியுடன், சுக்லா சர்வதேச விண்வெளி நிலையத்தில் உள்ள கிபோ ஆய்வகத்தின் லைஃப் சயின்சஸ் கையுறைப் பெட்டிக்குள் முக்கியமான தசை ஆரோக்கிய ஆராய்ச்சியை மேற்கொண்டு வருகிறார். நுண் ஈர்ப்பு விசை எவ்வாறு தசைச் சிதைவை ஏற்படுத்துகிறது மற்றும் இந்த இழப்பை எவ்வாறு தடுக்கலாம் அல்லது குறைக்கலாம் என்பதைப் புரிந்துகொள்ள தசை ஸ்டெம் செல் வளர்ப்புகளில் அவரது பணி கவனம் செலுத்துகிறது.
More Read
குறிப்பாக, மிகக் குறைவான புவிஈர்ப்பு விசை உள்ள சூழலில் தசை செயல்பாடுகள் குறித்து அவர் ஆய்வு செய்தார். இந்த ஆய்வில் கிடைக்கும் தரவுகள் மூலம் எதிர்காலத்தில் விண்வெளியில் நீண்ட காலம் தங்கியிருப்பவர்களுக்கு ஏற்படும் தசை பாதிப்புகளைத் தடுக்கும் சிகிச்சையை உருவாக்க முடியும். தனது அறிவியல் பணிகள் மற்றும் தொடர்புகள் மூலம், சுபன்ஷு சுக்லா மனித விண்வெளிப் பயண அறிவை மேம்படுத்துவதுடன் மட்டுமல்லாமல், அடுத்த தலைமுறை இந்திய மாணவர்களை விண்வெளி அறிவியல் மற்றும் உயிரியலில் ஈடுபட ஊக்குவிக்கிறார். சுக்லாவுடன் சென்றுள்ள மற்ற வீரர்கள் விண்வெளியில் மனநலன் மாறுபாடு குறித்த சோதனைகளை மேற்கொண்டனர்.
