இந்திய கடற்படைக்காக ரூ.90,000 கோடியில் புதிதாக 6 நீர்மூழ்கிகளை தயாரிக்க இந்தியா, ஜெர்மனி இடையே விரைவில் ஒப்பந்தம் கையெழுத்தாக உள்ளது.
இந்திய கடற்படையில் சுமார் 150 போர்க்கப்பல்கள் உள்ளன. இதில் ஐஎன்எஸ் விக்ரமாதித்யா, ஐஎன்எஸ் விக்ராந்த் ஆகியவை விமானந்தாங்கி போர்க்கப்பல்கள் ஆகும். ஐஎன்எஸ் விஷால் என்ற பெயரில் 3-வது விமானந்தாங்கி போர்க்கப்பல் தயாரிக்கப்பட்டு வருகிறது.
வரும் 2030ம் ஆண்டுக்குள் இந்த கப்பல் இந்திய கடற்படையில் இணைக்கப்படும் என்று எதிர்பார்க்கப்படுகிறது. அடுத்தடுத்த ஆண்டுக்குள் பல்வேறு போர்க் கப்பல்கள் கடற்படையில் இணைக்கப்பட உள்ளன. இதன்படி வரும் 2035-ம் ஆண்டுக்குள் இந்திய போர்க்கப்பல்களின் எண்ணிக்கையை 200-க்கும் அதிகமாக உயர்த்த திட்டமிடப்பட்டு உள்ளது.
தற்போது இந்திய கடற்படையில் 20 நீர்மூழ்கிகள் உள்ளன. இதில் 17 நீர்மூழ்கிகள் டீசல்- எலெக்ட்ரிக் வகையை சேர்ந்தவை ஆகும். மேலும் அணு சக்தியில் இயங்கும் 3 நீர்மூழ்கிகளும் உள்ளன. டீசல்- எலெக்ட்ரிக் வகையை சேர்ந்த இந்திய நீர்மூழ்கிகள் 2 முதல் 5 நாட்கள் வரை கடலுக்கு அடியில் பயணம் செய்யும். அணு சக்தியில் இயங்கும் 3 இந்திய நீர்மூழ்கிகள் தொடர்ந்து 3 மாதங்கள் வரை கடலுக்கு அடியில் மூழ்கியிருக்கும் திறனை பெற்று உள்ளன. இந்திய கடற்படையில் தற்போது ஏஐபி தொழில்நுட்ப அடிப்படையிலான நீர்மூழ்கிகள் இல்லை.
இந்த குறையைப் போக்க இந்திய கடற்படையின் 6 கல்வாரி நீர்மூழ்கிகள் ஏஐபி தொழில் நுட்பத்துடன் மேம்படுத்தப்பட்டு வருகின்றன. அடுத்த கட்டமாக ஜெர்மனியுடன் இணைந்து புதிதாக ரூ.90,000 கோடியில் 6 ஏஐபி நீர்மூழ்கிகளை தயாரிக்க திட்டமிடப்பட்டு உள்ளது. இதுதொடர்பாக இந்தியா, ஜெர்மனி இடையே பல ஆண்டுகளாக பேச்சுவார்த்தை நடத்தப்பட்டு வருகிறது. தற்போது பேச்சுவார்த்தை இறுதிக் கட்டத்தை எட்டி வரும் செப்டம்பரில் இரு நாடுகள் இடையே ஒப்பந்தம் கையெழுத்தாகும் என்று தகவல்கள் வெளியாகி உள்ளன.
ஜெர்மனியின் தைசென்க் ரூப் மரைன் சிஸ்டம்ஸ் நிறுவனமும் இந்தியாவின் மசாகான் டாக் ஷிப் பில்டர்ஸ் நிறுவனமும் இணைந்து ஏஐபி நீர்மூழ்கிகளை தயாரிக்க உள்ளன. பிரம்மோஸ் மற்றும் இந்தியாவின் அதிநவீன ஏவுகணைகளை பொருத்தும் வகையில் புதிய நீர் மூழ்கிகள் வடிவமைக்கப்படும். வரும் 2032-ல் முதல் நீர்மூழ்கி இந்திய கடற்படையில் இணைக்கப்படும்.
