கட்டா குஸ்தி 2 – விமர்சனம்

2022-ல் வெளியான கட்டா குஸ்தி படத்தின் தொடர்ச்சியாக உருவாகியுள்ள கட்டா குஸ்தி 2, குடும்பத்துடன் ரசித்துப் பார்க்கக்கூடிய கலகலப்பான கமர்ஷியல் படமாக அமைந்துள்ளது. முதல் பாகத்தில் குஸ்தி வீராங்கனையான மனைவியைப் பற்றி உண்மை தெரிந்த பிறகு கணவன் எப்படி மாறுகிறான் என்பதைக் கூறியிருந்த நிலையில், இந்தப் பாகம் அவர்களின் திருமண வாழ்க்கையை மையமாகக் கொண்டு நகர்கிறது.

திருமணத்திற்குப் பிறகு விஷ்ணு விஷால் வீட்டைப் பார்த்துக்கொள்ளும் ஹவுஸ் ஹஸ்பெண்டாக இருக்கிறார். ஐஸ்வர்யா லட்சுமி ரயில்வே வேலையுடன் குஸ்தி வீராங்கனையாக தொடர்ந்து சாதித்து வருகிறார். இருவருக்கும் ஒரு அழகான மகள் இருக்கிறாள். மகளின் வளர்ப்பு, குடும்ப வாழ்க்கை, கணவன்-மனைவிக்கிடையேயான புரிதல் போன்ற விஷயங்கள் முதல் பாதியில் நகைச்சுவையுடன் சொல்லப்பட்டுள்ளன. குறிப்பாக அப்பா-மகள் பாசம் மனதை நெகிழ வைக்கிறது.

தென்னிந்திய அளவிலான முக்கிய குஸ்தி போட்டிக்குத் தயாராகும் ஐஸ்வர்யாவுக்கு, அவரது பயிற்சியாளர் சதி செய்கிறார். டென்ஷன் குறைய நாட்டு மருந்து என்று கூறி, உண்மையில் தடை செய்யப்பட்ட ஊக்க மருந்தை விஷ்ணு விஷாலிடம் கொடுத்து, அதை மனைவிக்குத் தெரியாமல் சாப்பாட்டில் கலக்கச் செய்கிறார். எதுவும் அறியாமல் அதைச் செய்யும் கணவன், பின்னர் அதன் விளைவால் மனைவி போட்டியில் தோல்வியடைந்து ஓராண்டு தடை பெறுவதற்கு காரணமாகிறார்.

இந்த உண்மை தெரியவந்ததும், தனது முன்னேற்றத்தை கணவரே தடுக்க நினைத்ததாக ஐஸ்வர்யா நம்பி அவரைப் பிரிந்து செல்கிறார். விவாகரத்து வரை செல்லும் இந்த பிரச்சினை, அவர்களின் மகளையும் பாதிக்கிறது. இறுதியில் உண்மை வெளிவருகிறதா, இந்தக் குடும்பம் மீண்டும் இணைகிறதா என்பதே படத்தின் மீதிக்கதை.
இயக்குநர் செல்லா அய்யாவு, நகைச்சுவை, குடும்ப சென்டிமென்ட், பெண்ணுரிமை, காதல், குஸ்தி போட்டிகள் ஆகிய அனைத்தையும் சரியான விகிதத்தில் கலந்து திரைக்கதையை விறுவிறுப்பாக நகர்த்தியுள்ளார். சில காட்சிகள் ஆரம்பத்தில் சாதாரணமாகத் தோன்றினாலும், பின்னர் கதையின் முக்கியமான திருப்பங்களுக்கு காரணமாக மாறுவது திரைக்கதையின் பலமாக இருக்கிறது. இடைவேளைக்குப் பிறகு படம் சீரியஸாகச் சென்றாலும், தேவையான இடங்களில் வரும் நகைச்சுவை சுவாரஸ்யத்தை குறைக்கவில்லை.

விஷ்ணு விஷால் வழக்கம்போல் இயல்பான நடிப்பால் கவர்கிறார். குடும்பத்திற்காக எல்லாவற்றையும் விட்டுக்கொடுக்கும் கணவராகவும், மகளின் மீது அளவில்லா பாசம் கொண்ட தந்தையாகவும் சிறப்பாக நடித்துள்ளார். ஐஸ்வர்யா லட்சுமி, தன்னம்பிக்கை நிறைந்த குஸ்தி வீராங்கனையாகவும், கண்டிப்பான அம்மாவாகவும், அன்பான மனைவியாகவும் பல உணர்வுகளை சிறப்பாக வெளிப்படுத்தியுள்ளார். பேபி சாராவின் நடிப்பு படத்தின் மிகப்பெரிய பலங்களில் ஒன்று. அவர் வரும் காட்சிகள் அனைத்தும் ரசிகர்களின் மனதை கவர்கின்றன. கருணாஸ், முனீஸ்காந்த், காளி வெங்கட் உள்ளிட்டோர் தங்களுக்கான பங்களிப்பை சிறப்பாக செய்துள்ளனர். ரம்யா கிருஷ்ணன், யோகி பாபு ஆகியோரின் சிறப்புத் தோற்றமும் கவனம் பெறுகிறது.

ஷான் ரோல்டனின் பின்னணி இசை மற்றும் பாடல்கள் கதைக்கு பலம் சேர்க்கின்றன. ஒளிப்பதிவு, படத்தொகுப்பு, சண்டைக் காட்சிகள் அனைத்தும் தரமாக அமைந்துள்ளன.
மொத்தத்தில், கட்டா குஸ்தி 2 நகைச்சுவை, குடும்ப பாசம், உணர்ச்சி, பெண்ணின் சாதனை, கணவன்-மனைவி புரிதல் ஆகியவற்றை அழகாக இணைத்து, ஆரம்பம் முதல் இறுதி வரை சலிப்பில்லாமல் ரசிக்க வைக்கும் முழுமையான குடும்ப பொழுதுபோக்கு படமாக திகழ்கிறது.