2026-27-ம் நிதியாண்டின் முதல் காலாண்டில் இந்தியாவின் உண்மையான மொத்த உள்நாட்டு உற்பத்தி 7.8% வளர்ச்சி கண்டுள்ளதாக தலைமைப் பொருளாதார ஆலோசகர் அனந்த நாகேஸ்வரன் தெரிவித்துள்ளார்.
இந்தியாவின் தொழில் மாற்றமும், தொழில் உத்தியை மறுவரையறை செய்தலும் என்ற தலைப்பில் டெல்லியில் நடைபெற்ற மாநாட்டின் தொடக்க அமர்வில் உரையாற்றிய அனந்த நாகேஸ்வரன், “உற்பத்தித் துறை மற்றும் முதலீடுகளில் இந்தியா வலுவான வளர்ச்சியை கண்டு வருகிறது.
இதன் காரணமாக, 2026-27ம் நிதியாண்டின் முதல் காலாண்டில், இந்தியாவின் உண்மையான மொத்த உள்நாட்டு உற்பத்தி (ஜிடிபி) 7.8% ஆக வளர்ச்சி அடைந்துள்ளது. மேலும், இதே காலாண்டில் சரக்கு ஏற்றுமதி 18.5% வளர்ச்சி கண்டுள்ளது.
இந்தியாவில் மனித வளம் அதிகமாக தேவைப்படும் உற்பத்தித் துறைகளில் புதிய வாய்ப்புகளை உருவாக்க இந்தியா தனது சுதந்திர வர்த்தக ஒப்பந்தங்களை விரிவுபடுத்தி வருகிறது. குறைந்த செலவில் பொருட்களை உற்பத்தி செய்வதில் இருந்து, இந்தியா தயாரிக்கும் பொருட்களை உலகம் சார்ந்திருக்கும் நிலையை நோக்கி நகர வேண்டும் என்பதில் இந்தியா கவனம் செலுத்தி வருகிறது.
விவசாயத் துறையில் நாம் கொண்டுள்ள பாரம்பரிய பலம், பசுமைப் புரட்சி, வெண்மைப் புரட்சி ஆகிய சாதனைகளுக்கு அப்பால் இந்தியா செல்ல வேண்டிய அவசியம் உள்ளது. விவசாயம் மற்றும் உணவு பதப்படுத்துதல் துறை தொடர்ந்து முக்கியமானதாக இருந்தாலும், சிறந்த கல்வி, திறன் மேம்பாடு, தொழில்நுட்ப கண்டுபிடிப்புகள், உயர் உற்பத்தித் திறன் ஆகியவற்றின் மூலம், விவசாயத்தில் இருந்து தொழில்நுட்பம் சார்ந்த தொழில் துறைகளை நோக்கி இந்தியா பயணிக்க வேண்டும்.
More Read
பொருளாதார மீள்தன்மைக்கு இந்தியா தனது உற்நாட்டு உற்பத்தியை வலுப்படுத்த வேண்டும், இறக்குமதி ஆதாரங்களை பன்முகப்படுத்த வேண்டும், எரிசக்தி, தொழில்துறை உலோகங்கள், உரங்கள், மருந்து மூலப்பொருட்கள் மற்றும் முக்கிய கனிமங்கள் போன்ற அத்தியாவசியப் பொருட்களின் கையிருப்பை போதுமான அளவுக்கு உருவாக்க வேண்டும்.
உலகளாவிய விநியோகச் சங்கிலிகளில் இந்தியா தவிர்க்க முடியாத இடத்தைப் பெறும் வகையில் புதிய தயாரிப்புகள், தொழில்நுட்பங்கள், திறன்களை உருவாக்க வேண்டும். வளர்ச்சி அடைந்த இந்தியாவை உருவாக்க, உள்நாட்டு உற்பத்தியை வலுப்படுத்துதல், அத்தியாவசியப் பொருட்களின் விநியோகத்தை பாதுகாத்தால், உலகளாவிய போட்டித் திறன்களை வளர்த்தல் ஆகிவற்றை உள்ளடக்கிய ஒருங்கிணைந்த உத்தி தேவை.” என தெரிவித்தார்.
