இந்தியாவில் சாதிவாரி மக்கள்தொகை கணக்கெடுப்புப் பணிகள் தீவிரமடைந்து வரும் சூழலில், கணக்கெடுப்பு முறையில் வெளிப்படைத்தன்மையையும் துல்லியத்தையும் உறுதி செய்ய மத்திய அரசு புதிய தொழில்நுட்ப நடைமுறைகளைப் பின்பற்ற வேண்டும் எனப் பாட்டாளி மக்கள் கட்சியின் தலைவர் அன்புமணி ராமதாஸ் வலியுறுத்தியுள்ளார். இது தொடர்பாக அவர் வெளியிட்டுள்ள விரிவான அறிக்கையில், சாதிவாரி கணக்கெடுப்பின் போது மக்களின் சாதிப் பெயர்களைக் கேட்டு நேரடியாகக் கையால் அல்லது திறந்தவெளிப் படிவத்தில் பதிவு செய்யும் முறையைக் கைவிட வேண்டும் என்று சுட்டிக்காட்டியுள்ளார்.
அதற்குப் பதிலாக, மத்திய மற்றும் மாநில அரசுகளால் ஏற்கனவே அங்கீகரிக்கப்பட்டு அதிகாரப்பூர்வமாக நடைமுறையில் உள்ள ஓபிசி (OBC) சாதிகளின் பட்டியலை கணக்கெடுப்புச் செயலியில் (Census Mobile App) முன்கூட்டியே இணைக்க வேண்டும். அதிலிருந்து மக்கள் தங்களின் சாதிப் பெயரையும், அதற்குரிய எண்ணையும் எளிதாகத் தேர்வு செய்யும் முறையை மத்திய அரசு அமல்படுத்த வேண்டும் என்று அன்புமணி கேட்டுக்கொண்டுள்ளார்.
இந்தியாவில் கடைசியாக 1931-ஆம் ஆண்டில் தான் முழுமையான சாதிவாரி மக்கள்தொகை கணக்கெடுப்பு நடத்தப்பட்டது. அதன்பின்னர், சுமார் 95 ஆண்டுகளுக்குப் பிறகு பாட்டாளி மக்கள் கட்சி உள்ளிட்ட சமூகநீதி அமைப்புகளின் தொடர்ச்சியான போராட்டங்கள் மற்றும் அழுத்தங்களின் காரணமாகத் தற்போது மீண்டும் தேசிய அளவில் சாதிவாரி கணக்கெடுப்புத் தொடங்கப்பட்டுள்ளது. முதல்கட்டமாக நாடு முழுவதும் வீட்டுப் பட்டியல் தயாரிக்கும் பணிகள் வெற்றிகரமாக நிறைவடைந்துள்ள நிலையில், இமயமலையை ஒட்டிய மாநிலங்களில் கடந்த ஒன்றாம் தேதி முதல் சாதி விவரங்களுடன் மக்கள்தொகை கணக்கெடுக்கும் பணி தீவிரமாக நடைபெற்று வருகிறது. தமிழகம் உள்ளிட்ட பிற மாநிலங்களில் வரும் பிப்ரவரி மாதத்தில் இந்தப் பணிகள் தொடங்கப்படவுள்ளன.
இந்தச் சூழலில், கணக்கெடுப்புச் செயலியில் சாதி என்ற கேள்விக்கு எதிரில் காலியிடம் ஒதுக்கப்பட்டு, பொதுமக்கள் சொல்லும் சாதியின் பெயரை அப்படியே டைப் செய்து பதிவு செய்யும் முறை பின்பற்றப்படுவதாக மத்திய அரசு தெரிவித்துள்ளது. இந்த நடைமுறைக்கு முதன்முதலில் வலுவான எதிர்ப்பைப் பதிவு செய்தவர் அன்புமணி என்பது குறிப்பிடத்தக்கது. நேரடியாகப் பெயர்களை எழுதும்போது, எழுத்துப் பிழைகள், உள்ளூர் பெயர்கள் மற்றும் ஒரே சாதிக்கு வெவ்வேறு பெயர்கள் பதிவு செய்யப்படும் அபாயம் உள்ளது.
இப்பிரச்சினையைத் தவிர்க்கக் கணக்கெடுப்புச் செயலியில் மத்திய மற்றும் மாநில அரசுகளின் ஓபிசி பட்டியலை இணைக்க வேண்டும் என்று ஓபிசி நாடாளுமன்ற உறுப்பினர்களுக்கு அன்புமணி முன்னதாகக் கடிதம் எழுதியிருந்தார். தற்போது பாமகவின் இந்த நியாயமான நிலைப்பாட்டைக் காங்கிரஸ் உள்ளிட்ட எதிர்க்கட்சிகளும் ஆதரித்து குரல் கொடுத்து வருகின்றன.
More Read
அதிகாரிகளின் பலவீனமான வாதமும் காகா கலேல்கர், மண்டல் ஆணையங்களின் வரலாறும்
இதனிடையே, பட்டியலைச் செயலியில் இணைக்காதது குறித்து விளக்கமளித்துள்ள மத்திய அரசு அதிகாரிகள், ஓபிசி பட்டியலில் இடம்பெற்றிருப்பவை ‘வகுப்புகள்’ தானேயன்றி, அவை ‘சாதிகள்’ அல்ல என்றும், அதில் பிச்சை எடுப்பவர்கள், உள்ளூரில் பிறந்தவர்கள் போன்ற பிரிவுகள் இடம் பெற்றுள்ளதால் குழப்பத்தைத் தவிர்க்கவே மக்களிடம் கேட்டு எழுதும் முறை பின்பற்றப்படுவதாகவும் கூறியுள்ளனர். மத்திய அரசு அதிகாரிகளின் இந்த விளக்கத்தை முற்றிலும் ஏற்றுக்கொள்ள முடியாது என்றும், இது தங்களது பலவீனமான நிலைப்பாட்டை நியாயப்படுத்தக் கூறப்படும் காரணம் என்றும் அன்புமணி சாடியுள்ளார்.
இந்தியாவின் சமூகநீதி வரலாற்றை நினைவுகூர்ந்துள்ள அன்புமணி , 1955-ஆம் ஆண்டு மார்ச் 30-இல் காகா கலேல்கர் தலைமையிலான முதலாவது தேசிய பிற்படுத்தப்பட்டோர் ஆணையம் உருவாக்கிய ஓபிசி பட்டியலில் 2,399 சாதிகள் இடம்பெற்றிருந்தன என்றும், அதில் 837 சாதிகள் மிகவும் பிற்படுத்தப்பட்டவையாக வகைப்படுத்தப்பட்டிருந்தன என்றும் சுட்டிக்காட்டினார். அந்தப் பட்டியலில் முழுக்க முழுக்கச் சமூகங்களே இடம்பெற்றிருந்தன.
More Read
தொடர்ந்து, 1980-ஆம் ஆண்டு டிசம்பர் 31-இல் பி.பி.மண்டல் தலைமையிலான இரண்டாவது தேசிய பிற்படுத்தப்பட்டோர் ஆணையம் தாக்கல் செய்த அறிக்கையில் ஓபிசி பட்டியல் முறையே 3,743 மற்றும் 1,937 என உயர்த்தப்பட்டது. சாதியின் அடிப்படையில் மட்டுமின்றி, சமுதாயத்தில் நலிவடைந்த நிலையில் இருந்த சில தொழில் பிரிவினரையும், நாடோடிக் குழுக்களையும் அவர்களின் சமூக, பொருளாதார பின்தங்கிய நிலையைக் கருத்தில் கொண்டே மண்டல் ஆணையம் ஓபிசி பட்டியலில் இணைத்தது.
ஒரு காலத்தில் பிச்சை எடுப்பதை முதன்மைத் தொழிலாகக் கொண்டிருந்த தாசரி, ஜங்கம் போன்ற நலிவடைந்த வகுப்பினர் மண்டல் ஆணையத்தின் பரிந்துரைப்படியே 1993-இல் வெளியிடப்பட்ட மத்திய ஓபிசி பட்டியலில் சேர்க்கப்பட்டனர். மேலும், அந்தமான் தீவுகளுக்கான ஓபிசி பட்டியலில் ‘உள்ளூரில் பிறந்தவர்கள்’ என்ற பிரிவு 2011-இல் தான் இணைக்கப்பட்டது. இதுபோன்று சமூகத்தில் பின்தங்கிய நிலையில் உள்ள பிரிவினருக்குச் சமூகநீதி வழங்கவே இத்தகைய பட்டியல்கள் உருவாக்கப்பட்டன.
இதற்குத் தமிழ்நாட்டிலும் மிகச்சிறந்த வரலாற்றுச் சான்று உள்ளது. திருநங்கையர் என்பது சாதியின் பெயர் அல்ல, அது பாலின அடையாளம் ஆகும். ஆனால், அவர்களின் சமூக மற்றும் பொருளாதார நிலையை உயர்த்த வேண்டும் என்ற நோக்கில், 2012-இல் உச்ச நீதிமன்றம் அளித்த தீர்ப்பைத் தொடர்ந்து, தமிழ்நாட்டில் திருநங்கையர் மிகவும் பிற்படுத்தப்பட்டோர் (MBC) பட்டியலில் சேர்க்கப்பட்டுச் சமூகநீதி பயன்கள் வழங்கப்பட்டு வருகின்றன.
எனவே, சமூக மற்றும் பொருளாதாரத்தில் பின்தங்கிய மக்களுக்குச் சமூகநீதி வழங்குவதே சாதிவாரி கணக்கெடுப்பின் முதன்மை நோக்கமாகும். அவ்வாறு இருக்கும்போது, ஓபிசி பட்டியலில் உள்ள சில பிரிவுகளைச் சாதிகளாகப் பதிவு செய்வதால் எவ்விதக் குழப்பமும் ஏற்பட்டுவிடாது என்று பாமக தலைவர் அன்புமணி தெளிவுபடுத்தியுள்ளார்.
மத்திய அரசு தற்போது பின்பற்றும் ‘மக்களிடம் கேட்டு நேரடியாக எழுதும்’ முறையைத் தொடர்ந்து செயல்படுத்தினால், இந்தியாவில் ஒட்டுமொத்தமாக 4,147 சாதிகள் மட்டுமே உள்ள நிலையில், கணக்கெடுப்பின் முடிவில் 46.70 லட்சத்திற்கும் அதிகமான சாதிகள் இருப்பதாகத் தவறான புள்ளிவிவரங்கள் வெளிவரும். இது சாதிவாரி கணக்கெடுப்பின் அடிப்படை நோக்கத்தையே முற்றிலும் சிதைத்துவிடும்.
மத்திய அரசின் இந்தத் தவறான அணுகுமுறை ‘மூட்டைப் பூச்சிக்குப் பயந்து வீட்டைக் கொளுத்துவதற்குப்’ சமமானது என்று விமர்சித்துள்ள அன்புமணி, இது சமூகநீதிக்கு எந்தவொரு வலிமையையும் சேர்க்காது என்று எச்சரித்துள்ளார். எனவே, சாதியின் பெயரை நேரடியாகக் கேட்டுப் பதிவு செய்யும் முறையைக் கைவிட்டு, ஓபிசி சாதிகள் பட்டியலைச் செயலியில் இணைத்துத் தேர்வு செய்யும் முறையை உடனடியாக அமல்படுத்த வேண்டும்.
More Read
இதற்காகக் கடந்த ஆகஸ்ட் 14-ஆம் தேதி அரசிதழில் வெளியிடப்பட்ட சட்டப்பூர்வ ஆணை S.O. 4505(E)-ஐ மத்திய அரசு உடனடியாக ரத்து செய்ய வேண்டும். அதற்குப் பதிலாக, புதிய திருத்தப்பட்ட சட்டப்பூர்வ ஆணையைப் பிறப்பித்து, துல்லியமான மற்றும் பயன்படக்கூடிய சாதிவாரி மக்கள்தொகை கணக்கெடுப்பை மத்திய அரசு நடத்த வேண்டும் என அன்புமணி தனது அறிக்கையின் வாயிலாகக் கேட்டுக்கொண்டுள்ளார்.
