பத்தரை லட்சம் கோடி கடன் வைத்துவிட்டு சென்றுள்ளதாக அமைச்சர் கீர்த்தனா பேசியதற்கு தங்கம் தென்னரசு கண்டனம்

தமிழக அரசியல் களம் தற்பொழுது ஆளும் புதிய அரசுக்கும், பிரதான எதிர்க்கட்சிக்கும் இடையே கடுமையான வார்த்தைப் போராக மாறி, பெரும் பரபரப்பை ஏற்படுத்தி வருகிறது. கடந்த மே 10-ஆம் தேதி தமிழகத்தின் புதிய முதலமைச்சராகத் தமிழக வெற்றிக் கழகத்தின் (தவெக) தலைவர் சி.ஜோசப் விஜய் பொறுப்பேற்றது முதல், முந்தைய திமுக அரசின் நிதி நிர்வாகம் குறித்துப் பல்வேறு கடுமையான விமர்சனங்கள் முன்வைக்கப்பட்டு வருகின்றன. குறிப்பாக, முதலமைச்சர் விஜய் தனது பதவியேற்பு உரையிலேயே தமிழக அரசின் கஜானா முற்றிலும் துடைக்கப்பட்டு இருப்பதாகக் பகிரங்கமாகக் குற்றம் சாட்டியிருந்தார். அதன் தொடர்ச்சியாக, புதிய அமைச்சரவையில் தொழில்துறை அமைச்சராகப் பொறுப்பேற்றுள்ள கீர்த்தனா, அண்மையில் நடைபெற்ற பொதுக்கூட்டம் ஒன்றில், “முந்தைய திமுக அரசு பத்தரை லட்சம் கோடி ரூபாய் கடனை வைத்துவிட்டு, கஜானாவைக் கழுவித் துடைத்துவிட்டுச் சென்றுள்ளது” என்று பேசியிருந்தார். இந்த விவகாரம் தற்பொழுது தமிழக அரசியலில் ஒரு புதிய பூகம்பத்தைக் கிளப்பியுள்ள நிலையில், திமுகவின் மூத்த தலைவரும் முன்னாள் நிதி அமைச்சருமான தங்கம் தென்னரசு இதற்கு மிகக் கடுமையான கண்டனத்தைப் பதிவு செய்துள்ளார்.

தனது அதிகாரப்பூர்வ ‘எக்ஸ்’ (X) சமூக வலைத்தளப் பக்கத்தில் இதுகுறித்து மிக நீண்டதொரு கண்டன அறிக்கையை வெளியிட்டுள்ள தங்கம் தென்னரசு, புதிய தொழில்துறை அமைச்சரின் பேச்சுக்குக் கடுமையான சாடல்களை முன்வைத்துள்ளார். “மாநிலத்தின் நிதி நிர்வாகம் மற்றும் பொருளாதாரம் குறித்தான எந்தவொரு சாதாரண அடிப்படைப் புரிதலும் இல்லாமல், ‘பத்தரை லட்சம் கோடி எடுத்துட்டு கழுவிட்டுப் போய்ட்டாங்க’ என்று போகிற போக்கில் புழுதி வாரித் தூற்றி, புதிதாகப் பொறுப்பேற்றுள்ள தொழில்துறை அமைச்சர் அவதூறு பரப்புவது வன்மையாகக் கண்டிக்கத்தக்கது. உள் நோக்கோடு திராவிட முன்னேற்றக் கழகத்திற்கு எதிராக, எவ்வித ஆதாரமும் இல்லாமல் மக்களிடையே ஒரு தவறான மாய பிம்பத்தைச் சமூக வலைதள ஜோடனைகள் மற்றும் காப்பரேட் விளம்பரங்கள் மூலம் கட்டமைக்கத் தவெக அரசு தற்பொழுது முயற்சி செய்து வருகிறது. இது முற்றிலும் விஷமத்தனமானது” என்று தங்கம் தென்னரசு குறிப்பிட்டுள்ளார்.

மேலும், புதிய அரசின் அமைச்சர்களுக்கு அரசு நிர்வாகத்தில் போதிய அனுபவம் இல்லாததே இத்தகைய தவறான புள்ளிவிவரங்களைப் பொதுவெளியில் பேசுவதற்குக் காரணம் என்று தங்கம் தென்னரசு சாடியுள்ளார். “அரசு நிர்வாகத்தில் இருக்கும் அனுபவமின்மை காரணமாக, பொதுமக்களைத் திட்டமிட்டு ஏமாற்றவும், குழப்பவும் வேண்டும் என்ற நோக்கில் தமிழ்நாட்டின் நிதி மற்றும் Debt (கடன்) நிலவரம் குறித்து இட்டுக்கட்டிக் கூறுவது அமைச்சர் கீர்த்தனாவின் அரசியல் முதிர்ச்சியின்மையையே காட்டுகிறது. ஒரு மாநிலத்தின் பொதுக் கடன் என்பது கடந்த பல தசாப்தங்களாகப் பல்வேறு உள்கட்டமைப்புத் திட்டங்கள், மக்கள் நலத் திட்டங்கள் மற்றும் மேம்பாட்டுப் பணிகளுக்காக முறைப்படி ரிசர்வ் வங்கியின் (RBI) வழிகாட்டுதலின்படி பெறப்பட்டதாகும். அதை ஏதோ அமைச்சர்கள் தங்களது சொந்தப் பயன்பாட்டிற்கு எடுத்துச் சென்றது போலப் பேசுவது அறியாமையின் உச்சம்” என்று அவர் விளக்கியுள்ளார்.

தொடர்ந்து தவெக அரசைச் சாடிய அவர், “அரசு நிர்வாகத்திலும், அமைச்சரவையிலும் பல ஆண்டுகள் நீண்ட அனுபவமிக்கவரான தற்போதைய நிதி அமைச்சர் கே.ஏ.செங்கோட்டையனும், நிதித்துறை நிர்வாக நடைமுறைகளில் நீண்ட கால நேரடி அனுபவமிக்க தற்போதைய நிதித்துறை செயலாளரும், இந்தத் தவறான கருத்தை இடித்துரைத்துத் தொழில்துறை அமைச்சரின் கற்பனைக் குதிரைக்குக் கடிவாளம் போட முன்வருவார்களா? அல்லது தங்களது அரசியல் லாபத்திற்காகப் பொய்யும், புனைகதைகளும் மிக்க இத்தகைய மலிவான பொய்ப் பிரச்சாரங்களுக்குத் தொடர்ந்து துணை போகப் போகிறார்களா?” என்று கேள்வி எழுப்பியுள்ளார். நிதித்துறையின் அசல் வெள்ளை அறிக்கையைத் தவெக அரசு முறையாகப் படித்துப் பார்க்க வேண்டும் என்றும் அவர் வலியுறுத்தியுள்ளார்.