சர்வதேச எரிசக்தி சந்தையில் பெரும் அதிர்வலைகளை ஏற்படுத்தும் வகையில், பெட்ரோல் ஏற்றுமதிக்கு ஏப்ரல் 1, 2026 முதல் அடுத்த நான்கு மாதங்களுக்கு ரஷ்ய அரசு அதிரடியாகத் தடை விதித்துள்ளது. ஈரானுக்கும் அமெரிக்கா-இஸ்ரேல் கூட்டணிக்கும் இடையே நடந்து வரும் வளைகுடா போர் காரணமாகக் கச்சா எண்ணெய் விலை விண்ணைத் முட்டியுள்ள சூழலில், ரஷ்யாவின் இந்த Russia Fuel Export Ban அறிவிப்பு இந்தியா போன்ற இறக்குமதி நாடுகளுக்குக் கூடுதல் கவலையை ஏற்படுத்தியுள்ளது.
ஏன் இந்தத் தடை?
ரஷ்யாவின் இந்த முடிவுக்குப் பின்னால் மூன்று முக்கிய காரணங்கள் இருப்பதாகக் கூறப்படுகிறது:
- உள்நாட்டுத் தேவை: ரஷ்யாவில் கோடைக் காலம் மற்றும் விவசாயப் பணிகள் தொடங்கவுள்ள நிலையில், உள்நாட்டுச் சந்தையில் பெட்ரோல் தட்டுப்பாடு ஏற்படாமல் தடுக்கவும், விலையேற்றத்தைக் கட்டுப்படுத்தவும் இந்நடவடிக்கை எடுக்கப்பட்டுள்ளது.
- பராமரிப்புப் பணிகள்: அந்நாட்டின் முக்கிய எண்ணெய் சுத்திகரிப்பு நிலையங்களில் (Refineries) மேற்கொள்ளப்படவுள்ள வருடாந்திரப் பராமரிப்புப் பணிகள்.
- சர்வதேச போர்ச் சூழல்: ஈரான் மீதான தாக்குதல்களால் ஹார்முஸ் ஜலசந்தி முடக்கப்பட்டுள்ளதால், உலகளாவிய எண்ணெய் சந்தையில் நிலவும் நிலையற்ற தன்மை.
இந்தியாவிற்கு ஏற்படும் பாதிப்பு:
ஈரானுடனான போர் மற்றும் ஹார்முஸ் ஜலசந்தி முடக்கம் காரணமாக ஏற்கனவே இந்தியாவில் பெட்ரோல், டீசல் மற்றும் சமையல் எரிவாயு (LPG) விநியோகத்தில் சிக்கல்கள் நிலவி வருகின்றன. ரஷ்யாவிடமிருந்து குறைந்த விலையில் கச்சா எண்ணெய் பெற்று வந்த நிலையில், இந்த ஏற்றுமதித் தடை இந்தியச் சந்தையில் பெட்ரோல் விலையை மேலும் உயர்த்தக்கூடும் என அஞ்சப்படுகிறது.
ஒன்றிய அரசின் விளக்கம்:
ரஷ்யாவின் அறிவிப்பு குறித்து இந்திய ஒன்றிய அரசு விடுத்துள்ள விளக்கத்தில்:
- இந்தியாவில் தற்போது போதுமான அளவு கச்சா எண்ணெய், பெட்ரோல் மற்றும் டீசல் கையிருப்பு உள்ளது.
- திரவ இயற்கை எரிவாயு (LNG) மற்றும் திரவ எரிவாயு (LPG) விநியோகம் எந்தத் தடையுமின்றித் தொடரும்.
- மக்கள் அச்சப்படத் தேவையில்லை என்றும், மாற்று நாடுகளிடம் இருந்து எரிபொருள் இறக்குமதி செய்யப் பேச்சுவார்த்தைகள் நடந்து வருவதாகவும் தெரிவிக்கப்பட்டுள்ளது.
