தமிழக சட்டப்பேரவைத் தேர்தலை முன்னிட்டு திமுக மற்றும் அதன் கூட்டணிக் கட்சி வேட்பாளர்களை ஆதரித்துத் திருவள்ளூர் மற்றும் ராணிப்பேட்டையில் நடைபெற்ற பிரம்மாண்ட பொதுக்கூட்டங்களில் முதலமைச்சர் MK Stalin கலந்துகொண்டார். அப்போது அவர் பேசிய கருத்துக்கள் தமிழக அரசியல் களத்தில் பெரும் விவாதத்தைக் கிளப்பியுள்ளன. குறிப்பாக, தமிழகத்தின் ஆன்மீக மற்றும் பண்பாட்டுக் குறியீடுகளை அரசியல் சூழலோடு ஒப்பிட்டு அவர் பேசிய விதம் தொண்டர்களிடையே உற்சாகத்தை ஏற்படுத்தியது.
வடக்கு நோக்கிய தெய்வங்களும் – அரசியல் ஆபத்தும்
கூட்டத்தில் பேசிய முதலமைச்சர் MK Stalin, “தமிழ்நாடு எப்போதும் தனித்துவமான மாநிலம். பெரும்பாலும் நமது கிராமத் தெய்வங்கள் வடக்கு நோக்கித்தான் வீற்றிருக்கும். ஏனெனில், தமிழ்நாட்டுக்கு ஆபத்து எப்போதும் வடக்கிலிருந்துதான் வரும் என்பது நமது முன்னோர்களின் நம்பிக்கை. அப்படி வரும் என்டிஏ (NDA) என்ற ஆபத்தைத் தடுத்து நிறுத்தும் தேர்தல்தான் இது. தமிழ்நாட்டைக் காக்க மக்கள் அனைவரும் தயாராக வேண்டும்,” என்று ஆக்ரோஷமாகப் பேசினார். அதிமுகவின் எடப்பாடி பழனிசாமி பாஜகவின் அடிமையாக இருப்பதால் தான், மும்மொழித் திட்டம் மற்றும் இந்தித் திணிப்பு பற்றிப் பேச அவர்களுக்குத் துணிச்சல் வருவதாகவும் அவர் சாடினார்.
சாதனைகளை அடுக்கிய முதலமைச்சர்
கடந்த அதிமுக ஆட்சியில் வளர்ச்சி 0.07 விழுக்காடாகக் குறைந்திருந்த நிலையில், தற்போது திமுக ஆட்சியில் 11.19 விழுக்காடு வளர்ச்சியை எட்டி இந்தியாவுக்கே தமிழ்நாடு ரோல் மாடலாகத் திகழ்வதாக MK Stalin புள்ளிவிவரங்களுடன் விளக்கினார். மகளிர் உரிமைத்தொகைத் திட்டம் பெண்களுக்குப் பெரும் ஆதரவாக இருப்பதைச் சுட்டிக்காட்டிய அவர், இத்திட்டத்தைக் கொச்சைப்படுத்திய எடப்பாடி பழனிசாமிக்கு மக்கள் ’11-வது தோல்வி’யைப் பரிசாக அளிப்பார்கள் என்று கிண்டல் செய்தார்.
More Read
தமிழ்நாட்டை இரண்டாக உடைக்க முடியாது
பாஜக மற்றும் ஆர்.எஸ்.எஸ் அமைப்புகள் தமிழகத்தின் பெயரை மாற்ற முயல்வதாகவும், மாநிலத்தை இரண்டாக உடைக்கத் திமிராகப் பேசுவதாகவும் குற்றம் சாட்டிய முதலமைச்சர், “இந்த ஸ்டாலின் உயிரோடு இருக்கும் வரை, திமுக இருக்கும் வரை தமிழ்நாட்டை உங்களால் தொட்டுக்கூடப் பார்க்க முடியாது,” என்று சவால் விடுத்தார். மேலும், எய்ம்ஸ் மருத்துவமனை, மெட்ரோ ரயில் திட்டம் மற்றும் நீட் தேர்வு விவகாரங்களில் தமிழகத்திற்குத் துரோகம் செய்த பாஜகவிற்கு அதிமுக பல்லக்குத் தூக்குவதாக அவர் விமர்சித்தார்.
நெகிழ்ச்சியான நினைவுகள் மற்றும் வளர்ச்சித் திட்டங்கள்
More Read
திருவள்ளூர் மாவட்டத்திற்குத் தான் செய்துள்ள நன்மைகளைக் குறிப்பிட்ட முதலமைச்சர், அரிய வகை முகச்சிதைவு நோயால் பாதிக்கப்பட்ட சிறுமி டானியாவிற்கு உயர்தர சிகிச்சை அளித்ததையும், நரிக்குறவர் சமூக மாணவிகளின் வீட்டிற்குச் சென்று உணவு உண்டதையும் நெகிழ்ச்சியுடன் நினைவு கூர்ந்தார். “கடையனுக்கும் கடைத்தேற்றம் என்பதே திராவிட மாடலின் தாரக மந்திரம்,” என்று அவர் குறிப்பிட்டார். திருவள்ளூர் மற்றும் ராணிப்பேட்டை பகுதிகளில் சிப்காட் பூங்காக்கள், புதிய பேருந்து நிலையங்கள் மற்றும் டாடா மோட்டார்ஸ் போன்ற உலகத்தரம் வாய்ந்த தொழிற்சாலைகளைக் கொண்டு வந்ததன் மூலம் வேலைவாய்ப்புகள் பெருகியுள்ளதாகவும் MK Stalin தெரிவித்தார்.
மத்திய அரசின் நிதி உதவி இல்லாமலேயே தமிழ்நாடு இந்த வளர்ச்சியை எட்டியுள்ளதாகவும், திறமை இருந்தால் தடைகளைத் தாண்டலாம் என்பதற்குத் திராவிட மாடலே சாட்சி என்றும் அவர் பெருமிதத்துடன் உரையாற்றினார்.
