தமிழகத்தில் தேர்தல் களம் அனல் பறந்து வரும் நிலையில், மத்திய அரசின் தொகுதி மறுவரையறை மசோதாவிற்கு எதிராகத் தமிழக முதலமைச்சர் MK Stalin தனது போராட்டத்தைத் தீவிரப்படுத்தியுள்ளார். நாமக்கல்லில் இன்று மசோதா நகலை எரித்துப் போராட்டத்தில் ஈடுபட்ட அவர், அதனைத் தொடர்ந்து அதிமுக பொதுச்செயலாளர் எடப்பாடி பழனிசாமியின் மௌனத்தைக் கடுமையாகச் சாடிப் பேசினார்.
வரலாறு தந்த கடைசி வாய்ப்பு
எடப்பாடி பழனிசாமியை நோக்கிப் பேசிய முதலமைச்சர் MK Stalin, “மகளிர் இட ஒதுக்கீட்டை நாங்கள் வரவேற்கிறோம். ஆனால், அதன் பின்னணியில் உள்ள தொகுதி மறுவரையறை என்பது தமிழ்நாட்டிற்கு வரப்போகும் மிகப்பெரிய பேராபத்து. வரலாறு கொடுத்துள்ள இந்தக் கடைசி வாய்ப்பைப் பயன்படுத்தியாவது, எடப்பாடி பழனிசாமி பாஜகவை ஒருமுறையாவது எதிர்த்துப் பேச வேண்டும். தேசிய ஜனநாயகக் கூட்டணியில் இருக்கிறோம் என்பதற்காகக் கடைசி வரை அடிமையாகவும், கோழையாகவும் இருக்க வேண்டாம்” என்று கேட்டுக்கொண்டார்.
சேலம் மண்ணின் மானம்
“தமிழகத்தின் சேலம் மாவட்டத்தில் பிறந்துவிட்டு டெல்லிக்கு இப்படி அச்சம் கொள்ளலாமா? ஒரு தமிழனாக இருந்து கொண்டு டெல்லிக்கு முதுகு வளைந்து கொடுக்க அவருக்கு வெட்கமாக இல்லையா?” என்று MK Stalin காரசாரமாகக் கேள்வி எழுப்பினார். தென் மாநிலங்களின் நாடாளுமன்றப் பிரதிநிதித்துவத்தைக் குறைக்கும் இந்தச் சதிக்கு எதிராக எடப்பாடி பழனிசாமி குரல் கொடுக்கத் தவறினால், நடைபெறவுள்ள தேர்தலில் தமிழக மக்கள் அவருக்குச் சரியான பாடம் புகட்டுவார்கள் என்றும் அவர் எச்சரித்தார்.
More Read
நாமக்கல்லில் கருப்புக்கொடி போராட்டம்
முன்னதாக, நாமக்கல் மாவட்டம் நல்லிபாளையத்தில் கருப்புச் சட்டை அணிந்து போராட்டத்தில் ஈடுபட்ட முதலமைச்சர் MK Stalin, தொகுதி மறுவரையறை மசோதா நகலைப் பகிரங்கமாக எரித்தார். “மாநிலங்களின் உரிமைகளைப் பறிக்காதே” என்று முழக்கமிட்ட அவர், தமிழ்நாடு முழுவதும் திமுகவினர் கருப்புக்கொடி ஏற்றித் தங்களின் எதிர்ப்பைப் பதிவு செய்ய வேண்டும் என்று அறிவுறுத்தினார்.
இதனைத் தொடர்ந்து, சென்னை அண்ணா அறிவாலயம், முதலமைச்சரின் இல்லம் மற்றும் கோபாலபுரம் இல்லம் ஆகியவற்றில் கருப்புக்கொடிகள் ஏற்றப்பட்டுள்ளன. நாடாளுமன்றச் சிறப்புக் கூட்டத்தொடர் நடைபெறும் இந்த 3 நாட்களும் தமிழகம் முழுவதும் இந்தத் தீவிரப் போராட்டம் தொடரும் என MK Stalin அறிவித்துள்ளார்.
