சென்னை மாநகரத்தின் மையப்பகுதியில் அமைந்து ஒரு காலத்தில் ஆசியாவிலேயே மிகப்பெரிய பேருந்து நிலையமாகப் புகழ்பெற்ற கோயம்பேடு புறநகர் பேருந்து நிலையம், தற்போதைய திமுக அரசின் போதிய பராமரிப்பின்மையால் சீரழிந்து வருவதாக அதிமுக பொதுச்செயலாளர் எடப்பாடி பழனிசாமி கடுமையாகச் சாடியுள்ளார். இது தொடர்பாக அவர் வெளியிட்டுள்ள அறிக்கையில், பொதுமக்கள் மற்றும் பயணிகளின் பாதுகாப்பை உறுதி செய்யும் வகையில், கேட்பாரற்று சமூக விரோதிகளின் கூடாரமாக மாறி வரும் கோயம்பேடு பேருந்து வளாகத்தைப் போர்க்கால அடிப்படையில் புனரமைத்து, மீண்டும் முழுமையான மக்கள் பயன்பாட்டிற்கு கொண்டு வர வேண்டும் என EPS வலியுறுத்தியுள்ளார்.
தலைநகர் சென்னையில் நிலவிய போக்குவரத்து நெரிசலைக் குறைக்கவும், பொதுமக்களின் பயணங்களை எளிமையாக்கவும் அன்றைய அதிமுக அரசு எடுத்த வரலாற்றுச் சிறப்புமிக்க நடவடிக்கைகளைத் தனது அறிக்கையில் EPS விரிவாகக் சுட்டிக்காட்டியுள்ளார். சென்னை பாரிமுனையில் இயங்கி வந்த மத்திய பேருந்து நிலையத்தாலும், மொத்த காய்கறி வியாபாரத்தின் கேந்திரமாகத் திகழ்ந்த கொத்தவால் சாவடியாலும் அப்பகுதியில் கடுமையான போக்குவரத்து நெரிசலும், மக்கள் நெருக்கடியும் தொடர்ந்து ஏற்பட்டு வந்தது. இதற்கு நிரந்தரத் தீர்வு காணும் வகையில், கோயம்பேட்டில் சுமார் ரூ.103 கோடி மதிப்பீட்டில் ஆசியாவிலேயே மிகப்பெரிய மற்றும் நவீன வசதிகள் கொண்ட புறநகர் பேருந்து நிலையம் அமைக்கப்பட்டு, கடந்த 2002-ஆம் ஆண்டு அன்றைய முதல்வர் ஜெயலலிதா தலைமையிலான அதிமுக அரசால் திறந்து வைக்கப்பட்டது.
கோயம்பேடு பேருந்து நிலையம் திறக்கப்பட்டதற்குப் பிறகு, தலைநகர மக்களின் பயணத் தேவைகள் பல மடங்கு அதிகரித்தன. காலப்போக்கில் கோயம்பேடு பகுதியிலும் போக்குவரத்து மற்றும் மக்கள் நெரிசல் அதிகமானதைத் தொடர்ந்து, தென் மாவட்டங்களுக்குச் செல்லும் பேருந்துகளுக்காகப் புதிய பேருந்து முனையம் அமைக்கும் திட்டம் அதிமுக ஆட்சியில் உருவாக்கப்பட்டது. அதன்படி, செங்கல்பட்டு மாவட்டம் கிளாம்பாக்கத்தில் பிரம்மாண்டமான புறநகர் பேருந்து நிலையம் அமைப்பதற்குத் திட்டமிடப்பட்டு, கடந்த 2019-ஆம் ஆண்டு அப்போதைய முதலமைச்சராக இருந்த EPS நேரில் சென்று அடிக்கல் நாட்டிப் பணிகளைத் தொடங்கி வைத்தார்.
பொதுமக்களுக்கு எவ்வித இடையூறும் இன்றிப் பேருந்து சேவைகளை தங்குதடையின்றி வழங்குவதற்காக, அதிமுக ஆட்சியில் மிகவும் தொலைநோக்குப் பார்வையுடன் கூடிய முப்பரிமாணப் போக்குவரத்துத் திட்டம் வகுக்கப்பட்டது. இதன்படி, கிளாம்பாக்கம் புதிய பேருந்து நிலையத்திலிருந்து தென் மாவட்டங்களுக்குச் செல்லும் அனைத்துப் பேருந்துகளையும் இயக்குவது என்றும்; கோயம்பேடு பேருந்து நிலையத்திலிருந்து கோவை, சேலம், ஈரோடு உள்ளிட்ட மேற்கு மாவட்டங்களுக்கும், வேலூர், தர்மபுரி, திருவள்ளூர் உள்ளிட்ட வட மாவட்டங்களுக்கும் பேருந்துகளை இயக்குவது என்றும் முடிவெடுக்கப்பட்டது. மேலும், மாதவரத்தில் புதிதாக அமைக்கப்பட்ட பேருந்து நிலையத்திலிருந்து ஆந்திரா மற்றும் பிற வெளிமாநிலங்களுக்குச் செல்லும் பேருந்துகளை இயக்குவது என்றும், கோயம்பேட்டிலிருந்து நகரின் அனைத்துப் பகுதிகளுக்கும் மாநகரப் பேருந்துகளை (MTC) தடையின்றி இயக்குவது என்றும் திட்டமிடப்பட்டுச் சிறப்பாகச் செயல்பட்டு வந்தது.
ஆனால், கடந்த 2021-ஆம் ஆண்டு தமிழ்நாட்டில் ஆட்சி மாற்றத்திற்குப் பிறகு பொறுப்பேற்ற திமுக அரசு, அதிமுக ஆட்சியில் கொண்டுவரப்பட்ட தொலைநோக்குத் திட்டங்களைச் சரியாகப் புரிந்து கொள்ளாமல் நாசப்படுத்திவிட்டதாக EPS கடுமையாகக் குற்றம் சாட்டியுள்ளார். அவசர அவசரமாகக் கிளாம்பாக்கம் பேருந்து நிலையத்தைத் திறந்து வைத்து, அனைத்துப் பகுதிகளுக்கும் அங்கிருந்தே பேருந்துகளை இயக்கத் தொடங்கியதன் மூலம், பல நூறு கோடி ரூபாய் செலவில் கட்டப்பட்ட கோயம்பேடு பேருந்து நிலையத்தை திமுக அரசு முற்றிலும் முடக்கிவிட்டது என்று அவர் ஆதங்கம் தெரிவித்துள்ளார்.
More Read
முறையான திட்டமிடல் இல்லாத திமுக அரசின் இந்த ஒருதலைப்பட்சமான நடவடிக்கையால், சென்னை நகருக்குள் இருந்து தென் மாவட்டங்கள் மற்றும் பிற பகுதிகளுக்குச் செல்லும் பொதுமக்கள் கடும் சிரமத்திற்கு ஆளாகியுள்ளனர். நகரின் மையப்பகுதியில் இருந்த கோயம்பேடு பேருந்து நிலையம் தற்போது பயன்பாடின்றி முடக்கப்பட்டதால், அதனைச் சுற்றியுள்ள சாலைகள், உணவகங்கள் மற்றும் சிறு வியாபாரிகளின் வாழ்வாதாரமும் கடுமையாகப் பாதிக்கப்பட்டுள்ளது. மேலும், பராமரிப்பின்றிப் பூட்டிக்கிடக்கும் பேருந்து நிலைய வளாகம் நாளுக்கு நாள் சீரழிந்து வருகிறது.
திமுக அரசின் அப்பட்டமான அலட்சியப் போக்கால், பல ஏக்கர் பரப்பளவில் அமைந்துள்ள கோயம்பேடு பேருந்து நிலைய வளாகம் தற்போது கேட்பாரற்றுப் போய், சமூக விரோதிகளின் புகலிடமாக மாறி வருகிறது. இரவு நேரங்களில் போதிய மின் விளக்கு வசதிகள் இல்லாததால், வளாகத்தின் உட்புறம் இருள் சூழ்ந்து காணப்படுகிறது. இதனால் மதுப்பிரியர்கள், கஞ்சா போதை ஆசாமிகள் மற்றும் சட்டவிரோதச் செயல்களில் ஈடுபடுவோரின் கூடாரமாகப் பேருந்து நிலையம் மாறியுள்ளதாக அப்பகுதி மக்களும், சமூக ஆர்வலர்களும் தொடர்ந்து புகார்களை எழுப்பி வருகின்றனர்.
கோயம்பேடு பேருந்து நிலைய வளாகத்தில் நிலவும் இந்த அவலநிலை குறித்துப் பலமுறை பொதுமக்கள் புகார் அளித்தும், காவல் துறையினரும், நகராட்சி நிர்வாகமும் எவ்வித நடவடிக்கையும் எடுக்காமல் வேடிக்கை பார்ப்பதாக EPS சாடியுள்ளார். வளாகத்திற்குள் அமைக்கப்பட்ட உட்கட்டமைப்புச் சாலைகள் அனைத்தும் சேதமடைந்து குண்டும் குழியுமாகக் காணப்படுகின்றன. மழைக்காலங்களில் தண்ணீர் தேங்கி கொசுக்கள் உற்பத்தியாகும் மையமாக மாறி நோய்த்தொற்று பரவும் அபாயமும் உருவாகியுள்ளது.
More Read
புதிய அரசு அமைந்த பின்னராவது கோயம்பேடு வளாகத்தின் சட்டவிரோதச் செயல்கள் கட்டுப்படுத்தப்படும் என்று மக்கள் எதிர்பார்த்த நிலையில், காவல் துறையினர் எவ்வித ரோந்துப் பணியையும் மேற்கொள்ளாமல் மெத்தனப் போக்குடன் செயல்பட்டு வருகின்றனர். இதனால் இரவு நேரத்தில் அப்பகுதி வழியாகச் செல்லும் பொதுமக்கள், பெண்கள் மற்றும் பயணிகள் அச்ச உணர்வுடனேயே கடந்து செல்லும் சூழல் நிலவுகிறது. அரசின் கோடிக்கணக்கிலான மக்கள் வரிப்பணத்தில் கட்டப்பட்ட ஒரு பொதுச்சொத்து இப்படிச் சீரழிவது வேதனையளிப்பதாக EPS குறிப்பிட்டுள்ளார்.
