உறுதியளிக்கப்பட்ட ஓய்வூதியத் திட்டத்தில் உள்ள ஓய்வுபெற்ற 46 ஆயிரம் பேருக்கு இடைக்கால ஓய்வூதியம் வழங்க வேண்டும் என இந்திய கம்யூனிஸ்ட் மாநிலச் செயலாளர் மு.வீரபாண்டியன் வலியுறுத்தியுள்ளார்.
இது தொடர்பாக அவர் வெளியிட்ட அறிக்கை: தமிழகத்தில் 2003 ஏப்.1-ம் தேதிமுதல் பணியில் சேர்ந்து 2025 டிச.31-ம் தேதிவரை ஓய்வுபெற்ற உறுதி அளிக்கப்பட்ட ஓய்வூதியத் திட்டத்தில் வரக்கூடிய ஊழியர்கள் 46 ஆயிரம் பேர் உள்ளனர். அவர்களுக்கு ஓய்வூதியம் வழங்கப்படவில்லை.
இந்நிலையில் அவர்களுக்கு இடைக்கால ஓய்வூதியம் வழங்குவதற்காக கடந்த 2025 ஜூன் 16-ல் அரசாணை பிறப்பிக்கப்பட்டது. அதன் அடிப்படையில் 2026 ஜனவரி 1 முதல் இடைக்கால ஓய்வூதியமாக அவர்களுக்கு ரூ.10 ஆயிரம்வழங்கப்பட வேண்டும்.
ஆனால் ஓய்வுபெற்ற 46 ஆயிரம் பேருக்கும் இந்த இடைக்கால ஓய்வூதியம் இதுவரை வழங்கப்படவில்லை. ஓய்வூதியம் என்பது சலுகையல்ல; அது உரிமை.
தங்களது கடந்த காலஉழைப்பு சக்தியை இச்சமூகத்துக்கு வழங்கியவர்களுக்கு, சமூக பொருளாதார பாதுகாப்பை வழங்க வேண்டியது இந்த சமூகத்தின் கடமையாகும். ஊழியர்களின் கண்ணியமான வாழ்வுக்கு ஓய்வூதியம் அவசியம் எனவும் உச்ச நீதிமன்றம் வலியுறுத்தியுள்ளது.
More Read
எனவே தமிழக அரசு, 2003 ஏப்ரல் 1 முதல் பணியில் சேர்ந்து, 2025 டிச.31 வரை ஓய்வுபெற்ற அனைவருக்கும், இடைக்கால ஓய்வூதியமானரூ.
10,000-ஐ மாதந்தோறும் வழங்க வேண்டும் இத்துடன் இந்த பணியாளர்களில் உயிரிழந்த 7,864 பேரின் இணையர்களுக்கு குடும்ப ஓய்வூதியத்தை வழங்கவும், பழைய ஓய்வூதியத் திட்டத்தை மீண்டும் நடைமுறைப்படுத்தவும் நடவடிக்கை மேற்கொள்ள வேண்டும் என வலியுறுத்தியுள்ளார்.
