தமிழகச் சட்டமன்றத் தேர்தல் நெருங்கி வரும் வேளையில், திண்டுக்கல் மற்றும் அதன் சுற்றுவட்டாரப் பகுதிகளில் அதிமுகவினர் மேற்கொண்டு வரும் நூதன பிரச்சாரம் பெரும் சர்ச்சையை ஏற்படுத்தியுள்ளது. தேர்தல் நடத்தை விதிகளை (Model Code of Conduct) அப்பட்டமாக மீறி, வாக்காளர்களுக்குப் பணத்திற்குப் பதில் ‘மாதிரி செக்குகளை’ (Dummy Checks) வழங்கி அவர்கள் வாக்கு சேகரிப்பதாகக் குற்றச்சாட்டுகள் எழுந்துள்ளன.
ரூ.10,000 ‘செக்’குகளுடன் பிரச்சாரம்
திண்டுக்கல் மாவட்டத்தின் நிலக்கோட்டை, வத்தலகுண்டு மற்றும் சேலம் மாவட்டத்தின் ஏற்காடு ஆகிய பகுதிகளில் அதிமுகவினர் தீவிரப் பிரச்சாரத்தில் ஈடுபட்டுள்ளனர். அப்போது, பொதுமக்களிடம் ரூ.10,000 மற்றும் ரூ.2,000 மதிப்பிலான மாதிரி செக்குகளைக் கொடுத்து, “நாங்கள் வெற்றி பெற்றால் இந்தத் தொகை உங்கள் வங்கித் கணக்கிற்கு வரும்” என வாக்குறுதி அளிப்பதாகக் கூறப்படுகிறது. இந்தச் செக்குகளில் கட்சித் தலைவர்களின் படங்கள் மற்றும் தேர்தல் வாக்குறுதிகள் இடம்பெற்றுள்ளன.
தேர்தல் ஆணையத்தில் புகார்
அரசியல் கட்சிகள் வாக்காளர்களுக்குப் பணம் அல்லது பரிசுப் பொருட்களை நேரடியாகவோ, மறைமுகமாகவோ வழங்குவது அல்லது ஆசை காட்டுவது தேர்தல் நடத்தை விதிகளின்படி (Model Code of Conduct) குற்றமாகும். இந்நிலையில், அதிமுகவினரின் இந்தச் ‘செக்’ பிரச்சாரத்திற்கு எதிராக எதிர்க்கட்சியினர் தேர்தல் நடத்தும் அலுவலர்களிடம் புகார் அளித்துள்ளனர்.
More Read
“வாக்காளர்களைக் கவர்ந்திழுக்க இப்படிப்பட்ட போலி செக்குகளை வழங்குவது ஜனநாயகத்திற்கு எதிரானது. இது ஒரு வகையான மறைமுகப் பணப்பட்டுவாடா” எனப் புகாரில் தெரிவிக்கப்பட்டுள்ளது. திண்டுக்கல் மாவட்டத்தில் நிலவும் இந்தப் பரபரப்பான சூழலால், தேர்தல் பறக்கும் படையினர் தங்களின் சோதனையைத் தீவிரப்படுத்தியுள்ளனர்.
மாதிரி செக்குகளை விநியோகம் செய்த நபர்கள் மீது வழக்குப் பதிவு செய்யப்படலாம் என்றும், இது குறித்து மாவட்டத் தேர்தல் அதிகாரி விரிவான அறிக்கை கேட்டுள்ளதாகவும் தகவல்கள் தெரிவிக்கின்றன. இந்தப் புகார் குறித்து அதிமுக தரப்பிலிருந்து இதுவரை அதிகாரப்பூர்வ விளக்கம் எதுவும் அளிக்கப்படவில்லை.
