இந்த வாரம் திரையரங்குகளில் பல்டி, ரைட், அந்த 7 நாட்கள், சரீரம், குற்றம் தவிர், பனை ஆகிய ஆறு புதிய படங்கள் வெளியாகியுள்ளன. அதோடு, ரசிகர்களின் விருப்பப் படமான தளபதி விஜய்யின் ‘குஷி’ திரைப்படம் மீண்டும் வெளியாகி திரையரங்குகளில் கொண்டாட்டத்தை உருவாக்கியுள்ளது. இந்த ஏழு திரைப்படங்களின் மினி விமர்சனங்களை இந்தக் கட்டுரையில் விரிவாகப் பார்க்கலாம்.
பல்டி: ஆக்ஷன் கலந்த கபடி ட்ராமா
உன்னி சிவலிங்கம் இயக்கத்தில், ஷேன் நிகாம், சாந்தனு, ப்ரீத்தி அஸ்ராணி, செல்வராகவன் மற்றும் அல்போன்ஸ் புத்திரன் உள்ளிட்ட பலர் நடித்துள்ள இருமொழிக் (தமிழ், மலையாளம்) திரைப்படம் ‘பல்டி’. கேரளா-பாலக்காடு பகுதியைச் சேர்ந்த சாந்தனு மற்றும் ஷேன் நிகாம் இருவரும் கபடி மீது உயிராய் இருக்கும் நண்பர்கள். இவர்களது அணி உள்ளூர் தாதா மற்றும் வட்டித் தொழில் செய்யும் செல்வராகவனின் அணியைத் தொடர்ச்சியாகத் தோற்கடிக்கிறது. பின், பணத் தேவைக்காக இருவரும் செல்வராகவன் அணியில் இணைகின்றனர். வட்டி கட்ட முடியாதவர்களை நிர்வாணப்படுத்தித் துன்புறுத்துவது செல்வராகவனின் பாணி. அப்படிப்பட்ட ஒரு சம்பவத்தில், ஷேன் நிகாமின் காதலி ப்ரீத்தி அஸ்ராணியின் அண்ணன் அவமானப்படுத்தப்பட, பிரச்சினை விஸ்வரூபம் எடுக்கிறது. கபடி, நட்பு, ஆக்ஷன் என இந்த நண்பர்கள் எப்படித் தங்கள் இலக்கை அடைகிறார்கள் என்பதே ‘பல்டி’.
கபடி ஆட்டக் காட்சிகள், காதல் மற்றும் சண்டைக் காட்சிகளில் ஷேன் நிகாம் சிறப்பான நடிப்பை வெளிப்படுத்தியுள்ளார். நண்பனாக வரும் சாந்தனுவும் உணர்ச்சிப்பூர்வமான மற்றும் ஆக்ஷன் காட்சிகளில் நல்ல பங்களிப்பைக் கொடுத்துள்ளார். வில்லன்களாக வரும் செல்வராகவன் மற்றும் அல்போன்ஸ் புத்திரன் ஆகியோர் தங்கள் தனித்துவமான நடிப்பால் படத்துக்கு விறுவிறுப்பைக் கூட்டுகின்றனர். ப்ரீத்தி அஸ்ராணிக்கு நடிப்பிற்கு அதிக வாய்ப்பு இல்லையென்றாலும், ஜாலக்காரி பாடலில் கவர்கிறார். சாய் அபயங்கரின் இசை படத்திற்குப் பலம். இடைவேளை வரை கதைப் புரியாத நிலை, பின் பாதியில் தொய்வு, அதிக லாஜிக் மீறல்கள் இருந்தாலும், சண்டைக் காட்சிகளுக்காக இந்தப் படத்தை ஒருமுறை பார்க்கலாம். இந்தப் படமே இந்த வார ரிலீஸ்களில் ஓரளவு கவனிக்கத்தக்க படமாக உள்ளது.
ரைட்: போலீஸ் ஸ்டேஷன் த்ரில்லர்
கரு.சுப்ரமணியன் ரமேஷ்குமார் இயக்கியுள்ள ‘ரைட்’ திரைப்படம் ஒரு மாறுபட்ட போலீஸ் கதை. சென்னை கோவளம் போலீஸ் ஸ்டேஷனை வெளியில் இருந்து தொழில்நுட்பத்தைப் பயன்படுத்தி ஒரு மர்ம நபர் தன் கட்டுப்பாட்டில் கொண்டு வருகிறார். ஸ்டேஷனில் இருப்பவர்கள் வெளியேற முயன்றால் குண்டு வெடிக்கும் என மிரட்டுகிறார். புகார் கொடுக்க வந்த அருண் பாண்டியன், சப் இன்ஸ்பெக்டர் அக்ஷரா ரெட்டி, ஏட்டு மூணாறு ரமேஷ் உள்ளிட்டோர் இந்தச் சிக்கலை எப்படிச் சமாளிக்கிறார்கள்? மிரட்டுபவன் யார், அவன் நோக்கம் என்ன என்பதே ‘ரைட்’ படத்தின் கதை.
போலீஸ் ஸ்டேஷனில் நடக்கும் காட்சிகள் விறுவிறுப்பாக உள்ளன. மகன் காணாமல் போனதால் புகார் கொடுக்க வரும் அருண் பாண்டியன் கேரக்டர் சிறப்பாக உள்ளது. போலீஸ் இன்ஸ்பெக்டராக வரும் நட்டி (நடராஜன்), கிளைமாக்ஸ் ட்விஸ்ட்டில் தன் நடிப்பால் கவர்கிறார். வில்லன் வெளியிலிருந்து போலீஸ் ஸ்டேஷனைக் கட்டுப்படுத்துவது, விசாரணை நடப்பது எனப் பல விஷயங்களை இப்படம் பேசுகிறது. எனினும், தீவிரமான கதையில் வரும் காமெடி காட்சிகள், பல இடங்களில் திரைக்கதையில் ஏற்படும் தொய்வு ஆகியவை மைனஸ். லாஜிக் மீறல்கள் இருந்தாலும், போலீஸ் ஸ்டேஷன் செட்-அப் காட்சிகளுக்காக ‘ரைட்’ திரைப்படத்தை ரசிக்கலாம்.
More Read
அந்த 7 நாட்கள் (2025): விசித்திரமான காதல் கதை
சுந்தர் இயக்கத்தில் அஜித்தேஜ், ஸ்ரீஸ்வேதா மற்றும் பாக்யராஜ் நடிப்பில் வெளியாகி உள்ள புதிய படம் ‘அந்த 7 நாட்கள்’. ஒருவரைக் கண்ணால் பார்த்ததும் அவர் எப்போது இறப்பார் என்று சொல்லும் ஒரு வினோத சக்தி (சூப்பர் பவர்) கதாநாயகன் அஜித்தேஜுக்கு கிடைக்கிறது. கதாநாயகி ஸ்ரீஸ்வேதாவைப் பார்த்தபோது, அவர் ஏழு நாட்களில் இறந்துவிடுவார் என்று தெரியவர, அடுத்த ஏழு நாட்களில் நடக்கும் சம்பவங்களே கதை. முதல் பாதி காதலுடன் மெதுவாக நகர்கிறது. கதாநாயகிக்கு ரேபிஸ் பாதிப்பு ஏற்பட, அவரைக் காப்பாற்றக் கொடைக்கானல் செல்வது சுவாரஸ்யம். வித்தியாசமான ஃபேண்டஸி கலந்த காதல் கதை என்றாலும், அதற்கான சீரியஸ் தன்மை படத்தில் குறைவாகவே உள்ளது. கடைசி அரை மணி நேரக் காட்சிகள் மட்டுமே ரசிக்க வைக்கின்றன. ஒரு வித்தியாசமான கதைக்கருவைத் தாங்கி வந்தாலும், அதைச் சரியாகக் கையாளவில்லை.
குற்றம் தவிர்: மருத்துவத் துறையில் ஊழல்
எம். கஜேந்திரா இயக்கத்தில், ரிஷிரித்விக், பருத்திவீரன் சரவணன், ஆனந்தபாபு ஆகியோர் நடித்துள்ள படம் ‘குற்றம் தவிர்’. சுகாதாரத்துறை அமைச்சர், மருத்துவர் உள்ளிட்டோர் ஒரு கூட்டணி அமைத்து மருத்துவத் துறையில் முறைகேடாகக் கோடிக்கணக்கில் பணம் சம்பாதிக்கிறார்கள். இந்தத் திட்டத்தால் ஹீரோ ரிஷிரித்விக்கின் அக்கா வினோதினி பலியாகிறார். இதனால், போலீஸாக ஆசைப்படும் ஹீரோவே துப்பறிந்து, தன் அக்கா மரணத்திற்குக் காரணமானவர்களைக் கண்டுபிடித்துத் தண்டிப்பதுதான் கதை. முதல் பாதி வில்லன்களின் அட்டகாசம், ஹீரோவின் காதல், மருத்துவ முறைகேடுகள் என நகர்கிறது. ரிஷிரித்விக் காதல், பாசம், கோபம், சண்டைக் காட்சிகளில் தன் நடிப்பை வெளிப்படுத்தியுள்ளார். அக்காவாக வரும் வினோதினி பாசத்தைக் கொட்டுகிறார். வில்லன்களாக வரும் ஆனந்த்பாபு, பருத்திவீரன் சரவணன் ஆகியோரின் வில்லத்தனம் கவனிக்கத்தக்கது. ஸ்ரீகாந்த் தேவாவின் பின்னணி இசை படத்துக்கு பலம் சேர்க்கிறது. மருத்துவ முகாம் மற்றும் காப்பீடு திட்டங்களில் நடக்கும் முறைகேடுகள் குறித்த முக்கியமான ஒரு கருத்தை மட்டும் இந்தப் படம் அழுத்தமாகப் பதிவு செய்கிறது.
சரீரம்: பாலின மாற்றமும் அதன் பின்விளைவுகளும்
ஜி.வி. பெருமாள் இயக்கத்தில் தர்ஷன், சார்மி விஜய்லட்சுமி நடிப்பில் உருவாகியுள்ள படம் ‘சரீரம்’. பணக்கார குடும்பத்தைச் சேர்ந்த சார்மியை ஹீரோ தர்ஷன் காதலிக்கிறார். காதலுக்காக வீட்டை விட்டு வெளியேறும் இவர்கள், திருநங்கைகள் ஆதரவுடன், காதலுக்காகத் தங்கள் பாலினத்தை மாற்ற முடிவெடுக்கிறார்கள். ஹீரோ பெண்ணாகவும், ஹீரோயின் ஆணாகவும் மாற மருத்துவச் சிகிச்சையைத் தொடங்குகிறார்கள். இந்த முடிவுக்குப் பின் அவர்களுக்கு ஏற்படும் பிரச்சினைகள் என்ன? கர்ப்பமாகும் ஹீரோயின் என்ன முடிவெடுக்கிறார்? என்பதே கிளைமாக்ஸ். காதலுக்காகப் பாலினத்தை மாற்றுவது என்ற மையக்கருத்து வித்தியாசமானது. ஹீரோ, ஹீரோயின் இருவரும் உணர்வுப்பூர்வமாக நடித்து, தான் சந்திக்கும் சவால்களைப் பார்வையாளர்களுக்குக் கடத்துகிறார்கள். எனினும், இயற்கைக்கு மாறாக எதையும் செய்யக் கூடாது என்ற நீதி பேசப்பட்டு, பாசிட்டிவாகப் படத்தை முடித்துள்ளார் இயக்குநர்.
More Read
பனை: பனை மரமும் சமூகப் பிரச்சினைகளும்
எம். இராஜேந்திரன் இயக்கத்தில் ஹரீஷ், மேக்னா, வடிவுக்கரசி மற்றும் அனுபமாகுமார் ஆகியோர் நடித்துள்ள படம் ‘பனை’. பனை மரத்தைப் பின்னணியாக வைத்து சமூக ஏற்றத்தாழ்வுகளைப் பேசுகிறது இப்படம். பனைப் பொருட்களை நம்பி இருக்கும் குடும்பங்களின் பிரச்சினைகள், பனையின் பலனை அனுபவித்து ஆதிக்கம் செலுத்தும் வில்லனின் அட்டகாசங்கள் எனப் பல விஷயங்களை இப்படம் பேசுகிறது. கல்வியறிவு இருந்தும் கிராமத்தில் பனைப் பொருள் வியாபாரம் செய்யும் ஹீரோ, வில்லனின் ஆட்டத்துக்கு எப்படி முடிவு கட்டுகிறார் என்பதே கதை. பனை மரங்கள் நிறைந்த உடன்குடி பகுதியில் கதை நடப்பது சிறப்பு. வடிவுக்கரசி பாட்டியாக வரும் காட்சிகள் நெகிழ்ச்சி. மீராலால் இசையில் வைரமுத்துவின் வரிகள் கவனிக்க வைக்கின்றன. பனை மரங்கள் பாதுகாக்கப்பட வேண்டும், பனைத் தொழிலை நம்பி இருப்பவர்கள் வாழ்க்கை சிறக்க வேண்டும் என்ற சமூகக் கருத்தை அழுத்தமாகப் பதிவு செய்துள்ளதால் இப்படம் பாராட்டப்பட வேண்டியது.
குஷி: 25 ஆண்டுகள் கடந்தும் மாறாத கொண்டாட்டம்!
எஸ்.ஜே. சூர்யா இயக்கத்தில் விஜய் மற்றும் ஜோதிகா நடித்த சூப்பர் ஹிட் திரைப்படமான ‘குஷி’ 25 ஆண்டுகளுக்குப் பிறகு இந்த வாரம் ரீ-ரிலீஸ் செய்யப்பட்டுள்ளது. 260க்கும் அதிகமான திரையரங்குகளில் வெளியாகி, ரசிகர்களிடையே பெரும் வரவேற்பைப் பெற்றுள்ளது. விஜய் ரசிகர்கள் திரையரங்குகளைக் கொண்டாட்ட மேடையாக மாற்றியுள்ளனர். பல திரையரங்குகளில் ‘கட்டிப்பிடிடா’, ‘மேக்கரீனா’, ‘மேகம் கருக்குது’ போன்ற பாடல்கள் ஒன்ஸ்மோர் கேட்டு மீண்டும் ஒளிபரப்பப்பட்டு, ரசிகர்கள் ஆரவாரத்துடன் நடனமாடி பழைய நினைவுகளைப் புதுப்பித்து வருகின்றனர்.
