News Headline (Tamil): தேர்தல் இலவசங்களுக்குத் தடை கோரும் வழக்கு: “தேர்தல் முடிந்த பின் விசாரிக்கலாம்” – உச்சநீதிமன்றம் அதிரடி உத்தரவு!
Tagline (Tamil): தமிழகத் தேர்தல் வேளையில் பரபரப்பு: அரசியல் கட்சிகளின் இலவச அறிவிப்புகளுக்குத் தடை கோரிய மனுவை உடனே விசாரிக்க உச்சநீதிமன்றம் மறுப்பு.
News Description (Tamil):
தேர்தல் காலங்களில் அரசியல் கட்சிகள் அறிவிக்கும் இலவசத் திட்டங்களுக்குத் தடை விதிக்கக் கோரித் தாக்கல் செய்யப்பட்ட பொதுநல மனுவை, தற்போதைய சூழலில் அவசரமாக விசாரிக்க உச்சநீதிமன்றம் மறுப்பு தெரிவித்துள்ளது. மதுரையைச் சேர்ந்த கே.கே.ரமேஷ் என்பவர் தாக்கல் செய்த இந்த மனு, தலைமை நீதிபதி சூர்யகாந்த் மற்றும் நீதிபதி ஜோய்மால்யா பக்சி ஆகியோர் அடங்கிய அமர்வு முன்பாக இன்று (25.02.2026) விசாரணைக்கு வந்தது.
மனுதாரரின் வாதம்: தேர்தலுக்கு முன்பாக அரசியல் கட்சிகள் கவர்ச்சிகரமான இலவசத் திட்டங்களை அறிவிப்பதால் மாநில அரசுகளுக்குக் கடுமையான நிதிச்சுமை ஏற்படுகிறது. எனவே, இத்தகைய அறிவிப்புகளை வெளியிடும் முன் அதற்கான நிதி ஆதாரங்கள் குறித்து அரசியல் கட்சிகள் விளக்க வேண்டும் என்றும், தமிழகச் சட்டமன்றத் தேர்தலுக்கு முன்னதாக இத்தகைய இலவச வாக்குறுதிகளுக்குத் தடை விதிக்க வேண்டும் என்றும் மனுவில் கோரப்பட்டிருந்தது.
More Read
நீதிபதிகளின் கருத்து: இந்த மனுவை விசாரித்த நீதிபதிகள், “தேர்தல் காலங்களில் இது போன்ற பொதுநல மனுக்களைத் தாக்கல் செய்வது ஒரு வாடிக்கையாக மாறிவிட்டது. தற்போது தமிழ்நாடு, கேரளா உள்ளிட்ட மாநிலங்களில் சட்டமன்றத் தேர்தல் நடைபெறவுள்ள சூழலில், இந்த மனுவை அவசரமாக விசாரிக்க வேண்டிய அவசியம் இல்லை” என்று தெரிவித்தனர். மேலும், தேர்தல் நடைமுறைகள் அனைத்தும் முடிவடைந்த பின்னர் இந்த வழக்கைப் பொறுமையாக விசாரிக்கலாம் என்று கூறி விசாரணையை ஒத்திவைத்தனர். உச்சநீதிமன்றத்தின் இந்த முடிவு, தேர்தல் களத்தில் அதிரடி இலவசங்களை அறிவித்து வரும் அரசியல் கட்சிகளுக்குத் தற்காலிக நிம்மதியை அளித்துள்ளது.
