மத்திய பட்ஜெட் கூட்டத்தொடரில் இந்தியா – சீனா எல்லை விவகாரம் குறித்துப் பேச முயன்ற எதிர்க்கட்சி உறுப்பினர்கள் 8 பேர் மக்களவையிலிருந்து சஸ்பெண்ட் செய்யப்பட்டுள்ள சம்பவம் பெரும் அரசியல் பரபரப்பை ஏற்படுத்தியுள்ளது. இந்த நடவடிக்கைக்குத் தமிழக முதல்வர் மு.க.ஸ்டாலின் தனது கடும் கண்டனத்தைத் தெரிவித்துள்ளார். “எதிர்க்கட்சித் தலைவர் ராகுல் காந்தி எழுப்பும் கேள்விகளைக் கண்டு ஒன்றிய பாஜக அரசு ஏன் அஞ்சுகிறது?” என்று அவர் கேள்வி எழுப்பியுள்ளார்.
கடந்த பிப்ரவரி 2-ம் தேதி, மக்களவையில் குடியரசுத் தலைவர் உரைக்கு நன்றி தெரிவிக்கும் தீர்மானத்தின் மீதான விவாதத்தில் எதிர்க்கட்சித் தலைவர் ராகுல் காந்தி பங்கேற்றுப் பேசினார். அப்போது, முன்னாள் ராணுவத் தளபதி எம்.எம். நரவணேவின் சுயசரிதை புத்தகக் குறிப்புகளை மேற்கோள் காட்டி, 2020-ம் ஆண்டு இந்தியா – சீனா எல்லையில் நிலவிய சூழல் மற்றும் நாட்டின் பாதுகாப்பு குறித்து அவர் கேள்விகளை முன்வைத்தார். இதற்கு ஆளுங்கட்சி தரப்பில் கடும் எதிர்ப்பு கிளம்பியது. இதனைத் தொடர்ந்து ஏற்பட்ட அமளியின் போது, அவையின் மாண்பைக் குலைக்கும் வகையில் நடந்துகொண்டதாகக் கூறி, 8 எதிர்க்கட்சி எம்.பி.க்கள் சஸ்பெண்ட் செய்யப்பட்டனர்.
ராகுல் காந்தியின் கேள்விகளுக்குப் பதில் எங்கே?
இந்த விவகாரம் குறித்துச் சமூக வலைதளத்தில் பதிவிட்டுள்ள முதல்வர் மு.க.ஸ்டாலின், “தேசிய பாதுகாப்பு மற்றும் பொருளாதார நலன்கள் தொடர்பான விஷயங்களில் உறுப்பினர்கள் எழுப்பும் கேள்விகளுக்குப் பதிலளிக்க வேண்டிய கடமை அரசாங்கத்திற்கு உள்ளது. எனது சகோதரர் ராகுல் காந்தி எழுப்பிய நியாயமான கேள்விகளுக்குப் பதிலளிக்கத் துணியாமல், உறுப்பினர்களை இடைநீக்கம் செய்வது ஜனநாயகத்திற்கு அழகல்ல. 8 எதிர்க்கட்சி எம்.பி.க்கள் சஸ்பெண்ட் செய்யப்பட்டதை நான் வன்மையாகக் கண்டிக்கிறேன்” என்று குறிப்பிட்டுள்ளார்.
சஸ்பெண்ட் செய்யப்பட்ட எம்.பி.க்கள் விவரம்
சபாநாயகர் ஓம் பிர்லாவால் இந்தத் தொடர் முழுவதும் இடைநீக்கம் செய்யப்பட்டுள்ள உறுப்பினர்களில் மாணிக்கம் தாகூர், ஹிபி ஈடன், அமரிந்தர் சிங் ராஜா வரிங், குர்ஜீத் சிங் அவுஜ்லா உள்ளிட்ட 7 காங்கிரஸ் எம்.பி.க்களும், மார்க்சிஸ்ட் கம்யூனிஸ்ட் கட்சியைச் சேர்ந்த சு. வெங்கடேசன் ஆகியோரும் அடங்குவர். உறுப்பினர்களின் ஜனநாயக உரிமையை மீட்டெடுக்க வேண்டும் என்றும், இந்த இடைநீக்க உத்தரவை உடனடியாகத் திரும்பப் பெற வேண்டும் என்றும் சபாநாயகருக்கு முதல்வர் மு.க.ஸ்டாலின் கோரிக்கை விடுத்துள்ளார்.
இந்தச் சம்பவம் நாடாளுமன்ற வளாகத்தில் பெரும் போராட்டங்களுக்கு வழிவகுத்துள்ளது. ராகுல் காந்தி மற்றும் பிரியங்கா காந்தி தலைமையில் எதிர்க்கட்சி எம்.பி.க்கள் நாடாளுமன்ற வாயிலில் அமர்ந்து தர்ணாவில் ஈடுபட்டனர். நாட்டின் பாதுகாப்பு தொடர்பான முக்கியப் பிரச்சனைகளைப் பேசும் போது குரல்வளை நெரிக்கப்படுவதாக எதிர்க்கட்சிகள் குற்றம் சாட்டி வருகின்றன. இந்நிலையில், திமுக தலைவரின் இந்தக் கண்டனம் டெல்லி அரசியல் வட்டாரத்தில் கூடுதல் கவனத்தைப் பெற்றுள்ளது.
