தமிழ்த் திரையுலகில் சிறந்து விளங்கிய வாழ்நாள் சாதனையாளர்களைப் பாராட்டி கௌரவிக்கும் வகையில், முத்தமிழறிஞர் கலைஞர் அவர்களின் பெயரில் 2022ஆம் ஆண்டு முதல் வழங்கப்பட்டு வரும் “கலைஞர் நினைவு கலைத்துறை வித்தகர் விருதுக்கு” 2024 மற்றும் 2025ஆம் ஆண்டுகளுக்கான விண்ணப்பங்கள் தற்போது தமிழக அரசு வரவேற்கிறது. இந்த விருதுக்குத் தேர்வு செய்யப்படும் விருதாளருக்கு ரூ.10,00,000/- (ரூபாய் பத்து இலட்சம் மட்டும்) பரிசுத் தொகையுடன், பாராட்டுச் சான்றிதழும் வழங்கப்படும் என்று தமிழ்நாடு அரசு தெரிவித்துள்ளது. தமிழ்த் திரையுலகில் பல்வேறு துறைகளைச் சேர்ந்த சாதனையாளர்கள் இந்த விருதுக்கு விண்ணப்பிக்கலாம்.
கலைஞர் நினைவு கலைத்துறை வித்தகர் விருது – முழு விவரங்கள்
தமிழக அரசு வழங்கும் இந்த உயரிய விருது, தமிழ்த் திரையுலகின் அனைத்துப் பிரிவுகளைச் சேர்ந்த உழைப்பாளர்களின் பங்களிப்பைப் போற்றும் வகையில் அமைக்கப்பட்டுள்ளது.
விருதுக்கான தகுதிகள்:
தமிழ்த் திரைப்பட உலகிற்கு மிகச்சிறந்த பங்களிப்பை ஆற்றிய வாழ்நாள் சாதனையாளர்கள் விண்ணப்பிக்கத் தகுதி வாய்ந்தவர்கள் ஆவர். அவர்களில் அடங்குபவர்கள்:
- நடிகர், நடிகையர்
- இயக்குநர், தயாரிப்பாளர், கதாசிரியர், வசனகர்த்தா
- இசையமைப்பாளர், பாடலாசிரியர், பின்னணிப் பாடகர் மற்றும் பாடகி
- ஒளிப்பதிவாளர், படத்தொகுப்பாளர், கலை இயக்குநர், ஒலிப்பதிவாளர்
- சண்டைப்பயிற்சியாளர், நடன ஆசிரியர், ஒப்பனைக் கலைஞர் மற்றும் தையற் கலைஞர்
விண்ணப்பிக்கும் முறை:
- விண்ணப்பப் படிவம்: விண்ணப்பப் படிவத்தைச் செய்தி மக்கள் தொடர்புத் துறையின் அதிகாரப்பூர்வ வலைதளத்தில் (www.dipr.tn.gov.in) இலவசமாகப் பதிவிறக்கம் செய்து கொள்ளலாம்.
- அனுப்ப வேண்டிய முகவரி: பூர்த்தி செய்யப்பட்ட விண்ணப்பங்களை விரிவான விவரங்கள் மற்றும் அவற்றுக்குரிய ஆவணங்களுடன் பின்வரும் முகவரிக்கு அனுப்ப வேண்டும்:இயக்குநர், செய்தி மக்கள் தொடர்புத் துறை/ உறுப்பினர்-செயலாளர், திரைப்படத் துறையினர் நலவாரியம் முதல் தளம், மாநில செய்தி நிலையம், கலைவாணர் அரங்க வளாகம், வாலாஜா சாலை, சென்னை-600002.
- கடைசித் தேதி: நவம்பர் 28, 2025 அன்று மாலை 5.00 மணிக்குள் விண்ணப்பங்கள் வந்து சேர வேண்டும்.
தமிழ்த் திரையுலகில் நீண்ட காலமாகத் தொண்டாற்றி வரும் சாதனையாளர்கள் இந்த வாய்ப்பைப் பயன்படுத்திக்கொள்ளுமாறு தமிழக அரசு சார்பில் கேட்டுக் கொள்ளப்பட்டுள்ளது.
