தென் தமிழகத்தின் மிக முக்கியமான வணிக மற்றும் போக்குவரத்து மையமாகத் திகழும் மதுரை மாநகரத்தின் போக்குவரத்து நெரிசலைக் குறைக்கும் வகையில் கட்டப்பட்ட புதிய வெளிவட்டச் சாலை சமீபத்தில் பயன்பாட்டிற்கு வந்த நிலையில், ஒரே வாரத்திற்குள் அதன் சுங்கக் கட்டணம் உயர்த்தப்பட்டிருப்பது அப்பகுதி மக்களிடையேயும் வாகன ஓட்டிகளிடையேயும் பெரும் கொந்தளிப்பையும் அதிர்ச்சியையும் ஏற்படுத்தியுள்ளது. இந்திய தேசிய நெடுஞ்சாலைகள் ஆணையம் (NHAI) சார்பில் பெரும் பொருட்செலவில் உருவாக்கப்பட்ட இந்தச் சாலையில், போக்குவரத்து தொடங்கிய சில நாட்களிலேயே கட்டணங்கள் உயர்த்தப்பட்டிருப்பது நியாயமற்றது எனப் பல்வேறு தரப்பினரும் தங்களது எதிர்ப்பைப் பதிவு செய்து வருகின்றனர்.
மதுரை-திண்டுக்கல் மற்றும் மதுரை-திருச்சி ஆகிய இரு பிரதான தேசிய நெடுஞ்சாலைகளை இணைக்கும் வகையில் உருவாக்கப்பட்ட இந்த வெளிவட்டச் சாலை, தென் மாவட்டங்களுக்குப் பயணிக்கும் வாகனங்களுக்குப் பெரும் வரப்பிரசாதமாகக் கருதப்பட்டது. இருப்பினும், ஜூலை 15-ஆம் தேதி தான் இச்சாலை அதிகாரப்பூர்வமாகப் பயன்பாட்டுக்குக் கொண்டு வரப்பட்டுச் சுங்கக் கட்டணம் வசூலிக்கப்படத் தொடங்கியது. ஆனால், பயன்பாட்டிற்கு வந்து வெறும் ஏழே நாட்களில், அதாவது ஜூலை 22-ஆம் தேதி முதல் இதன் சுங்கக் கட்டணத்தை அதிரடியாக உயர்த்தி தேசிய நெடுஞ்சாலைகள் ஆணையம் புதிய அறிவிப்பை வெளியிட்டுள்ளது.
மதுரை நகருக்குள் நுழையாமல் வெளிப்பகுதியிலேயே திண்டுக்கல் மற்றும் திருச்சி நெடுஞ்சாலைகளை இணைக்கும் வகையில், வாடிப்பட்டி முதல் தாமரைப்பட்டி வரை 29.960 கிலோமீட்டர் தொலைவிற்கு இந்த நான்கு வழிச்சாலை அமைக்கப்பட்டுள்ளது. இந்திய தேசிய நெடுஞ்சாலை ஆணையத்தின் சார்பில் சுமார் 1,024 கோடி ரூபாய் மதிப்பீட்டில் மிகப்பிரம்மாண்டமாக இத்திட்டம் திட்டமிட்டுச் செயல்படுத்தப்பட்டது. இச்சாலையில் அலங்காநல்லூர் அருகே உள்ள இலவன்குளம் என்ற பகுதியில் நவீன வசதிகளுடன் கூடிய சுங்கச்சாவடி அமைக்கப்பட்டு, கட்டணம் வசூலிக்கும் பணிகள் நடைபெற்று வருகின்றன.
இந்தச் சாலை பயன்பாட்டிற்கு வந்ததன் மூலம், திண்டுக்கல், தேனி மற்றும் கேரள மாநிலப் பகுதிகளில் இருந்து திருச்சி, சென்னை நோக்கிச் செல்லும் வாகனங்கள் மதுரை நகர எல்லைக்குள் நுழைந்து நெரிசலில் சிக்க வேண்டிய அவசியம் தவிர்க்கப்பட்டது. பயண நேரம் கணிசமாகக் குறைந்ததோடு, எரிபொருள் சேமிப்பும் சாத்தியமானது. இதனால் தொடக்கத்தில் வாகன ஓட்டிகளும் உள்ளூர் மக்களும் மிகுந்த மகிழ்ச்சி அடைந்தனர். ஆனால், அந்த மகிழ்ச்சி நீடிக்கும் முன்பே கட்டண உயர்வு என்ற இடி விழுந்துள்ளது.
தேசிய நெடுஞ்சாலைகள் ஆணையம் வெளியிட்டுள்ள புதிய அறிவிப்பின்படி, மதுரை வெளிவட்டச்சாலையின் இலவன்குளம் சுங்கச்சாவடியில் அனைத்து வகையான வாகனங்களுக்கும் கட்டணங்கள் கணிசமாக உயர்த்தப்பட்டுள்ளன.
More Read
கார், ஜீப், வேன் போன்ற இலகு ரக வாகனங்களுக்கு ஒருமுறை பயணிப்பதற்கான கட்டணம் ரூ.55-லிருந்து ரூ.60 ஆக உயர்த்தப்பட்டுள்ளது. 24 மணி நேரத்திற்குள் திரும்பி வருவதற்கான கட்டணம் ரூ.85-லிருந்து ரூ.90 ஆகவும், ஒரு மாதத்திற்கு 50 முறை பயணிப்பதற்கான மாதாந்திர கட்டணம் ரூ.1,895-லிருந்து ரூ.1,950 ஆகவும் உயர்த்தப்பட்டு நடைமுறைக்கு வந்துள்ளது.
இலகுரக வணிக வாகனங்கள் (LCV), மினி பஸ்கள் போன்ற வாகனங்களுக்கு ஒருமுறை பயணக் கட்டணம் ரூ.90-லிருந்து ரூ.95 ஆகவும், மாதாந்திர கட்டணம் ரூ.3,060-லிருந்து ரூ.3,155 ஆகவும் அதிகரிக்கப்பட்டுள்ளது. அதேபோல், இரு அச்சு கொண்ட பேருந்துகள் மற்றும் லாரிகளுக்கு ஒருமுறை பயணக் கட்டணம் ரூ.190-லிருந்து ரூ.200 ஆகவும், 24 மணி நேரத்திற்குள் திரும்பும் கட்டணம் ரூ.290-லிருந்து ரூ.295 ஆகவும் உயர்த்தப்பட்டுள்ளது. அவற்றிற்கான மாதாந்திர கட்டணம் ரூ.6,410-லிருந்து ரூ.6,605 ஆக உயர்ந்துள்ளது. ஏனைய வணிக வாகனங்களின் ஒருவழிப் பயணக் கட்டணம் ரூ.95-லிருந்து ரூ.100 ஆக மாற்றப்பட்டுள்ளது.
பொதுவாக ஒரு புதிய சாலை பயன்பாட்டிற்கு வரும் போது, அதன் கட்டண அமைப்புகள் சில மாதங்களுக்காவது நிலையாக இருக்கும் என்பதே இயல்பான எதிர்பார்ப்பாகும். ஆனால், மதுரை வெளிவட்டச் சாலை தொடங்கப்பட்ட ஒரே வாரத்தில் சுங்கக் கட்டணம் உயர்த்தப்பட்டிருப்பது வாகன ஓட்டிகளை உலுக்கியுள்ளது. குறிப்பாகத் தினசரி இச்சாலையைப் பயன்படுத்தும் காய்கறி வியாபாரிகள், உள்ளூர் டாக்சி மற்றும் வேன் ஓட்டுநர்கள், சரக்கு வாகன உரிமையாளர்கள் பெரும் நிதிச்சுமைக்கு ஆளாகியுள்ளனர்.
More Read
இது குறித்துத் அப்பகுதி லாரி உரிமையாளர்கள் சங்கப் பிரதிநிதிகள் கூறுகையில், “ஏற்கனவே டீசல் விலை உயர்வு மற்றும் வாகனப் பராமரிப்புச் செலவுகளால் போக்குவரத்துத் துறை கடுமையான நெருக்கடியைச் சந்தித்து வருகிறது. இத்தகைய சூழலில், புதிதாகத் திறக்கப்பட்ட ஒரு சாலையிலேயே ஒரே வாரத்தில் சுங்கக் கட்டணத்தை உயர்த்துவது அநியாயமானது. இந்த கூடுதல் கட்டணச் சுமை இறுதியில் பொதுமக்கள் மீதே அத்தியாவசியப் பொருட்களின் விலை உயர்வாக வந்து விழும்” என்று தங்களது வேதனையைத் தெரிவித்தனர்.
