நாடு முழுவதும் இப்போது 20% எத்தனால் கலக்கப்பட்ட (இ20) பெட்ரோல் விற்பனை கட்டாயமாக்கப்பட்டுள்ளது. இதற்கு சிலர் எதிர்ப்பு தெரிவித்து வருகின்றனர். இதுகுறித்து ஜூலை 8 மற்றும் 9 ஆகிய தேதிகளில் ‘சி-வோட்டர்’ அமைப்பு நாடு தழுவிய அளவில் 1,641 பேரிடம் கருத்துக் கணிப்பு நடத்தியது.
அமெரிக்கா- ஈரான் போரினால் கச்சா எண்ணெய் விநியோகம் பாதிக்கப்பட்டுள்ள நிலையில், இந்தியாவின் இறக்குமதி சார்பைக் குறைக்க எத்தனால் கலப்பு உதவுமா என்பது உட்பட 12 கேள்விகள் இந்த ஆய்வில் கேட்கப்பட்டன.
கருத்துக் கணிப்பில் கிடைத்த விவரங்கள் வருமாறு: கருத்து கணிப்பில் பங்கேற்றவர்களில் 52 % பேர் எத்தனால் கலப்புத் திட்டத்துக்கு எதிர்ப்பு தெரிவித்தனர். 25.9 % பேர் கருத்து தெரிவிக்க விரும்பவில்லை என்றும் 22 % பேர் ஆதரிப்பதாகவும் தெரிவித்தனர். 60 %-க்கும் அதிகமானவர்கள், போதிய ஆராய்ச்சி இல்லாமல் இந்தத் திட்டம் அவசரமாகச் செயல்படுத்தப்படுவதாக நம்புகின்றனர்.
வாகனப் பழுது (52.8 %) மற்றும் மைலேஜ் குறைவு (54.2 %) காரணமாக இ20 எரிபொருளைப் பயன்படுத்த விரும்பவில்லை என 55 %-க்கும் அதிகமானோர் தெரிவித்தனர். எத்தனால் கலந்த பெட்ரோல் மற்றும் சாதாரண பெட்ரோல் ஆகிய இரண்டையும் தனித்தனியாக விற்பனை செய்ய வேண்டும் என்று 76 % பேர் வலியுறுத்தி உள்ளனர்.
எத்தனால் பெட்ரோலின் விலை சாதாரண பெட்ரோலை விடக் குறைவாக இருக்க வேண்டும் என்று பெரும்பாலானோர் கருத்து தெரிவித்துள்ளனர். இ 20 எரிபொருளைக் கட்டாயமாக்குவது பழைய வாகனங்களை வைத்திருப்பவர்களுக்கு இழைக்கப்படும் அநீதி என்று 56.3 % பேர் (இதில் 49.2 % என்டிஏ வாக்காளர்கள்) கருதுகின்றனர். இ20 பெட்ரோல் காரணமாக நாட்டின் எரிபொருள் இறக்குமதி செலவு குறைந்து, எரிசக்தி பாதுகாப்பு அதிகரிக்கும் என 43 % பாஜக வாக்காளர்கள் தெரிவித்துள்ளனர்.
