இந்தியாவில் மருத்துவப் படிப்புகளுக்கான நுழைவுத் தேர்வாகக் கருதப்படும் NEET (தேசிய தகுதி மற்றும் நுழைவுத் தேர்வு) நாடு முழுவதும் கடந்த மே மாதம் 3-ம் தேதி நடைபெற்றது. லட்சக்கணக்கான மாணவர்கள் மருத்துவராகும் கனவுடன் இந்தத் தேர்வை எதிர்கொண்ட நிலையில், தற்போது ஒட்டுமொத்தத் தேர்வையும் ரத்து செய்வதாகத் தேசிய தேர்வு முகமை (NTA) அதிரடி அறிவிப்பை வெளியிட்டுள்ளது. இந்த அறிவிப்பு மருத்துவக் கனவில் இருந்த மாணவர்கள் மற்றும் அவர்களது பெற்றோர்கள் மத்தியில் மிகப்பெரிய இடியாய் இறங்கியுள்ளது.
இந்தத் தேர்வு ரத்து செய்யப்படுவதற்குக் காரணமாக ராஜஸ்தான் மாநிலத்தில் நிகழ்ந்த வினாத்தாள் கசிவு விவகாரம் சுட்டிக்காட்டப்படுகிறது. மே 3-ம் தேதி தேர்வு நடைபெற்றுக் கொண்டிருந்த போதே, ராஜஸ்தானின் சில பகுதிகளில் வினாத்தாள் சமூக வலைதளங்களில் கசிந்ததாகப் புகார்கள் எழுந்தன. தொடக்கத்தில் இதனை மறுத்து வந்த தேசிய தேர்வு முகமை, பின்னர் நடந்த விரிவான விசாரணையில் வினாத்தாள் கசிந்தது உண்மைதான் என்பதைக் கண்டறிந்தது. இதன் பின்னணியில் மிகப்பெரிய மாஃபியா கும்பல் இருக்கலாம் என்ற கோணத்தில் விசாரணை முடுக்கிவிடப்பட்டுள்ளது. NEET தேர்வின் நம்பகத்தன்மை கேள்விக்குறியான நிலையில், நேர்மையாகத் தேர்வு எழுதிய மாணவர்களுக்குப் பாதிப்பு ஏற்படக்கூடாது என்பதற்காக இந்த ரத்து நடவடிக்கை எடுக்கப்பட்டுள்ளது.
மத்திய கல்வி அமைச்சகம் இது தொடர்பாகத் தேசிய தேர்வு முகமையுடன் அவசர ஆலோசனை நடத்தியது. அதன் பின்னரே, நாடு முழுவதும் நடத்தப்பட்ட அனைத்து NEET தேர்வுகளையும் செல்லாது என அறிவித்து அதிகாரப்பூர்வச் செய்திக்குறிப்பு வெளியிடப்பட்டது. இந்த முறைகேட்டில் ஈடுபட்டவர்கள் யாராக இருந்தாலும் அவர்கள் மீது கடும் நடவடிக்கை எடுக்கப்படும் என மத்திய அரசு எச்சரித்துள்ளது. குறிப்பாக, ராஜஸ்தானில் உள்ள சில தேர்வு மையங்களில் இருந்த கண்காணிப்பாளர்கள் மற்றும் ஊழியர்களுக்கும் இதில் தொடர்பு இருக்கலாம் எனச் சந்தேகிக்கப்படுகிறது.
தற்போது ரத்து செய்யப்பட்டுள்ள NEET தேர்வுக்கான மாற்றுத் தேதி அல்லது மறுதேர்வு எப்போது நடைபெறும் என்பது குறித்து இதுவரை எந்த அறிவிப்பும் வெளியாகவில்லை. “மறுதேர்வுக்கான தேதிகள் விரைவில் அதிகாரப்பூர்வ இணையதளத்தில் அறிவிக்கப்படும். மாணவர்கள் அதுவரை பொறுமை காக்க வேண்டும்” என என்.டி.ஏ கேட்டுக்கொண்டுள்ளது. இதனால் ஏற்கனவே ஒரு வருடம் கடினமாக உழைத்துப் படித்த மாணவர்கள், மீண்டும் அதே மன அழுத்தத்துடன் தேர்வுக்குத் தயாராக வேண்டிய சூழலுக்குத் தள்ளப்பட்டுள்ளனர்.
