ஆந்திரப் பிரதேச மாநிலத்தின் தலைநகர் விவகாரத்தில் நிலவி வந்த நீண்டகால இழுபறிக்கு முற்றுப்புள்ளி வைக்கும் வகையில், அமராவதி நகரை ஆந்திராவின் ஒரே மற்றும் நிரந்தரத் தலைநகராக அறிவித்து ஒன்றிய அரசு இன்று (ஏப்ரல் 7, 2026) அதிகாரப்பூர்வ அரசிதழ் (Gazette Notification) வெளியிட்டுள்ளது.
சட்டப்பூர்வ அங்கீகாரம் (Amaravati Official Capital Gazette 2026):
- நாடாளுமன்ற ஒப்புதல்: கடந்த வாரம் நாடாளுமன்றத்தின் இரு அவைகளிலும் (லோக் சபா – ஏப்ரல் 1, ராஜ்ய சபா – ஏப்ரல் 2) ‘ஆந்திரப் பிரதேச மறுசீரமைப்பு (திருத்தச்) சட்டம் 2026’ நிறைவேற்றப்பட்டது.
- குடியரசுத் தலைவர் ஒப்புதல்: இந்த மசோதாவிற்கு குடியரசுத் தலைவர் திரௌபதி முர்மு நேற்று (ஏப்ரல் 6) தனது ஒப்புதலை வழங்கினார். இதனைத் தொடர்ந்து, ஒன்றிய சட்ட அமைச்சகம் இன்று அரசிதழை வெளியிட்டுள்ளது.
- சட்டத் திருத்தம்: 2014-ம் ஆண்டின் ஆந்திர மறுசீரமைப்புச் சட்டத்தின் பிரிவு 5-ல் திருத்தம் செய்யப்பட்டு, “ஆந்திராவிற்கு புதிய தலைநகரம் உருவாக்கப்படும்” என்ற வாசகத்திற்குப் பதிலாக, “அமராவதி ஆந்திராவின் புதிய தலைநகராக இருக்கும்” என மாற்றப்பட்டுள்ளது.
முக்கிய மாற்றங்கள்:
இந்த அரசிதழ் வெளியீட்டின் மூலம், கடந்த காலங்களில் பேசப்பட்ட ‘மூன்று தலைநகரங்கள்’ (விசாகப்பட்டினம், கர்னூல், அமராவதி) என்ற திட்டம் அதிகாரப்பூர்வமாகக் கைவிடப்பட்டுள்ளது. இனி அமராவதி மட்டுமே ஆந்திராவின் நிர்வாக, சட்டமன்ற மற்றும் நீதித்துறைத் தலைநகராகச் செயல்படும். இந்தச் சட்டம் ஜூன் 2, 2024 முதல் முன் தேதியிட்டு அமலுக்கு வருவதாக அறிவிக்கப்பட்டுள்ளது.
முதலமைச்சர் சந்திரபாபு நாயுடு மகிழ்ச்சி:
இது குறித்துக் கருத்துத் தெரிவித்துள்ள ஆந்திர முதல்வர் சந்திரபாபு நாயுடு, “இது ஆந்திர மக்களின் நீண்டகாலக் கனவு மற்றும் தியாகத்திற்குக் கிடைத்த வெற்றி. அமராவதி இனி வெறும் நகரம் மட்டுமல்ல, தெலுங்கு மக்களின் அடையாளமாகவும் சுயமரியாதையாகவும் திகழும்” எனக் குறிப்பிட்டுள்ளார்.
