தமிழகத்தில் Tamil Nadu Election 2026-க்கான தேர்தல் தேதி அறிவிக்கப்பட்டு, நடத்தை விதிகள் அமலுக்கு வந்த அடுத்த 12 மணி நேரத்திற்குள் அதிரடி நடவடிக்கைகள் தொடங்கப்பட்டுள்ளன. இது குறித்துச் செய்தியாளர்களைச் சந்தித்த தமிழகத் தலைமைத் தேர்தல் அதிகாரி அர்ச்சனா பட்நாயக், மாநிலம் முழுவதும் நடத்தப்பட்ட சோதனைகளில் இதுவரை ரூ.1.2 கோடி மதிப்பிலான கணக்கில் வராத ரொக்கப் பணம் மற்றும் பொருட்கள் பறிமுதல் செய்யப்பட்டுள்ளதாகத் தெரிவித்தார்.
தேர்தல் நேர்மையாக நடைபெறுவதை உறுதி செய்ய 2,106 பறக்கும் படைகள் அமைக்கப்பட்டுள்ள நிலையில், அவை மாநிலத்தின் அனைத்துப் பகுதிகளிலும் தீவிரக் கண்காணிப்பில் ஈடுபட்டு வருகின்றன. “தேர்தல் அறிவிக்கப்பட்ட 12 மணி நேரத்திலேயே இவ்வளவு பெரிய தொகை சிக்கியுள்ளது, வரும் நாட்களில் கண்காணிப்பு இன்னும் தீவிரப்படுத்தப்படும்” என அவர் குறிப்பிட்டார்.
வேட்புமனுத் தாக்கல் விவரங்கள்: தமிழகச் சட்டமன்றத் தேர்தலுக்கான வேட்புமனுத் தாக்கல் மார்ச் 30-ஆம் தேதி தொடங்குகிறது. ஏப்ரல் 6-ஆம் தேதி மனுத் தாக்கல் செய்யக் கடைசி நாளாகும். ஆனால், இடைப்பட்ட நாட்களில் மார்ச் 31, ஏப்ரல் 3, 4 மற்றும் 5 ஆகிய தேதிகள் அரசு விடுமுறை என்பதால், அந்த நாட்களில் மனுக்களைத் தாக்கல் செய்ய முடியாது. மனுக்கள் மீதான பரிசீலனை ஏப்ரல் 7-ஆம் தேதி நடைபெறும் என்றும், வேட்புமனுக்களைத் திரும்பப் பெற ஏப்ரல் 9 கடைசி நாள் என்றும் அர்ச்சனா பட்நாயக் விளக்கினார்.
ஏப்ரல் 23-ஆம் தேதி ஒரே கட்டமாக வாக்குப்பதிவு நடைபெற்று, மே 4-ஆம் தேதி வாக்குகள் எண்ணப்படும். வேட்புமனுத் தாக்கலின் போது வேட்பாளருடன் இரண்டு வாகனங்கள் மட்டுமே அனுமதிக்கப்படும் என்றும், தேர்தல் ஆணையத்தின் விதிமுறைகளை மீறுவோர் மீது கடும் நடவடிக்கை எடுக்கப்படும் என்றும் அவர் எச்சரித்துள்ளார். சி-விஜில் (C-Vigil) செயலி மூலம் பொதுமக்கள் புகார்களைப் பதிவு செய்யலாம் என்றும், புகார் அளித்த 100 நிமிடங்களில் அதிகாரிகள் நடவடிக்கை எடுப்பார்கள் என்றும் அவர் உறுதி அளித்தார்.
