சென்னை கே.கே. நகரில் உள்ள மீனாட்சி பொறியியல் கல்லூரியில், கல்லூரி வளாகங்களில் போதைப்பொருள் மற்றும் புகையிலை பயன்பாட்டைத் தடுக்க, போதைப்பொருள் தடுப்பு மன்றங்கள் மற்றும் தன்னார்வலர்களுக்கான சிறப்புப் பயிற்சிப் பட்டறை நேற்று நடைபெற்றது.
தமிழக போதைப் பொருள் தடுப்பு பிரிவு கூடுதல் டிஜிபி கே.சங்கர் தலைமை தாங்கினார். கல்வி நிறுவனங்களில் போதைப்பொருள் பயன்பாட்டை முற்றிலும் ஒழிப்பதில் கல்லூரி முதல்வர்கள், பேராசிரியர்கள், தன்னார்வல மாணவர்களுக்கு முக்கியப் பங்கு இருப்பதாகவும், மாணவர்கள் போதைப் பொருள் வலையில் சிக்கி எதிர்காலத்தை தொலைக்க வேண்டாம் என வலிவுறுத்தினார்.
போதைப் பொருளை தடுப்பதில் போதைப்பொருள் தடுப்பு மன்றங்களின் கடமைகள், பொறுப்புகள், செயல்பாடுகள் குறித்து மாணவர்களுக்கு விரிவான பயிற்சி அளிக்கப்பட்டது. நிகழ்ச்சியில் 30 கல்லூரிகளின் முதல்வர்கள் மற்றும் 300-க்கும் மேற்பட்ட மாணவர் தன்னார்வலர்கள் பங்கேற்றனர்.
கல்வி வளாகங்களில் போதைப்பொருள் பயன்பாட்டைத் தடுக்கவும், விழிப்புணர்வை ஏற்படுத்தவும் அவர்கள் உறுதிமொழி ஏற்றனர். புதிதாகக் கல்லூரியில் சேரும் மாணவர்களுக்கு போதைப்பொருட்களால் ஏற்படும் பாதிப்புகள், போதைப்பொருள் தடுப்புச் சட்டத்தின் கீழான தண்டனைகள், ஆலோசனை பெறும் வழிமுறைகள் குறித்து விழிப்புணர்வு ஏற்படுத்த முடிவு செய்யப்பட்டது.
மாணவர்களிடையே ஆரம்ப நிலையிலேயே போதைப்பழக்க அறிகுறிகளைக் கண்டறிந்து, அவர்களுக்கு உரிய உதவிகளை வழங்க சக மாணவர் தூதர்கள் நியமிக்கப்பட உள்ளனர்.
More Read
மேலும், கல்லூரிகளைச் சுற்றியுள்ள 100 மீட்டர் பகுதியில் புகையிலைப் பொருட்கள் விற்பனையைத் தடுக்க காவல்துறை, உணவுப் பாதுகாப்புத் துறையினர் மூலம் கண்காணிப்பு மேற்கொள்ளவும் திட்டமிடப்பட்டுள்ளது.
கல்லூரி வளாகங்களில் கண்காணிப்பு கேமராக்கள் பொருத்துதல், ‘போதைப்பொருளற்ற தமிழ்நாடு’ செயலி மூலம் புகார்களைத் தெரிவித்தல், விழிப்புணர்வு பேரணிகள், தெருநாடகங்கள் மற்றும் உளவியல் ஆலோசனை நடவடிக்கைகளை மேற்கொள்ளுதல் குறித்தும் பயிற்சி அளிக்கப்பட்டது.
கல்வி நிறுவனங்களில் போதைப்பொருள் பயன்பாட்டைத் தடுத்து, மாணவர்களுக்கு பாதுகாப்பான கல்விச் சூழலை உருவாக்குவதே இத்திட்டத்தின் முக்கிய நோக்கம் என்று அதிகாரிகள் தெரிவித்தனர்.
