மயிலாடுதுறை மதுவிலக்கு துணை காவல் கண்காணிப்பாளர் (டிஎஸ்பி) சுந்தரேசன் மீது உயர் அதிகாரிகளை அவதூறாக பேசியதாக எழுந்த புகாரையடுத்து, அவரை சஸ்பெண்ட் செய்ய ஐஜி-க்கு டிஐஜி பரிந்துரை செய்துள்ளதாக அதிர்ச்சி தகவல்கள் வெளியாகியுள்ளன. இந்த சம்பவம் காவல்துறை வட்டாரத்தில் பெரும் பரபரப்பை ஏற்படுத்தியுள்ளது.
சமீபத்தில், டிஎஸ்பி சுந்தரேசன் செய்தியாளர்களைச் சந்தித்து, தனது வாகனத்தை மயிலாடுதுறை எஸ்.பி. அலுவலகத்தினர் எடுத்துக்கொண்டதாக பகிரங்க குற்றச்சாட்டை முன்வைத்தார். இது காவல்துறை வட்டாரத்தில் பெரும் சர்ச்சையை கிளப்பியது. இந்த குற்றச்சாட்டுகள் குறித்து தஞ்சை மண்டல டிஐஜி ஜியாவுல் ஹக் விசாரணை மேற்கொண்டார். இந்த விசாரணையில், மயிலாடுதுறை எஸ்.பி. ஸ்டாலின் உள்ளிட்ட 9 பேரிடம் வாக்குமூலம் பெறப்பட்டது. விசாரணையின் முடிவில், டிஐஜி சமர்ப்பித்த அறிக்கையில், டிஎஸ்பி சுந்தரேசன் காவல்துறையில் குழப்பத்தை ஏற்படுத்த முயற்சிப்பதாக குறிப்பிட்டிருப்பதாக தகவல் வெளியாகியுள்ளது. மேலும், உயர் அதிகாரிகளின் அனுமதி பெறாமலேயே செய்தியாளர்களை சந்தித்து, ஆதாரமற்ற அவதூறுகளைத் தெரிவித்ததாகவும் அந்த அறிக்கையில் சுட்டிக்காட்டப்பட்டுள்ளதாக கூறப்படுகிறது.
இந்த பரிந்துரை அறிக்கையின் அடிப்படையில், டிஎஸ்பி சுந்தரேசனை தற்காலிக பணி நீக்கம் (சஸ்பெண்ட்) செய்ய ஐஜி-க்கு டிஐஜி பரிந்துரை செய்திருப்பதாக தகவல்கள் வெளியாகியுள்ளன. இது குறித்த அதிகாரப்பூர்வ அறிவிப்பு விரைவில் வெளியாகலாம் என எதிர்பார்க்கப்படுகிறது.
டிஎஸ்பி சுந்தரேசனின் சர்ச்சைக்குரிய கடந்தகாலம்:
டிஎஸ்பி சுந்தரேசன் மீது துறை ரீதியான நடவடிக்கைகள் எடுக்கப்பட்ட பல சம்பவங்கள் அவரது கடந்தகால பணிக்காலத்தில் நிகழ்ந்திருப்பது தற்போது வெளிச்சத்திற்கு வந்துள்ளது. இவை, அவர் மீது தற்போது எடுக்கப்பட்டு வரும் நடவடிக்கைகளுக்கு கூடுதல் வலு சேர்க்கின்றன.
More Read
- 2005-2006: நந்தம்பாக்கம் காவல்நிலையத்தில் பணியாற்றிய போது, வழக்கு கோப்புகளை முறையற்ற நிலையில் வைத்திருந்ததற்காக அவருக்கு 3 ஆண்டுகளுக்கு ஊதிய உயர்வு நிறுத்தி வைக்கப்பட்டது.
- வள்ளியூர் காவல்நிலையம்: வள்ளியூரில் பணியாற்றிய போது, வழக்கு விவரங்களை மறைத்து பாஸ்போர்ட் வழங்க பரிந்துரை செய்ததால், ‘Censure’ எனப்படும் கண்டிக்கத்தக்க தண்டனை அவருக்கு வழங்கப்பட்டது.
- 2008: ஜே2 துரைப்பாக்கம் காவல்நிலையத்தில் பணியாற்றிய போது, திருட்டு சிடி விற்பனையாளரிடம் பலமுறை ரூ.40,000 கையூட்டு பெற்றதாகவும், டாஸ்மாக் மேலாளர்கள் இருவரிடம் மாதந்தோறும் ரூ.3,000 கையூட்டு பெற்றதாகவும் குற்றம்சாட்டப்பட்டது. இந்தக் குற்றம் நிரூபிக்கப்பட்டு, ஒரு வருடத்திற்கு அவரது ஊதிய உயர்வு நிறுத்தி வைக்கப்பட்டது.
- அதே 2008 ஆம் ஆண்டு: ஜே2 காவல்நிலையத்திற்கு புகார் அளிக்க வந்த பெண்ணுடன், தவறான உறவில் இருந்தது கண்டறியப்பட்டதால், 2 வருடத்திற்கு சுந்தரேசனின் ஊதிய உயர்வு நிறுத்தி வைக்கப்பட்டது.
இந்த தொடர்ச்சியான துறை ரீதியான நடவடிக்கைகளுக்கு உள்ளான ஒருவர், தற்போது உயர் அதிகாரிகள் மீது பகிரங்க குற்றச்சாட்டுகளை முன்வைத்திருப்பது காவல்துறை வட்டாரத்தில் பெரும் விவாதத்தை கிளப்பியுள்ளது. இந்த விவகாரம் காவல்துறை வட்டாரத்தில் மேலும் பல புதிய தகவல்களை வெளிக்கொண்டு வரும் என எதிர்பார்க்கப்படுகிறது.
