சென்னை, ரிப்பன் மாளிகை முன்பு தொடர்ந்து போராட்டத்தில் ஈடுபட்டு வந்த தூய்மைப் பணியாளர்கள் மீது சட்டப்படி நடவடிக்கை எடுக்க சென்னை உயர் நீதிமன்றம் உத்தரவிட்டுள்ளது. பொதுமக்களுக்கு இடையூறு ஏற்படுவதாகத் தொடரப்பட்ட வழக்கில், தலைமை நீதிபதி இந்தப் பரபரப்பான உத்தரவைப் பிறப்பித்துள்ளார்.
ரிப்பன் மாளிகை முன்பு தூய்மைப் பணியாளர்கள் தங்கள் கோரிக்கைகளை வலியுறுத்தி தொடர் போராட்டங்களில் ஈடுபட்டு வருகின்றனர். இதனால் அப்பகுதியில் போக்குவரத்து பாதிப்பு ஏற்படுவதாகவும், பொதுமக்களுக்கு இடையூறுகள் விளைவதாகவும் கூறி தேன்மொழி என்பவர் சென்னை உயர் நீதிமன்றத்தில் வழக்கு ஒன்றைத் தொடர்ந்தார். இந்த வழக்கு இன்று தலைமை நீதிபதி அமர்வில் விசாரணைக்கு வந்தது.
உயர்நீதிமன்றத்தின் முக்கிய கருத்துக்கள்
வழக்கின் விசாரணையின்போது, போராட்டங்கள் குறித்து தலைமை நீதிபதி சில முக்கிய கருத்துக்களைத் தெரிவித்தார். அவர், “நடைப்பாதைகள் மற்றும் சாலைகளை ஆக்கிரமித்து போராட்டம் நடத்த எந்த வகையிலும் அனுமதி இல்லை. போராட்டம் என்பது தனிப்பட்ட உரிமையாக இருக்கலாம், ஆனால் அது மற்றவர்களின் அன்றாட வாழ்க்கைக்குத் தடையாக இருக்கக்கூடாது. எனவே, அனுமதிக்கப்படாத இடங்களில் போராட்டங்கள் நடத்த நீதிமன்றம் அனுமதிக்காது” என்று திட்டவட்டமாகத் தெரிவித்தார்.
மேலும், சென்னையில் போராட்டங்கள் நடத்துவதற்காக பிரத்யேகமாக ஒதுக்கப்பட்ட இடங்களில் மட்டும் போராட்டத்தை நடத்திக் கொள்ளலாம் என்றும் நீதிபதி அறிவுறுத்தினார். இந்த உத்தரவு, எதிர்காலத்தில் நகரப் போராட்டங்களுக்கு ஒரு முன்னுதாரணமாக அமையும் என எதிர்பார்க்கப்படுகிறது.
காவல் துறைக்கு பிறப்பிக்கப்பட்ட உத்தரவு
இந்த வழக்கில், தொடர்ந்து போராட்டத்தில் ஈடுபட்டு வரும் தூய்மைப் பணியாளர்கள் மீது சட்டத்திற்கு உட்பட்டு உரிய நடவடிக்கை எடுக்க வேண்டும் என சென்னை உயர்நீதிமன்றம் காவல்துறைக்கு உத்தரவிட்டுள்ளது. இது, போராட்டத்தில் ஈடுபட்டுள்ள தூய்மைப் பணியாளர்கள் மத்தியில் பெரும் கலக்கத்தை ஏற்படுத்தியுள்ளது.
More Read
முன்னதாக, இந்தப் பிரச்னைக்கு இன்னும் இரண்டு நாட்களில் தீர்வு காணப்படும் என்பதால், வழக்கின் விசாரணையை செவ்வாய்கிழமைக்குத் தள்ளிவைக்க வேண்டும் என்று கோரிக்கை விடுக்கப்பட்டது. ஆனால், அந்தக் கோரிக்கையை நீதிபதிகள் ஏற்க மறுத்து, உடனடியாக இந்த உத்தரவைப் பிறப்பித்தது குறிப்பிடத்தக்கது.
