திருச்சியில் பள்ளிக் கல்வித்துறை அமைச்சர் அன்பில் மகேஷ் பொய்யாமொழி அவர்கள் இன்று (நவம்பர் 20, 2025) அளித்த பேட்டி, தமிழகக் கல்லூரி மாணவர்கள் மத்தியில் பெரும் எதிர்பார்ப்பை ஏற்படுத்தியுள்ளது. துணை முதலமைச்சர் உதயநிதி ஸ்டாலினின் அறிவிப்பை மேற்கோள் காட்டி, “20 லட்சம் மடிக்கணினிகள் கொள்முதல் செய்யப்பட்டு, மிக விரைவில் மாணவர்களுக்கு வழங்கப்படும்” என்று அவர் உறுதிபடத் தெரிவித்துள்ளார்.
திருச்சி பொன்மலைப்பட்டி பகுதியில் உள்ள புனித வளனார் பெண்கள் மேல்நிலைப் பள்ளியில் விலையில்லா மிதிவண்டிகள் வழங்கும் விழா நடைபெற்றது. இதில் கலந்துகொண்டு மாணவ, மாணவிகளுக்கு மிதிவண்டிகளை வழங்கிய பின்னர், அமைச்சர் அன்பில் மகேஷ் பொய்யாமொழி செய்தியாளர்களைச் சந்தித்தார்.
அப்போது அவரிடம் ராமேஸ்வரம் பள்ளி மாணவி கொலை சம்பவம் குறித்து கேள்வி எழுப்பப்பட்டது. அதற்குப் பதிலளித்த அமைச்சர், “பன்னிரண்டாம் வகுப்பு மாணவி கொலை செய்யப்பட்ட சம்பவம் மிகவும்கண்டிக்கத்தக்கது. படிக்க வந்த மாணவிக்கு நேர்ந்துள்ள இக்கொடுமை, பெற்றோர் மனநிலையில் இருந்து பார்க்கும்போது மிகுந்த வேதனையைத் தருகிறது. சொந்த காரணங்களுக்காக இந்த கொலை நடந்திருந்தாலும், இது கண்டிப்பாகத் தவிர்க்க முடியாத ஒரு கொடூரச் செயல்” என்று ஆழமான வருத்தத்தைப் பதிவு செய்தார்.
20 லட்சம் லேப்டாப்கள் விநியோகம் விரைவில்
மடிக்கணினி வழங்குவது குறித்துக் கேட்கப்பட்ட கேள்விக்கு அமைச்சர் அளித்த பதில், மாணவர்கள் மற்றும் பெற்றோர்களுக்கு ஒரு ‘குட் நியூஸ்’ஸாக அமைந்துள்ளது. “சுமார் 20 லட்சம் மடிக்கணினிகள் கொள்முதல் செய்யப்பட்டு, மிக விரைவாக மாணவர்களுக்கு வழங்கப்படும் எனத் துணை முதல்வர் உதயநிதி ஸ்டாலின் தெரிவித்துள்ளார். அதற்கான பணிகள் தீவிரமாக நடைபெற்று வருகின்றன” என்று அமைச்சர் அன்பில் மகேஷ் கூறியுள்ளார்.
More Read
கடந்த அதிமுக ஆட்சிக் காலத்தில் தொடங்கப்பட்டு, கரோனா பரவல் காரணமாக முடங்கிய இத்திட்டம், தற்போது திமுக அரசால் மீண்டும் நடைமுறைப்படுத்தப்படுகிறது. நடப்பு 2025-26 நிதியாண்டில், 20 லட்சம் மாணவர்களுக்கு லேப்டாப் அல்லது டேப்லெட் வழங்க ரூ.2,000 கோடி நிதி ஒதுக்கப்பட்டதாக தமிழக நிதி அமைச்சர் தங்கம் தென்னரசு கடந்த மே மாதம் சட்டசபையில் அறிவித்திருந்தார். அதன் தொடர்ச்சியாக, கல்லூரி மாணவர்களுக்கு விரைவில் லேப்டாப் வழங்கப்படும் என முதலமைச்சர் மு.க. ஸ்டாலினும் சமீபத்தில் அறிவித்திருந்தார்.
அரசு மற்றும் அரசு உதவி பெறும் கல்லூரிகளில் படிக்கும் சுமார் 20 லட்சம் மாணவர்களுக்கு மடிக்கணினிகள் வழங்குவதற்கான சர்வதேச டெண்டர் நடைமுறைகளை தமிழக அரசின் எல்காட் நிறுவனம் முடித்துள்ளது. டெல் மற்றும் ஏசர் போன்ற முன்னணி நிறுவனங்கள் இதில் பங்கேற்றுள்ளன. சுமார் ரூ.2,000 கோடி நிதி ஒதுக்கீட்டில் கொள்முதல் செய்யப்பட்ட முதல் கட்ட லேப்டாப்கள் தமிழகம் வந்துள்ளதாகவும், மீதமுள்ளவை விரைவில் வந்து சேரும் என்றும் தகவல்கள் தெரிவிக்கின்றன.
பிப்ரவரிக்குள் விநியோகத் திட்டம்
More Read
விரைவில் வரவிருக்கும் தேர்தல் நடத்தை விதிகள் அமலுக்கு வரும் முன்னரே, கல்லூரி மாணவர்களுக்கு இந்த லேப்டாப்களை விநியோகிக்க தமிழக அரசு திட்டமிட்டுள்ளதாக நம்பத்தகுந்த வட்டாரங்கள் தெரிவிக்கின்றன. இதன் அடிப்படையில், பிப்ரவரி மாதத்திற்குள் மாணவர்களுக்கு மடிக்கணினிகள் விநியோகிக்கப்படும் எனத் தெரிகிறது.
மாணவர்களின் உயர் கல்வி மற்றும் தொழில்சார்ந்த அறிவு மேம்பாட்டிற்கு இந்த இலவச மடிக்கணினிகள் பெரிதும் உதவியாக இருக்கும் என்று எதிர்பார்க்கப்படுகிறது.
போதைப்பொருள் தடுப்பு மற்றும் அரசின் இலக்கு
மேலும், பள்ளியைச் சுற்றியுள்ள பகுதிகளில் போதைப்பொருள் நடமாட்டம் இருக்கக் கூடாது என்பதில் தமிழக அரசு உறுதியாக இருப்பதாகவும் அமைச்சர் அன்பில் மகேஷ் தெரிவித்தார். “குழந்தைகள் எந்த விதமான போதைப் பழக்கத்திற்கும் அடிமையாகக் கூடாது என்பதற்காக ‘மகிழ் முற்றம்’ என்ற திட்டத்தைக் கொண்டு வந்துள்ளோம்” என்றும் அவர் குறிப்பிட்டார்.
“தமிழகத்தை வளர்ச்சிப் பாதையில் கொண்டு செல்ல நாங்கள் உறுதியுடன் செயல்பட்டு வருகிறோம். இரட்டை இலக்கு வளர்ச்சியை அடைந்த மாநிலம் தமிழ்நாடு. ஆனால், சிலர் இந்த வளர்ச்சியையும் தடுக்கிறார்கள்” என்றும் அமைச்சர் தனது உரையில் அழுத்தமாகப் பதிவு செய்தார். கல்வி மற்றும் சமூகப் பாதுகாப்பில் தமிழக அரசின் முயற்சிகள் தொடரும் என்பதையே அமைச்சர் அன்பில் மகேஷ் பொய்யாமொழியின் இந்த அறிவிப்புகள் மற்றும் கருத்துகள் உணர்த்துகின்றன.
