இந்தியா – இங்கிலாந்து அணிகள் இடையிலான 2-வது ஒருநாள் கிரிக்கெட் போட்டி கார்டிஃப் மைதானத்தில் இன்று மாலை 5.30 மணிக்கு நடைபெறுகிறது.
இரு அணிகள் இடையிலான 3 ஆட்டங்கள் கொண்ட ஒருநாள் கிரிக்கெட் போட்டித் தொடரில் பர்மிங்காமில் நேற்று முன்தினம் நடைபெற்ற முதல் ஒருநாள் போட்டியில் இந்திய அணி 6 விக்கெட்கள் வித்தியாசத்தில் வெற்றி பெற்றது. 259 ரன்கள் இலக்கை துரத்திய இந்திய அணி 45.2 ஓவர்களில் 4 விக்கெட்களை மட்டும் இழந்து வெற்றி பெற்றது.
கேப்டன் ஷுப்மன் கில் 75 பந்துகளில், ஒரு சிக்ஸர், 11பவுண்டரிகளுடன் 80 ரன்களும் வாஷிங்டன் சுந்தர் 63 பந்துகளில், 52 ரன்களும் அக்சர் படேல் 52 பந்துகளில் 57 ரன்களும், ஸ்ரேயஸ் ஐயர் 35 ரன்களும் சேர்த்து அணியின் வெற்றியில் முக்கிய பங்குவகித்தனர். சீனியர் நட்சத்திரங்களான ரோஹித் சர்மா 11, விராட் கோலி 5 ரன்களில் ஆட்டமிழந்து ஏமாற்றம் அளித்தனர்.
தொடரில் இந்திய அணி 1-0 என முன்னிலை வகிக்கும் நிலையில் இரு அணிகளும் 2-வது ஒருநாள் போட்டியில் இன்று மோதுகின்றன. இந்நிலையில் முதல் போட்டியில் தசைபிடிப்பு காரணமாக களத்தில் இருந்து வெளியேறிய ஷுப்மன் கில் இன்று களமிறங்குவாரா? என்பது சந்தேகமாகி உள்ளது.
இன்றைய ஆட்டத்தில் வெற்றி பெறும் பட்சத்தில் இந்திய அணி தொடரை கைப்பற்றும். இதனால் ரோஹித் சர்மா, விராட் கோலி ஆகியோர் உயர்மட்ட செயல் திறனை வெளிப்படுத்துவதில் கவனம் செலுத்தக்கூடும். கடந்த ஆட்டத்தில் 106 ரன்களுக்கு 4 முக்கிய விக்கெட்களை இழந்த போதிலும் வாஷிங்டன் சுந்தர், அக்சர் படேல் ஜோடி அற்புதமாக விளையாடி அணியை வெற்றிப் பாதைக்கு அழைத்துச் சென்றிருந்தனர். இவர்களிடம் இருந்து மீண்டும் ஒரு சிறந்த பங்களிப்பு வெளிப்படக்கூடும்.
இங்கிலாந்து அணி கடந்த 2025-ம் ஆண்டு முதல் விளையாடிய 19 ஒருநாள் போட்டிகளில் 13-ல் தோல்வி அடைந்துள்ளது. இந்த தோல்விகளுக்கு முற்றுப்புள்ளி வைக்க, டாப்-ஆர்டர் பேட்ஸ்மேன்கள் சிறந்த பங்களிப்பை வழங்க முயற்சிக்கக்கூடும். கார்டிஃப் மைதானத்தில் இங்கிலாந்து அணி 17 ஆட்டங்களில் விளையாடி 10-ல் வெற்றி கண்டுள்ளது. இங்கு 3 ஆட்டங்களில் மட்டுமே இங்கிலாந்து அணி தோல்வி அடைந்துள்ளது. இது அந்த அணிக்கு சாதகமான விஷயமாக பார்க்கப்படுகிறது.
