தமிழ்நாட்டின் அரசியல் களத்தில் அடுத்தடுத்து நிகழும் கூட்டணி மாற்றங்களும், அரசியல் தலைவர்களின் அதிரடி அறிக்கைப் போர்களும் தொண்டர்களிடையேயும் பொதுமக்களிடையேயும் பெரும் அதிர்வலைகளை ஏற்படுத்தி வருகின்றன. இத்தகைய பரபரப்பான அரசியல் சூழலில், விடுதலைச் சிறுத்தைகள் கட்சியின் (விசிக) தலைவரும் சிதம்பரம் நாடாளுமன்ற உறுப்பினருமான திருமாவளவன், திமுக தலைமையிலான கூட்டணியில் இருந்து தங்களின் கட்சி விலகியதற்கான பின்னணி மற்றும் உண்மையான காரணங்களை மிக விரிவாகத் தெரிவித்துள்ளார். தருமபுரியில் நடைபெற்ற கட்சி தலைமை நிலையச் செயலாளர் தமிழ்ச்செல்வன் இல்லத் திருமண விழாவில் பங்கேற்றுப் பேசிய அவர், கூட்டணிக் கட்சிகளிடையே பரஸ்பர நல்லிணக்கத்தையும் மரியாதையையும் பேணிப் பாதுகாக்கும் கடமையில் திமுக தவறிவிட்டதாகக் பகிரங்கமாகக் குற்றம் சாட்டினார்.
அரசியலில் தற்காலிகத் தேர்தல் வெற்றிகளை விடக் கொள்கை ரீதியான நல்உறவும், தோழமைக் கட்சிகளிடையேயான பரஸ்பர நம்பிக்கையுமே மிக முதன்மையானது எனச் சுட்டிக்காட்டிய திருமாவளவன், ஆளும் கட்சியான திமுக தங்களை வலுக்கட்டாயமாகக் கைவிட்டதாலேயே இந்த முடிவை எடுக்க வேண்டிய கட்டாயம் ஏற்பட்டதாகத் தெளிவுபடுத்தினார். இந்த உரை தமிழக அரசியல் வட்டாரத்தில், குறிப்பாக வரும் 2026 சட்டமன்றத் தேர்தலை எதிர்நோக்கியுள்ள கூட்டணிக் கணக்குகளில் புதிய விவாதத்தையும் மிகப்பெரிய திருப்பத்தையும் தூண்டியுள்ளது.
ஒரு வலிமையான கூட்டணியை வழிநடத்தும் முதன்மை தலைமைக்கட்சிக்குத் தான், அதிலுள்ள அனைத்துக் கூட்டணிக் கட்சிகளையும் அரவணைத்துச் செல்ல வேண்டிய பொறுப்பும் தர்மமும் அதிகமாக உள்ளது என்று திருமாவளவன் தனது உரையில் ஆணித்தரமாக வலியுறுத்தினார். “ஒரு கூட்டணியில் இடம்பெற்றுள்ள சிறிய மற்றும் பெரிய கட்சிகளிடையே நல்லிணக்கத்தையும் பரஸ்பர நல்உறவையும் பேணிப் பாதுகாக்கும் கடமை, அந்தக் கூட்டணிக்குத் தலைமை தாங்கும் முதன்மைக் கட்சிக்குத் தான் முழுமையாக உள்ளது. ஆனால், துரதிர்ஷ்டவசமாக திமுக தலைமையிடம் அந்த நல்லிணக்க அணுகுமுறை சமீபகாலமாக முற்றிலுமாகக் கைவிடப்பட்டுவிட்டது” என அவர் சுட்டிக்காட்டினார்.
மேலும், திமுக கூட்டணியில் இருந்து பிற முன்னணி ஜனநாயக சக்திகளும் வெளியேறிய சம்பவங்களை விரிவாக நினைவுகூர்ந்து பேசிய திருமாவளவன், “காங்கிரஸ் கட்சிக்கும் திமுகவுக்கும் இடையே தொடர்ச்சியாகக் கசப்பான சூழல் உருவானது ஏன்? கடந்த 70 ஆண்டுகளாகத் தோழமையுடன் பயணித்த இந்திய யூனியன் முஸ்லிம் லீக் (IUML) மற்றும் இடதுசாரி இயக்கங்களான சிபிஐ, சிபிஎம் ஆகியவை கூட்டணியை விட்டு வெளியேற வேண்டிய நிர்பந்தம் ஏன் ஏற்பட்டது? மதிமுகவைக் கூடத் தனது சொந்த மறுமலர்ச்சி திராவிட முன்னேற்றக் கழகச் சின்னத்தில் போட்டியிட அனுமதிக்காமல், உதயசூரியன் சின்னத்தில் தான் போட்டியிட வேண்டும் என திமுக வற்புறுத்தியது ஏன்? மக்கள் நீதி மய்யம் தலைவர் கமலஹாசனுக்கு உரிய மதிப்பும் இடங்களும் ஒதுக்கப்படாதது ஏன்? இவற்றுக்கெல்லாம் திமுக தலைமையின் இறுக்கமான அணுகுமுறையே காரணம்” என்று அடுக்கடுக்கானக் கேள்விகளை முன்வைத்தார்.
திடீரெனக் கூட்டணிக் குள் வந்த தேமுதிகவிற்கு அதிக எண்ணிக்கையிலான தொகுதிகளை ஒதுக்கிவிட்டு, பல ஆண்டுகளாகக் கூடவே இருந்து உழைத்த தோழமைக் கட்சிகளுக்கு முன்னெப்போதும் இல்லாத வகையில் தொகுதிகளைக் குறைத்த திமுகவின் நிலைப்பாடு நியாயமற்றது என்றும், இந்த அதிரடி மாற்றங்கள் குறித்துப் பொதுவெளியில் யாரும் கேள்வி எழுப்புவதில்லை என்றும் அவர் வேதனையுடன் குறிப்பிட்டார்.
More Read
விடுதலைச் சிறுத்தைகள் கட்சி மீது தற்போதைய சூழலில் சுமத்தப்படும் துரோகப் பட்டங்கள் குறித்துப் பேசிய திருமாவளவன், தங்கள் இயக்கம் எப்போதுமே மதச்சார்பற்ற கொள்கைக்கே முதன்மை முன்னுரிமை அளித்து வந்துள்ளதை விளக்கும் வகையில் ஒரு முக்கிய வரலாற்று உண்மையைப் பகிர்ந்துகொண்டார். “கடந்த காலங்களில் எங்களது இயக்கத்தின் முக்கியப் பொறுப்பில் இருந்த ஆதவ் அர்ஜுனா, வரும் 2026 சட்டமன்றத் தேர்தலில் என்னை முதலமைச்சர் வேட்பாளராக முன்நிறுத்திப் பிரசாரம் மேற்கொள்ளலாம் என்ற ஆலோசனையை முன்வைத்தார்” என்றார்.
“அன்றைய சூழலில் அந்த முடிவை நான் ஏற்றிருந்தால், அதிமுக – பாஜக கூட்டணி மேலும் வலுவடைந்திருக்கும். ஆனால், மதச்சார்பற்ற கொள்கைக் கூட்டணி எந்தக் காரணத்தைக் கொண்டும் உடைந்துவிடக் கூடாது என்பதில் நான் உறுதியாக இருந்தேன். அதனால் தான் அந்தப் பெரிய வாய்ப்பை மறுத்து, திமுக கூட்டணிக்கு எவ்விதப் பாதிப்பும் வராதவாறு தியாகம் செய்தேன். அப்படிப்பட்ட எங்களை நோக்கி இன்று காழ்புணர்ச்சியோடும் வன்மத்தோடும் துரோகி பட்டம் கட்டுவது எந்த விதத்தில் நியாயம்?” என்று திருமாவளவன் உருக்கமாகக் கேள்வி எழுப்பினார்.
திமுக தங்களைக் கைவிட்ட பிறகு, புதிய அரசியல் பாதையைத் தேர்வு செய்ய வேண்டிய கட்டாயம் ஏற்பட்டதாகக் குறிப்பிட்ட திருமாவளவன், தமிழக வெற்றிக் கழகத்தின் (தவெக) தலைவர் விஜய் தலைமையிலான கூட்டணியில் இணைந்தது குறித்த தெளிவான விளக்கத்தையும் அளித்தார். “ஆரம்பத்தில் விஜய்யை ‘ஆர்.எஸ்.எஸ் பெற்ற பிள்ளை’ என்று நான் தீவிரமாக விமர்சித்தது உண்மை தான். ஆனால், அவர் அரசியல் களத்திற்கு வந்த பிறகு ஆட்சி அமைப்பதற்காக அதிமுக, பாஜக அல்லது பாமகவின் ஆதரவை நாடாமல், காங்கிரஸ் மற்றும் இடதுசாரி சிந்தனை கொண்ட ஜனநாயக சக்திகளைத் தன்னுடன் இணைத்துக் கொள்ள முன்வந்தார்” என சுட்டிக்காட்டினார்.
More Read
இதனால் விஜய் தலைமையிலான கூட்டணிக்குத் தங்களின் ஆதரவை வழங்க முடிவு செய்ததாகக் கூறிய திருமாவளவன், “தமிழக வெற்றிக் கழகத் தலைமையிலான இந்த புதிய கூட்டணிக்கு ‘மதச்சார்பற்ற சமூகநீதி வெற்றிக் கூட்டணி’ எனப் பெயரிடப்பட்டது. இதில் ‘மதச்சார்பற்ற’ என்ற மிக முக்கியமான கொள்கை வார்த்தையை இடம்பெறச் செய்ததே நான் தான். இந்தக் கூட்டணி வெறும் அதிகாரப் பகிர்வுக்காக அமைக்கப்பட்ட ஒன்று அல்ல; மாறாகத் தெளிவான கொள்கை மற்றும் கோட்பாடுகளின் அடிப்படையில் உருவான மக்கள் கூட்டணி” என்று பெருமையுடன் கூறினார்.
