தமிழக வெற்றிக் கழகம் (தவெக) சார்பில் அண்மையில் சென்னையில் நடைபெற்ற ஆர்ப்பாட்டத்தின்போது பொதுச் சொத்துகள் சேதமடைந்ததாகக் குற்றச்சாட்டு எழுந்தது. இந்தச் சூழலில், சேதமடைந்த பகுதிகளைத் தாங்களே சரிசெய்து தருவதாக சென்னை மாநகராட்சிக்கு தவெக கடிதம் அனுப்பியுள்ளது. இது ஒரு அரசியல் கட்சி பொறுப்புடன் நடந்துகொள்வதற்கு ஒரு புதிய முன்னுதாரணமாகப் பார்க்கப்படுகிறது.
கடந்த நான்கு ஆண்டுகளில் விசாரணையின்போது உயிரிழந்த 24 பேரின் மரணங்களுக்கு நீதி கேட்டும், திருப்புவனம் கோவில் காவலாளி அஜித்குமார் மரணத்திற்கு நீதி கேட்டும் தவெக சார்பில் சென்னை சிவானந்தா சாலையில் கண்டன ஆர்ப்பாட்டம் நடைபெற்றது. தவெக தலைவர் விஜய் தலைமையில் நடைபெற்ற இந்த ஆர்ப்பாட்டத்தில் ஆயிரக்கணக்கான தொண்டர்கள் மற்றும் பொதுமக்கள் கலந்துகொண்டனர். காவல் மரணங்களால் பாதிக்கப்பட்ட குடும்பத்தாரும் மேடையில் ஏற்றப்பட்டு, தங்கள் வேதனையைப் பகிர்ந்துகொண்டனர். கருப்பு உடையில் வந்த விஜய், ‘சாரி வேண்டாம்… நீதி வேண்டும்’ என்ற பதாகையை ஏந்தி நின்றிருந்தது அனைவரின் கவனத்தையும் ஈர்த்தது. முக்கிய நிர்வாகிகள் உரை நிகழ்த்திய பின்னர், கண்டன உரையை விஜய் நிகழ்த்தினார்.
இந்த ஆர்ப்பாட்டத்தில் சுமார் 12 ஆயிரத்திற்கும் மேற்பட்டோர் பங்கேற்றிருந்தனர். கூட்டத்தில், மேடையில் இருந்த விஜயைப் பார்ப்பதற்காக தவெக தொண்டர்கள் ஒருவர் மீது ஒருவர் முந்தி அடித்துக்கொண்டும், தடுப்புகள் மீதும் ஏறி நின்றதால் சிவானந்தா சாலையில் உள்ள சென்டர் மீடியனில் இருந்த தடுப்பு கம்பிகள் சில இடங்களில் சேதமடைந்தன. இதுதொடர்பான படங்கள் சமூக வலைத்தளங்களில் வைரலாகப் பரவின.
இந்த நிலையில், சேதமடைந்த பொதுச் சொத்துக்களை சரிசெய்ய தாங்களே அனுமதி கோரி சென்னை மாநகராட்சிக்கு தவெக சார்பில் கடிதம் அளிக்கப்பட்டுள்ளது. இதுதொடர்பாக, தவெக மாவட்டச் செயலாளரான அப்புனு என்கிற வேல்முருகன், சென்னை மாநகராட்சியின் ராயபுரம் மண்டல உதவி பொறியாளருக்குக் கடிதம் அனுப்பியுள்ளார். அந்தக் கடிதத்தில், “தமிழக வெற்றிக் கழகத்தின் சார்பாக நடைபெற்ற கண்டன ஆர்ப்பாட்டத்தின்போது, சிவானந்தா சாலையில் இருந்த தடுப்பு கம்பிகள் சில இடங்களில் சேதம் அடைந்துள்ளன. சில இடங்களில் தடுப்புக் கம்பிகள் சாய்ந்துள்ளன. தாங்கள் அனுமதி அளித்தால், இவற்றைத் தவெகவின் சார்பாக உடனடியாக சரிசெய்து தருகிறோம் என்பதைத் தெரிவித்துக் கொள்கிறேன்” என்று குறிப்பிடப்பட்டுள்ளது.
இந்தக் கடிதத்தின் அடிப்படையில், சென்னை மாநகராட்சி அதிகாரிகள் சிவானந்தா சாலையில் ஏற்பட்ட சேதங்களை ஆய்வு செய்து, உடைந்து கிடந்த தடுப்புக் கம்பிகளை அப்புறப்படுத்தியுள்ளனர். ஆர்ப்பாட்டத்திற்கு அனுமதி வழங்கியபோது, பொதுச் சொத்துக்கு எந்தவித பாதிப்பையும் ஏற்படுத்தக் கூடாது என்று காவல்துறை நிபந்தனை விதித்திருந்தது குறிப்பிடத்தக்கது. இந்த நிபந்தனை மீறப்பட்டதால், பொறுப்பேற்று தாங்களே சரிசெய்து தர முன்வந்துள்ள தவெகவின் இந்த நடவடிக்கை அரசியல் வட்டாரங்களில் வரவேற்பைப் பெற்றுள்ளது. பொதுச் சொத்துக்களைப் பாதுகாப்பதில் அரசியல் கட்சிகள் பொறுப்புடன் செயல்பட வேண்டும் என்ற எதிர்பார்ப்பை இது பூர்த்தி செய்கிறது.
