தமிழகத்தின் இரண்டாம் நிலை நகரங்களான மதுரை மற்றும் கோவையில் போக்குவரத்து நெரிசலைக் குறைக்கவும், உள்கட்டமைப்பை மேம்படுத்தவும் Metro ரயில் திட்டத்தைக் கொண்டு வருவதில் மாநில அரசு உறுதியாக உள்ளது. இன்று தாக்கல் செய்யப்பட்ட இடைக்கால பட்ஜெட்டில், நிதியமைச்சர் தங்கம் தென்னரசு இது குறித்து முக்கிய விளக்கங்களை அளித்தார். மதுரை மற்றும் கோவை ஆகிய இரு மாநகரங்களிலும் Metro ரயில் திட்டங்களைச் செயல்படுத்த விரிவான திட்ட அறிக்கைகள் (DPR) தயார் செய்யப்பட்டு மத்திய அரசின் ஒப்புதலுக்கு அனுப்பப்பட்டன.
இருப்பினும், இந்த நகரங்களில் மக்கள் தொகை 20 லட்சத்திற்கும் குறைவாக இருப்பதாகக் கூறி, ஒன்றிய அரசு இந்தத் திட்ட அறிக்கைகளைத் திருப்பி அனுப்பியுள்ளது. இது குறித்துப் பேசிய அமைச்சர், இதே போன்ற மக்கள் தொகை கொண்ட பிற மாநில நகரங்களுக்கு மத்திய அரசு ஒப்புதல் அளித்துள்ளதைச் சுட்டிக்காட்டினார். எனவே, பாரபட்சமின்றி மதுரை மற்றும் கோவை Metro திட்டங்களை மறுபரிசீலனை செய்து ஒப்புதல் வழங்க வேண்டும் என்று மத்திய அரசைத் தமிழ்நாடு அரசு தொடர்ந்து வலியுறுத்தும் என அவர் உறுதிபடத் தெரிவித்தார்.
சென்னை மெட்ரோ இரண்டாம் கட்டப் பணிகள் தீவிரம்
சென்னையைப் பொறுத்தவரை, ரூ. 63,246 கோடி மதிப்பீட்டில் 118.9 கி.மீ தூரத்திற்கு நடைபெற்று வரும் இரண்டாம் கட்ட Metro ரயில் பணிகள் மிக வேகமாக முன்னெடுக்கப்பட்டு வருகின்றன. மூன்று முக்கிய வழித்தடங்களில் நடைபெற்று வரும் இந்தப் பணிகளின் முதல் பகுதியை இயக்குவதற்கான தொழில்நுட்ப மற்றும் ஒழுங்குமுறை அனுமதிகளை ரயில்வே வாரியத்திடமிருந்து தமிழக அரசு விரைவில் எதிர்பார்க்கிறது.
குறிப்பாக, பூந்தமல்லி புறவழிச்சாலை முதல் போரூர் வரையிலான வழித்தடம், தற்போது பயன்பாட்டில் உள்ள வடபழனி வழித்தடத்துடன் இணைக்கப்பட உள்ளது. 11 நிலையங்களைக் கொண்ட இந்த 14.6 கி.மீ நீளமுள்ள புதிய Metro வழித்தடம் மிக விரைவில் மக்கள் பயன்பாட்டுக்கு வரவிருப்பது குறிப்பிடத்தக்கது. இது சென்னையின் போக்குவரத்து நெரிசலை பெருமளவு குறைக்கும் என எதிர்பார்க்கப்படுகிறது.
புதிய வழித்தடங்களுக்கான கொள்கை முடிவு
சென்னை மாநகரின் அசுர வளர்ச்சியைத் தொடர்ந்து, மேலும் பல பகுதிகளுக்கு Metro சேவையை விரிவாக்கம் செய்ய மாநில அரசு கொள்கை ரீதியிலான ஒப்புதலை வழங்கியுள்ளது.
More Read
- சென்னை விமான நிலையம் முதல் கிளாம்பாக்கம் கலைஞர் நூற்றாண்டு பேருந்து முனையம் வரை.
- கோயம்பேடு முதல் பட்டாபிராம் வழியாக ஆவடி வரை.
- பூந்தமல்லி முதல் திருப்பெரும்புதூர் வழியாக சுங்குவார்சத்திரம் வரை.
இந்த புதிய Metro வழித்தடங்களுக்கான திட்டங்களுக்கு மத்திய அரசின் நிதி உதவி மற்றும் ஒப்புதலைப் பெறப் பரிந்துரைக்கப்பட்டுள்ளது. நிலம் கையகப்படுத்துதல் மற்றும் பயன்பாட்டு அமைப்புகளை மாற்றியமைத்தல் போன்ற ஆரம்பகட்ட பணிகளுக்கு மாநில அரசு ஏற்கனவே நிர்வாக ஒப்புதல் அளித்து, நிதியையும் ஒதுக்கியுள்ளது.
ஒருங்கிணைந்த போக்குவரத்து மற்றும் நவீன உள்கட்டமைப்பு
மெட்ரோ ரயில் திட்டங்களுடன் இணைந்து, சென்னையின் பிராட்வே பகுதியில் பன்முகப் போக்குவரத்து வசதிகளைக் கொண்ட நவீன பேருந்து நிலையம் அமைக்கும் பணிகள் ரூ. 823 கோடி மதிப்பீட்டில் நடைபெற்று வருகின்றன. இங்கு அலுவலக வளாகங்கள் மற்றும் குறளகம் மறு மேம்பாடு போன்ற கட்டுமானங்களும் இடம்பெறுகின்றன. போக்குவரத்துத் துறையில் ஒரு புரட்சியை ஏற்படுத்த வேண்டும் என்பதே தமிழக அரசின் இலக்காக உள்ளது.
ஒட்டுமொத்தமாக, மதுரையிலும் கோவையிலும் Metro கனவு நனவாக மத்திய அரசு முட்டுக்கட்டை போட்டாலும், சட்ட ரீதியாகவும் நிர்வாக ரீதியாகவும் தொடர்ந்து அழுத்தம் கொடுத்து இத்திட்டங்களைச் செயல்படுத்த மாநில அரசு முனைப்பு காட்டி வருகிறது. இந்த பட்ஜெட் அறிவிப்புகள் தமிழகத்தின் போக்குவரத்து உள்கட்டமைப்பில் ஒரு மைல்கல்லாகப் பார்க்கப்படுகின்றன.
