ஈரோடு மாவட்டம் திண்டல் பகுதியில் இன்று (ஏப்ரல் 2, 2026) நடைபெற்ற பிரம்மாண்ட தேர்தல் பொதுக்கூட்டத்தில், மதச்சார்பற்ற முற்போக்குக் கூட்டணி வேட்பாளர்களை ஆதரித்து முதலமைச்சர் மு.க.ஸ்டாலின் உரையாற்றினார். பெரியார் பிறந்த மண்ணில் நின்றபடி, எதிர்க்கட்சித் தலைவர் எடப்பாடி பழனிசாமி மற்றும் பாஜக தலைமையிலான என்.டி.ஏ (NDA) கூட்டணியைத் துரோகங்களின் இருப்பிடம் என அவர் கடுமையாக விமர்சித்தார்.
எடப்பாடிக்கு ‘வயிற்றெரிச்சல்’:
தமிழகத்தின் தொழில் மற்றும் சமூக வளர்ச்சியைக் கண்டு எடப்பாடி பழனிசாமி பொறாமையில் பேசி வருவதாக ஸ்டாலின் குறிப்பிட்டார்.
- சட்டம் ஒழுங்கு: “அதிமுக ஆட்சியில் ஒரு பெண் எஸ்பி-க்கே டிஜிபி பாலியல் தொல்லை கொடுத்தார். பொள்ளாச்சி பாலியல் வன்கொடுமை வழக்கில் குற்றவாளிகளைப் பாதுகாத்தவர் எடப்பாடி பழனிசாமி. ஆனால், திமுக ஆட்சியில் 86% வழக்குகளில் 60 நாட்களுக்குள் குற்றப்பத்திரிகை தாக்கல் செய்யப்பட்டுள்ளது” என்றார்.
- பெண்கள் பாதுகாப்பு: பெண்களுக்கு எதிரான குற்றங்களுக்கு மரண தண்டனை விதிக்கும் வகையில் சட்டத் திருத்தம் கொண்டு வந்தது திராவிட மாடல் ஆட்சி தான் எனப் பெருமிதம் தெரிவித்தார்.
திட்டங்களின் நாயகன் திமுக:
ஈரோடு மாவட்டத்தின் நீண்ட காலக் கனவான அத்திக்கடவு – அவிநாசி திட்டத்தை முழுமையாக நிறைவேற்றியது திமுக அரசு என்பதைச் சுட்டிக்காட்டிய அவர், முத்துசாமி போன்ற அனுபவம் வாய்ந்த அமைச்சர்களின் உழைப்பைப் பாராட்டினார். “வீட்டுக்கு ஒருவராவது எங்கள் திட்டங்களால் பயனடைந்துள்ளனர், இதுவே எங்கள் வெற்றிக்குச் சாட்சி” என்றார்.
என்.டி.ஏ – துரோகக் கூட்டணி:
பாஜக மற்றும் அதிமுக இடையிலான உறவைச் சாடிய முதலமைச்சர்:
- மதுரை எய்ம்ஸ்: “பிரதமரிடம் சொல்லிக் கொள்ளும்படி ஒரே ஒரு சாதனை கூட இல்லை. மதுரை எய்ம்ஸ் மருத்துவமனையை இன்னும் செங்கல் செங்கல்லாகவே கட்டிக் கொண்டிருக்கிறார்கள்” என எள்ளி நகையாடினார்.
- நீட் & மெட்ரோ: நீட் தேர்வு விவகாரத்திலும், மெட்ரோ இரயில் திட்ட நிதியிலும் தமிழகத்திற்குத் துரோகம் இழைத்த என்.டி.ஏ கூட்டணியை ஏப்ரல் 23-ம் தேதி மக்கள் தூக்கி எறிவார்கள் என முழங்கினார்.
