இந்தியாவின் முதல் பிரதமர் ஜவஹர்லால் நேரு வசித்ததாகக் கூறப்படும், டெல்லியின் மோதிலால் மார்க் பகுதியில் உள்ள அதிகாரப்பூர்வ பங்களா ₹1,100 கோடிக்கு விற்பனை செய்யப்பட்டுள்ளது. இது இந்தியாவின் மிக அதிக மதிப்புள்ள சொத்து பரிவர்த்தனைகளில் ஒன்றாகக் கருதப்படுகிறது. இந்த பிரம்மாண்டமான பங்களாவை, பிரபல மதுபான அதிபரான கோகிலா சாம் என்பவர் வாங்கியுள்ளதாக தகவல்கள் தெரிவிக்கின்றன.
டெல்லியில் உள்ள இந்த பங்களா, தற்போது ராஜஸ்தான் அரச குடும்பத்தைச் சேர்ந்த ராஜ்குமார் கன் மற்றும் பினா ராணி ஆகியோருக்கு சொந்தமானதாகும். கடந்த சில மாதங்களாகவே இந்த பங்களாவை விற்பனை செய்ய அவர்கள் பேச்சுவார்த்தை நடத்தி வந்த நிலையில், இந்த விற்பனை இறுதி செய்யப்பட்டுள்ளது.
இந்த விற்பனை தொடர்பாக, சட்டபூர்வமான நடைமுறைகளை மேற்கொள்வதற்காக, வாங்குபவரின் சட்ட ஆலோசனை நிறுவனம் ஒரு பொது அறிவிப்பை வெளியிட்டுள்ளது. அதில், இந்த சொத்தின் மீது யாருக்கேனும் உரிமை இருந்தால், ஏழு நாட்களுக்குள் உரிய ஆவணங்களுடன் தொடர்பு கொள்ளுமாறு கோரப்பட்டுள்ளது.
டெல்லியில் உள்ள பங்களாக்கள்
டெல்லியில் சுமார் 3,000 பங்களாக்கள் உள்ளன. அவற்றில் பெரும்பாலானவை மத்திய அமைச்சர்கள், நீதிபதிகள் மற்றும் அரசு உயர் அதிகாரிகளுக்கு ஒதுக்கப்பட்டவை. சுமார் 600 பங்களாக்கள் நாட்டின் பெரும் பணக்காரர்கள் வசம் உள்ளன. இது போன்ற வரலாற்று முக்கியத்துவம் வாய்ந்த சொத்துக்கள், மிகவும் விலை உயர்ந்தவை என்பதால் ஒரு சிலரால் மட்டுமே வாங்க முடியும் என பெயர் குறிப்பிட விரும்பாத ஒருவர் தெரிவித்துள்ளார்.
மிக முக்கியப் பகுதியில் அமைந்துள்ளதாலும், முக்கிய பிரமுகர்கள் வசித்ததாலும் இத்தகைய சொத்துக்களுக்கு அதிக வரவேற்பு உள்ளதாகவும் அவர் குறிப்பிட்டுள்ளார்.
More Read
இந்த விற்பனை இந்திய ரியல் எஸ்டேட் சந்தையில் பெரும் பேசுபொருளாக மாறியுள்ளது. வரலாற்று சிறப்புமிக்க ஒரு பங்களாவின் விற்பனை, பெரும் பணக்காரர்களின் முதலீட்டு ஆர்வத்தையும், டெல்லியின் சொத்து மதிப்பின் உயர்வையும் எடுத்துக்காட்டுகிறது.
