ரயில் பயணிகளுக்கான டிக்கெட் ரத்து மற்றும் கட்டணம் திரும்பப் பெறுதல் (Rail Refund) நடைமுறைகளில் இந்திய ரயில்வே (தெற்கு ரயில்வே) சில முக்கிய மாற்றங்களைக் கொண்டு வந்துள்ளது. கடைசி நேரத்தில் திட்டமிடப்படாத ரத்துகளைக் குறைக்கவும், மற்ற பயணிகளுக்கு வாய்ப்பு கிடைப்பதை உறுதி செய்யவும் இந்த புதிய விதிகள் ஏப்ரல் 1, 2026 முதல் அமலுக்கு வருகின்றன.
புதிய ரத்து கட்டண விவரங்கள்
புதிய விதிகளின்படி, காலக்கெடுவுக்கு ஏற்பத் திரும்பப் பெறும் தொகையில் பெரும் மாற்றங்கள் செய்யப்பட்டுள்ளன:
- 72 மணி நேரத்திற்கு முன்பு: ரயில் புறப்படுவதற்கு 72 மணி நேரத்திற்கு முன்னதாக ரத்து செய்தால் மட்டுமே, தற்போதைய நடைமுறைப்படி நிர்ணயிக்கப்பட்ட ரத்து கட்டணம் (Cancellation Charges) மட்டும் பிடிக்கப்பட்டு மீதித் தொகை வழங்கப்படும்.
- 72 முதல் 24 மணி நேரம்: இந்த இடைவெளியில் ரத்து செய்தால், ரத்து கட்டணத்துடன் சேர்த்து பயணக் கட்டணத்தில் 25% பிடிக்கப்படும்.
- 24 முதல் 8 மணி நேரம்: ரயில் புறப்படுவதற்கு 24 மணி நேரத்திற்கு முன்பிலிருந்து 8 மணி நேரத்திற்குள் ரத்து செய்தால், 50% தொகை மட்டுமே திரும்பக் கிடைக்கும்.
- 8 மணி நேரத்திற்குள்: ரயில் புறப்பட 8 மணி நேரமே இருக்கும் நிலையில் டிக்கெட்டை ரத்து செய்தால், பணம் ஏதும் திரும்பத் தரப்படாது.
போர்டிங் பாயிண்ட் (Boarding Point) மாற்றத்தில் சலுகை
ரத்து விதிகளில் கெடுபிடி காட்டினாலும், பயணிகள் ஏறும் இடத்தை (Boarding Point) மாற்றுவதில் ரயில்வே சலுகை வழங்கியுள்ளது. தற்போது வரை சார்ட் (Chart) தயார் செய்யும் வரை மட்டுமே இருந்த இந்த வசதி, இனி ரயில் புறப்படுவதற்கு 30 நிமிடங்கள் முன்பு வரை நீட்டிக்கப்பட்டுள்ளது. இதன் மூலம் பயணிகள் கடைசி நேரத்தில் தாங்கள் ஏறும் நிலையத்தை மாற்றிக்கொள்ள முடியும்.
ஏன் இந்த மாற்றம்?
பண்டிகை காலங்கள் மற்றும் விடுமுறை நாட்களில் கடைசி நிமிடத்தில் டிக்கெட்டுகளை ரத்து செய்வதால், காத்திருப்போர் பட்டியலில் (Waiting List) உள்ள பலருக்குப் பயணம் செய்யும் வாய்ப்பு பறிபோகிறது. இதனைத் தவிர்க்கவும், உறுதி செய்யப்பட்ட இடங்கள் வீணாவதைத் தடுக்கவுமே இந்த Rail Refund விதிகள் மாற்றப்பட்டுள்ளதாகத் தெற்கு ரயில்வே விளக்கம் அளித்துள்ளது.
