தமிழ்நாட்டில் சென்னை போன்ற முக்கிய நகரங்களில் தங்கத்தின் வர்த்தகம் மிகவும் அதிகமாக உள்ளது. சர்வதேச பொருளாதார நிலவரத்துக்கு ஏற்ப இந்தியாவில் தங்கத்தின் விலை அவ்வப்போது உயர்ந்தும், குறைந்தும் வருகிறது. ஏற்ற, இறக்கத்துடன் காணப்பட்டு வந்த தங்கம் விலை கடந்த அக்டோபர் மாதம் 30-ம் தேதி ஒரு சவரன் ரூ.59 ஆயிரத்தை கடந்து புதிய உச்சத்தை தொட்டது. அதனை தொடர்ந்து நவம்பர் மாத தொடக்கத்தில் இருந்தே தங்கம் விலை ஏற்ற, இறக்கத்துடன் காணப்பட்டு வருகிறது.
இதற்கிடையே, கடந்த 21ம் தேதி தங்கம் விலை 60 ஆயிரத்தை கடந்து மக்களை அதிர்ச்சியில் ஆழ்த்தியது. தங்க விலை கடந்த 2 நாட்களாக குறைந்த நிலையில் நேற்று ஆபரணத் தங்கத்தின் விலை சவரனுக்கு ரூ.60,080-க்கும், கிராமுக்கு ரூ.7,510-க்கும் விற்பனை செய்யப்பட்டது. அதேபோல் வெள்ளி விலை கிராமுக்கு ஒரு ரூபாய் குறைந்து 104 ரூபாய்க்கும், கிலோவுக்கு ஆயிரம் ரூபாய் குறைந்து ஒரு லட்சத்து நான்காயிரம் ரூபாய்க்கும் விற்பனை செய்யப்பட்டது.
இந்த நிலையில், தங்கம் விலை இன்று அதிரடியாக எகிறியுள்ளது. அதன்படி, தங்கம் விலை இன்று கிராமுக்கு ரூ.85 உயர்ந்து ரூ.7,595க்கும், சவரனுக்கு ரூ.680 உயர்ந்து ரூ.60,760க்கும் விற்பனை செய்யப்படுகிறது. வெள்ளி விலையில் மாற்றமின்றி ஒரு கிராம் ரூ.104-க்கும், ஒரு கிலோ கட்டி வெள்ளி ரூ.1,04,000-க்கும் விற்பனை செய்யப்படுகிறது.
