Second Case of Seetharam, Seetharam Benzi Case No.18 மற்றும் Case of Kondana ஆகிய படங்களின் தொடர்ச்சியாக வந்திருக்கும் இந்த புதிய பாகம், முந்தைய கதையின் தளத்தைத் தக்கவைத்துக்கொண்டே தனித்து நிற்கும் கிரைம் த்ரில்லராக தன்னை நிரூபிக்கிறது.
ஒரே மாதிரியான முறையில் நடைபெறும் தொடர் கொடூரக் கொலைகள் காவல்துறைக்கு சவாலாக மாறுகின்றன. உடற்கூராய்வு அறிக்கைகள், இது மனநலம் பாதிக்கப்பட்ட ஒருவரின் செயல் இருக்கலாம் என சுட்டிக்காட்டுகின்றன. எந்த உறுதியான தடயமும் இல்லாமல், வெறும் சில குறிகள் மற்றும் மருத்துவ தகவல்களை மட்டுமே வைத்து கொலையாளியை கண்டுபிடிக்க முயலும் ஆனெகுட்டா காவல் நிலைய அதிகாரி சீதாராமின் புலனாய்வு தான் கதையின் மையம்.
இதற்கிடையில் அவரது குடும்ப பின்னணி, குறிப்பாக ஊருக்கு குடிபெயரும் தங்கை மற்றும் உதவி கேட்கும் செபாஸ்டியன் எனும் பாத்திரம் ஆகியவை கதையில் சஸ்பென்ஸை அதிகரிக்கின்றன.
சீதாராமாக நடித்துள்ள விஜய் ராகவேந்திரா, வழக்கமான அனைத்தையும் அறிந்த போலீஸ் ஹீரோவாக இல்லாமல், தவறுகளும் தயக்கங்களும் உள்ள மனிதராக தனது கதாபாத்திரத்தை வடிவமைத்துள்ளார். அவரது உடல்மொழி, விசாரணை மேற்கொள்ளும் அமைதி, சில தருணங்களில் வெளிப்படும் மனஅழுத்தம் ஆகியவை கதைக்கு நம்பகத்தன்மை தருகின்றன.
செபாஸ்டியன் வேடத்தில் கோபாலகிருஷ்ணா தேஷ்பாண்டே, மிரட்டலான, புதிரான நடிப்பால் கவனம் ஈர்க்கிறார். தங்கையாக வரும் உஷா பண்டாரி, அளவான நடிப்பால் குடும்ப உணர்வை சமநிலைப்படுத்துகிறார்.
More Read
ஒளிப்பதிவாளர் ஹேமந்த், காட்சிகளில் ஒளி-நிழல் பயன்பாட்டின் மூலம் மனஅழுத்தத்தை உருவாக்கியுள்ளார். நவ்நீத் ஷாம் பின்னணி இசை, அமைதியான தருணங்களிலும் ஒரு படபடப்பை உண்டாக்குகிறது. ஷஷாங்க் நாராயணா தொகுப்பு கூர்மையாக இருந்தாலும், சில இடங்களில் மெதுவாக நகரும் திரைக்கதை பொறுமையை சோதிக்கிறது.
இயக்குநர் தேவி பிரசாத் ரெட்டி, முந்தைய பாகங்களின் தொடர்புகளை நயமாக கையாளுவதோடு, மனநிலை மாற்றங்கள், பெண்கள் பாதுகாப்பு, அதிகார அழுத்தம் போன்ற அம்சங்களையும் இணைத்துள்ளார். கொலைகளின் காரணம் சற்று பலவீனமாக இருந்தாலும், திரைக்கதையின் கட்டமைப்பு, ட்விஸ்ட்கள் மற்றும் வலுவான நடிப்புகள் படத்தை தாங்கிச் செல்கின்றன.
மொத்தத்தில், மெதுவாக எரியும் த்ரில்லராக நகரும் இந்த படம், இறுதியில் பரபரப்பை தந்தே தீர்கிறது. கிரைம் சஸ்பென்ஸ் ரசிகர்களுக்கு இது திரையரங்கில் அனுபவிக்கத்தக்க படம்.
