தமிழக பாஜக மாநிலத் தலைவர் நயினார் நாகேந்திரன், நடிகர் விஜய்யுடன் தன்னைத் தொடர்புபடுத்திப் பேசிய சர்ச்சை கருத்துகளுக்கு நடிகை திரிஷா தனது கடும் கண்டனத்தைத் தெரிவித்துள்ளார். இது தொடர்பாகத் தனது வழக்கறிஞர் மூலமாக அதிகாரப்பூர்வ கண்டன அறிக்கை ஒன்றை அவர் வெளியிட்டுள்ளார்.
அந்த அறிக்கையில் திரிஷா தரப்பில் கூறப்பட்டுள்ளதாவது: “எனக்கு எந்த அரசியல் கட்சியுடனும் எவ்விதத் தொடர்பும் இல்லை. எதிர்காலத்தில் எந்தக் கட்சியிலும் சேரும் எண்ணமும் எனக்கில்லை. ஒரு பொறுப்பான மற்றும் உயர்பதவியில் உள்ள ஒருவரிடமிருந்து இத்தகைய தரம் தாழ்ந்த, மோசமான கருத்தை நான் எதிர்பார்க்கவில்லை. ஒரு பெண்ணின் தனிப்பட்ட வாழ்க்கை குறித்துப் பொதுவெளியில் அவதூறாக விவாதிப்பது நாகரிகமான செயல் அல்ல.”
மேலும், நயினார் நாகேந்திரனின் பேச்சு அருவருக்கத்தக்க வகையிலும், முறையற்ற வகையிலும் அமைந்துள்ளதாகச் சுட்டிக்காட்டியுள்ள அவர், தான் எப்போதும் அரசியலில் நடுநிலையான நிலைப்பாட்டையே கடைப்பிடித்து வருவதாகவும் தெளிவுபடுத்தியுள்ளார். அரசியல் லாபத்திற்காகத் திரையுலகைச் சேர்ந்தவர்களின் தனிப்பட்ட வாழ்வைச் சிதைக்கும் வகையில் பேசுவதை ஏற்க முடியாது என்றும் அந்த அறிக்கையில் வலியுறுத்தப்பட்டுள்ளது.
