மாசிடோனியா நாட்டின் ஸ்கோபியே நகரில் 1910 ஆம் ஆண்டு ஆகஸ்ட் 26 ஆம் தேதி பிறந்தவர் அன்னை தெரசா. ஆனால், ஆகஸ்ட் 27 ஆம் தேதியைத்தான் அவர் தனது பிறந்த நாளாகக் கொண்டாடினார். கிறிஸ்தவ மரபுப்படி, பெயர் சூட்டப்பட்ட நாளைத் தன் பிறந்தநாளாகக் கருதினார். நிக்கோலாய் போஜோஜியூ மற்றும் ட்ரெனபிள் போஜோஜியூ ஆகியோருக்கு மகளாகப் பிறந்த அன்னை தெரசா, 8 வயதிலேயே தன் தந்தையை இழந்தார். தனது 18-வது வயது வரை தாயுடன் வாழ்ந்த அவர், தனது 12-வது வயதிலேயே பிறருக்கு சேவை செய்வதற்காக தன் வாழ்க்கையை அர்ப்பணிக்க முடிவு செய்தார். 18-வது வயதில் வீட்டை விட்டு வெளியேறி, அயர்லாந்தில் உள்ள ‘சிஸ்டர்ஸ் ஆஃப் லொரேட்டோ’ என்ற கிறிஸ்தவ மத அமைப்பில் கன்னியாஸ்திரியாக இணைந்தார். சில மாதங்களுக்குப் பிறகு இந்தியாவுக்கு அனுப்பப்பட்டார்.
1931 முதல் 1948 வரை, கொல்கத்தாவில் உள்ள செயின்ட் மேரி உயர்நிலைப் பள்ளியில் ஆசிரியராகப் பணியாற்றினார். ஆனால், பள்ளிக்கு வெளியே அவர் கண்ட துன்பமும் வறுமையும் அவரை வெகுவாகப் பாதித்தது. இதனால், ஏழைகளுக்குச் சேவை செய்ய வேண்டும் என்ற உந்துதலில் 1948-ல் பள்ளியை விட்டு வெளியேறினார். பின்னர், கொல்கத்தா குடிசைப் பகுதியில் உள்ள ஏழைகளுக்காக ஒரு திறந்தவெளிப் பள்ளியைத் தொடங்கினார். ஆரம்பத்தில் நிதி பற்றாக்குறை இருந்தாலும், தன்னார்வத் தொண்டர்களின் ஆதரவால் அவரின் சேவை விரிவடைந்தது.
“தி மிஷனரீஸ் ஆஃப் சாரிட்டி” என்ற சேவை அமைப்பு
1950 ஆம் ஆண்டு அக்டோபர் 7 ஆம் தேதி, அன்னை தெரசா “தி மிஷனரீஸ் ஆஃப் சாரிட்டி” என்ற தனது அமைப்பை நிறுவ அனுமதி பெற்றார். யாரும் கவனிக்காமல் ஆதரவற்றவர்களாக இருப்பவர்களை நேசிப்பதையும், பராமரிப்பதையும் முதன்மைப் பணியாகக் கொண்ட இந்த அமைப்பு, தொழுநோயாளிகளுக்கும் உதவிக்கரம் நீட்டியது. 1965-ல் இந்த அமைப்பு சர்வதேச அளவில் விரிவடைந்தது. இன்று, ஆசியா, ஆப்பிரிக்கா, லத்தீன் அமெரிக்கா, ஐரோப்பா மற்றும் ஆஸ்திரேலியா என உலகின் பல நாடுகளிலும் “தி மிஷனரீஸ் ஆஃப் சாரிட்டி” சேவை மையங்களைக் கொண்டுள்ளது. வெள்ளம், பஞ்சம் போன்ற இயற்கை சீற்றங்களால் பாதிக்கப்பட்டவர்களுக்கும், அகதிகளுக்கும் இந்த அமைப்பு தொடர்ந்து உதவிகளை செய்து வருகிறது.
அன்னை தெரசா விருதுகளும் கௌரவங்களும்
More Read
உலகம் முழுவதும் அன்னை தெரசாவின் பணிகள் அங்கீகரிக்கப்பட்டு பல விருதுகளையும் கௌரவங்களையும் அவருக்கு பெற்றுத்தந்தன. அவற்றுள் குறிப்பிடத்தக்க சில விருதுகள்:
- 1962 – அமைதி மற்றும் உலகப் புரிதலுக்கான மகசேசே விருது
- 1979 – அமைதிக்கான நோபல் பரிசு
- 1980 – இந்திய அரசின் உயரிய விருதான பாரத ரத்னா
- 1985 – அமெரிக்காவின் மிக உயரிய விருதான விடுதலைக்கான அதிபர் பதக்கம்
அன்னை தெரசாவின் தத்துவங்கள் இன்றும் பலருக்கு ஊக்கமளிக்கின்றன. ‘மற்றவர்களுக்காக வாழாத வாழ்க்கை ஒரு வாழ்க்கையே அல்ல’, ‘உங்களால் நூறு பேருக்கு உணவளிக்க முடியாவிட்டாலும், பரவாயில்லை, ஒருவருக்காவது உணவு கொடுங்கள்’ போன்ற அவரது பொன்மொழிகள் சேவை மனப்பான்மையின் அவசியத்தை உணர்த்துகின்றன.
தனது சேவைப் பணிகளுக்காக உலகெங்கிலும் பல்வேறு பல்கலைக்கழகங்களில் இருந்து கௌரவ டாக்டர் பட்டங்களையும் அவர் பெற்றார். கல்வி நிறுவனங்கள், சாலைகள் மற்றும் அருங்காட்சியகங்களுக்கு அவரது பெயர் சூட்டப்பட்டுள்ளது. அவர் 1997 ஆம் ஆண்டு செப்டம்பர் 5 ஆம் தேதி தனது 87-வது வயதில் காலமானார். அன்னை தெரசாவின் அர்ப்பணிப்பும், அன்பும் இன்றும் கோடிக்கணக்கான மக்களின் மனதில் வாழ்கிறது.
