தமிழகத்தில் டிஜிட்டல் ஆளுமையை அடுத்த கட்டத்திற்குக் கொண்டு செல்லும் விதமாக, ‘நம்ம அரசு’ (Namma Arasu) என்ற ஒருங்கிணைந்த வாட்ஸ்-அப் சாட்பாட் (Chatbot) சேவையைத் தமிழக அரசு அறிமுகப்படுத்தியுள்ளது. சென்னை நந்தம்பாக்கத்தில் நடைபெற்ற ‘உமாஜின் 2026’ (Umagine 2026) தொழில்நுட்ப மாநாட்டில், தகவல் தொழில்நுட்பத் துறை அமைச்சர் பி.டி.ஆர். பழனிவேல் தியாகராஜன் இந்தச் சேவையைத் தொடங்கி வைத்தார். இதன் மூலம் பொதுமக்கள் இனி 16 அரசுத் துறைகளின் 51 வகையான சேவைகளைத் தங்களது மொபைல் போன் மூலமாகவே எளிதில் பெற முடியும்.
எப்படிப் பயன்படுத்துவது?
பொதுமக்கள் தங்களது மொபைலில் +91 78452 52525 என்ற எண்ணைச் சேமித்துக் கொண்டு, வாட்ஸ்-அப்பில் ‘Hi’ அல்லது ‘வணக்கம்’ என்று செய்தி அனுப்புவதன் மூலம் இந்தச் சேவையைத் தொடங்கலாம். இந்தச் சாட்பாட் தமிழ் மற்றும் ஆங்கிலம் ஆகிய இரு மொழிகளிலும் செயல்படுகிறது. செயற்கை நுண்ணறிவு (AI) தொழில்நுட்பத்துடன் வடிவமைக்கப்பட்டுள்ளதால், இது பயனர்களின் தேவையைப் புரிந்து கொண்டு உரியத் துறைக்கு வழிகாட்டும்.
கிடைக்கும் முக்கிய சேவைகள்
இந்த ‘நம்ம அரசு’ (Namma Arasu) தளத்தில் முதற்கட்டமாகப் பின்வரும் சேவைகள் வழங்கப்படுகின்றன:
- சான்றிதழ்கள்: பிறப்பு, இறப்பு, வருமானம், சாதி மற்றும் இருப்பிடச் சான்றிதழ்களைப் பதிவிறக்கம் செய்யலாம்.
- கட்டணங்கள்: மின்சாரக் கட்டணம் (TNEB), குடிநீர் வரி மற்றும் சொத்து வரி ஆகியவற்றைச் செலுத்தலாம்.
- ரேஷன் கார்டு: குடும்ப அட்டை தொடர்பான சேவைகள் மற்றும் புதிய உறுப்பினர் சேர்த்தல்/நீக்கல் விவரங்களைப் பெறலாம்.
- புகார் அளித்தல்: அரசு தொடர்பான புகார்களைப் பதிவு செய்யவும், அதன் நிலையை (Status) அறியவும் வசதி செய்யப்பட்டுள்ளது.
- இதர சேவைகள்: கோயில் நன்கொடைகள், சுற்றுலா முன்பதிவு மற்றும் விவசாயம் சார்ந்த தகவல்களையும் பெற முடியும்.
இ-சேவை மையங்களுக்கு அலையத் தேவையில்லை
பொதுவாகச் சான்றிதழ்கள் பெறவோ அல்லது வரிகள் செலுத்தவோ மக்கள் இ-சேவை மையங்களுக்கோ அல்லது அரசு அலுவலகங்களுக்கோ நேரில் செல்ல வேண்டியிருந்தது. ஆனால், இந்த வாட்ஸ்-அப் சேவை மூலம் பொதுமக்கள் வீட்டிலிருந்தே அனைத்துப் பணிகளையும் முடித்துக்கொள்ளலாம். இது பொதுமக்களின் நேரத்தையும் அலைச்சலையும் மிச்சப்படுத்தும் ஒரு புரட்சிகரமான முயற்சியாகப் பார்க்கப்படுகிறது.
எதிர்காலத் திட்டங்கள்
தற்போது 51 சேவைகள் நேரலையில் உள்ள நிலையில், அடுத்த மூன்று மாதங்களுக்குள் மேலும் 50 சேவைகளை இதில் இணைக்க அரசு திட்டமிட்டுள்ளது. மெட்டா (Meta) நிறுவனத்தின் ஒத்துழைப்புடன் உருவாக்கப்பட்டுள்ள இந்தத் தளம், தொழில்நுட்ப ரீதியாக மிகவும் பாதுகாப்பானது என்று உறுதி அளிக்கப்பட்டுள்ளது. ஆந்திரா மற்றும் ஒடிசா மாநிலங்களைத் தொடர்ந்து, வாட்ஸ்-அப் மூலம் அரசுச் சேவைகளை வழங்கும் மூன்றாவது மாநிலமாகத் தமிழகம் உருவெடுத்துள்ளது குறிப்பிடத்தக்கது.
