சென்னை நேரு உள்விளையாட்டரங்கில் செப்டம்பர் 25 அன்று தமிழக அரசின் ‘கல்வியில் சிறந்த தமிழ்நாடு’ நிகழ்ச்சி கோலாகலமாக நடைபெற்றது. தமிழக அரசு கல்வித் துறையில் செயல்படுத்தி வரும் முக்கியத் திட்டங்களின் சாதனைகளை விளக்கும் வகையிலும், 2025-2026ஆம் கல்வி ஆண்டிற்கான ‘தமிழ்ப்புதவன்’ மற்றும் ‘புதுமைப்பெண்’ திட்டங்களை தொடங்கி வைக்கும் நோக்கிலும் இந்த பிரம்மாண்ட விழா ஏற்பாடு செய்யப்பட்டிருந்தது. தமிழக முதலமைச்சர் மு.க. ஸ்டாலின் தலைமை வகித்த இந்த நிகழ்ச்சியில், துணை முதல்வர் உதயநிதி ஸ்டாலின், சிறப்பு விருந்தினராக தெலங்கானா முதலமைச்சர் ரேவந்த் ரெட்டி ஆகியோர் கலந்துகொண்டனர்.
வெற்றிக் கதை சொல்லும் மாணவர்கள்
விழாவின் முக்கிய அங்கமாக, தமிழக அரசின் ‘நான் முதல்வன்’, ‘தமிழ்ப்புதவன்’, ‘புதுமைப்பெண்’ உள்ளிட்ட ஏழு திட்டங்களால் பயனடைந்த மாணவ மாணவிகள் மேடையேறித் தங்கள் அனுபவங்களைப் பகிர்ந்தனர். வறுமையான குடும்பச் சூழலில் இருந்து வந்து, தமிழக அரசின் உதவி தங்களின் உயர்கல்விக்கு எவ்வாறு உதவியது என்பது குறித்து அவர்கள் பேசியது அங்கிருந்த அனைவரையும் நெகிழ்ச்சியில் ஆழ்த்தியது.
அவ்வாறு பேசிய மாணவர்களில், ராணிப்பேட்டை மாவட்டத்தைச் சேர்ந்த சுப்புலட்சுமி என்ற ‘புதுமைப்பெண்’ திட்டப் பயனாளியான மாணவி, “தான் எதிர்காலத்தில் கணித ஆசிரியராக வருவேன்” என்று உறுதியுடன் தெரிவித்தார். அவரின் கனவு மற்றும் தன்னம்பிக்கையைப் பாராட்டிய முதலமைச்சர் மு.க. ஸ்டாலின், உடனடியாக அவரை மேடைக்கு அழைத்து, தாம் வைத்திருந்த பேனாவை பரிசாக அளித்து கவுரவித்தார். இது குறித்து மகிழ்ச்சி பொங்கப் பேசிய மாணவி சுப்புலட்சுமி, “வருங்காலத்தில் நான் ஆசிரியராக ஆனவுடன், முதலமைச்சர் கொடுத்த பேனா இது என்று பெருமையுடன் என் மாணவர்களிடம் சொல்வேன்” என உணர்ச்சிவசப்பட்டுக் கூறினார். இந்தச் சம்பவம் விழாவில் பங்கேற்ற முதல்வர் உட்பட பலரையும் நெகிழச் செய்தது.
தந்தைக்கு முதல் மாத சம்பளம்: நெகிழ்ச்சியில் முதல்வர்
More Read
அதேபோல், ‘நான் முதல்வன்’ திட்டத்தின் கீழ் திறன் மேம்பாட்டுப் பயிற்சி பெற்று வேலைவாய்ப்பு பெற்ற மாணவர் ஒருவர் பேசும்போது, “கல்லூரியில் படித்தபோது என்ன செய்வது என்று தெரியாமல் இருந்த தனக்கு, இந்தத் திட்டமே வழிகாட்டியது. எப்போதும் எனக்கு ஆதரவு அளித்த எனது தந்தைக்கு முதல் மாதச் சம்பளத்தை இந்த மேடையிலேயே அளிக்க விரும்புகிறேன்” என்று தெரிவித்தார். அதன்படியே தன் தந்தையை மேடைக்கு அழைத்து முதல் மாதச் சம்பளத்தை அளித்து அவர் பாசத்தை வெளிப்படுத்தியது, முதல்வர் ஸ்டாலின் உட்பட அங்கு கூடியிருந்த அனைவரையும் கண்ணீருடன் பாராட்டச் செய்தது.
தெலங்கானா முதல்வர் அறிவிப்பு
இந்த மாபெரும் கல்வி எழுச்சிக் கொண்டாட்டத்தில் பேசிய தெலங்கானா முதல்வர் ரேவந்த் ரெட்டி, தமிழக அரசின் கல்வித் திட்டங்களை வெகுவாகப் பாராட்டினார். குறிப்பாக, முதலமைச்சரின் காலை உணவுத்திட்டத்தைக் குறிப்பிட்டு, “தெலங்கானா மாநிலத்திலும் அடுத்த ஆண்டு முதல் பள்ளிகளில் இத்திட்டம் அறிமுகப்படுத்தப்படும்” என்று அறிவித்தார். இது மாநிலங்களுக்கு இடையேயான ஆரோக்கியமான வளர்ச்சி அரசியலைக் காட்டுவதாக இருந்தது.
More Read
மேலும், நடிகர் சிவகார்த்திகேயன், இயக்குநர்கள் வெற்றிமாறன், மிஷ்கின், தியாகராஜன் குமாரராஜா உள்ளிட்ட திரைப்பிரபலங்களும் விழாவில் கலந்துகொண்டு கல்வியின் அவசியத்தையும், தமிழக அரசின் திட்டங்களையும் பாராட்டிப் பேசினர். நிறைவாக உரையாற்றிய முதலமைச்சர் மு.க. ஸ்டாலின், “தமிழக அரசு உருவாக்கிக் கொடுத்திருக்கும் இந்த வாய்ப்புகளைப் பயன்படுத்தி, மாணவர்கள் மேலும் உயரப் பறக்க வேண்டும். கல்வியில் சிறந்த தமிழ்நாட்டை, கல்வியில் உயர்ந்த தமிழ்நாடாக மாற்ற வேண்டும் என்பதே என் கோரிக்கை” என்று மாணவர்களுக்கு அறிவுரை வழங்கினார்.
