மத்திய கிழக்கில் இஸ்ரேல் – ஈரான் இடையேயான போர் பதற்றம் தொடர்ந்து கொண்டிருக்கிறது. இந்த சூழலில், ஈரானின் அணுசக்தி நிலையங்கள் மீது அமெரிக்கா தாக்குதல் நடத்தியதாக தகவல்கள் வெளியாகின. இந்தத் தாக்குதல் உலக அரங்கில் பெரும் அதிர்ச்சியை ஏற்படுத்திய நிலையில், அமெரிக்காவின் தாக்குதல் குறித்து ஈரான் வெளியிட்ட புதிய தகவல் பரபரப்பை கிளப்பியுள்ளது.
கடந்த சில நாட்களாக இஸ்ரேல், ஈரானின் அணுசக்தி வளாகங்கள் மற்றும் யுரேனியம் செறிவூட்டும் மையங்கள் மீது தாக்குதல்களை நடத்தி வருகிறது. அணு ஆயுதத் தயாரிப்பில் ஈரான் ஈடுபடுவதாக இஸ்ரேல் தொடர்ந்து குற்றம் சாட்டி வரும் நிலையில், இந்த மோதல் உச்சக்கட்டத்தை எட்டியுள்ளது. இந்நிலையில், ஈரான் மீது அமெரிக்காவும் நேரடி வான்வழித் தாக்குதலைத் தொடங்கியது. இத்தாக்குதலுக்கு B2 பாம்பர் ரக விமானங்கள் பயன்படுத்தப்பட்டதாகவும், அமெரிக்கா இந்த அதிநவீன குண்டுகளை பயன்படுத்துவது இதுவே முதல் முறை என்றும் கூறப்பட்டது. இதனால், மூன்றாம் உலகப் போர் குறித்த பதற்றம் உலக நாடுகள் மத்தியில் உருவானது.
அமெரிக்க அதிபர் டொனால்ட் டிரம்ப், ஈரானில் மூன்று அணு ஆயுத தளங்களை வெற்றிகரமாகத் தாக்கியதாக தனது சமூக வலைத்தளத்தில் உறுதிப்படுத்தினார். அதிக வீரியம் கொண்ட வெடிகுண்டுகள் ஈரானை துளைத்தெடுத்ததாக அவர் குறிப்பிட்டிருந்தார். இந்த தாக்குதல்களில், ஃபார்டோ, நாதான்ஸ் மற்றும் இஷாஃபஹன் ஆகிய நகரங்களில் உள்ள யுரேனியம் செறிவூட்டும் ஆலைகள் குறிவைக்கப்பட்டதாக அமெரிக்கா தரப்பில் தெரிவிக்கப்பட்டது. குறிப்பாக, நடான்ஸ் அணுசக்தி மையம், தெஹ்ரானில் இருந்து 135 மைல் தொலைவில் அமைந்துள்ள முக்கிய யுரேனியம் மையமாகும். இது 60% தூய்மை யுரேனியத்தை உற்பத்தி செய்யும் திறன் கொண்டது. இதேபோல், ஃபோர்டோ மலைக்கு அடியில் அமைந்துள்ள ஒரு பாதுகாக்கப்பட்ட தளமாகும். இஸ்ஃபஹான் யுரேனியம் மாற்று மையமாகவும் ஆய்வகமாகவும் செயல்படுகிறது.
அமெரிக்காவின் இந்தத் தாக்குதல் குறித்த உலக நாடுகளின் கண்டனங்கள் ஒருபுறம் இருக்க, ஈரான் இது குறித்து ஒரு புதிய தகவலை வெளியிட்டுள்ளது. அமெரிக்கா தாக்கிய அணுசக்தி நிலையங்கள் காலி குடோன்கள் என்றும், யுரேனியம் உள்ளிட்ட முக்கியப் பொருட்கள் அனைத்தும் தாக்குதலுக்கு முன்னரே பாதுகாப்பான இடங்களுக்கு மாற்றப்பட்டுவிட்டதாகவும் ஈரான் தெரிவித்துள்ளது. ஈரானின் அணுசக்தி நிலையத்தில் இருந்து கிட்டத்தட்ட 400 கிலோ யுரேனியம் வேறு இடத்துக்கு மாற்றப்பட்டிருக்கலாம் என சில செயற்கைக்கோள் புகைப்படங்களும் உறுதி செய்வதாக தகவல்கள் வெளியாகியுள்ளன.
அமெரிக்காவின் தாக்குதலை எதிர்கொள்ளும் வகையில், ஈரான் தனது அணுசக்தி மையங்களில் உள்ள முக்கியப் பொருட்களை முன்கூட்டியே மாற்றி, அமெரிக்காவின் தாக்குதலை வீணடித்திருக்கலாம் என அரசியல் மற்றும் ராணுவ ஆய்வாளர்கள் கருதுகின்றனர். இந்த தகவல் உண்மையானால், இது அமெரிக்காவுக்கு ஒரு பெரும் பின்னடைவாகக் கருதப்படும். மேலும், ஈரான் தனது அணுசக்தி திட்டங்களை எவ்வளவு ரகசியமாகவும், பாதுகாப்பாகவும் நடத்தி வருகிறது என்பதையும் இது வெளிப்படுத்துகிறது. அடுத்த கட்டமாக ஈரான் என்ன நடவடிக்கை எடுக்கும் என்பதை உலக நாடுகள் உற்று நோக்கி வருகின்றன. இந்த யுரேனியம் விவகாரம் மத்திய கிழக்குப் பிராந்தியத்தில் மேலும் பதற்றத்தை அதிகரிக்கக்கூடும்.
