அரசு பணிகளில் நேரடி நியமனத்துக்கான வயது உச்ச வரம்பை 5 ஆண்டுகள் உயர்த்தி முதல்வர் விஜய் உத்தரவிட்டுள்ளார்.
இது தொடர்பாக தமிழக அரசு இன்று வெளியிட்ட செய்திக் குறிப்பு: போட்டித் தேர்வர்களின் கோரிக்கைகளை ஏற்று, அரசு பணிகளில் நேரடி நியமனத்துக்கான வயது உச்ச வரம்பை தற்போதைய விதிகளில் இருப்பதை விட 5 ஆண்டுகள் உயர்த்தி முதல்வர் விஜய் உத்தரவிட்டுள்ளார்.
இந்த வயது வரம்பு உயர்வானது, இடஒதுக்கீட்டுப் பிரிவினருக்கு (பிசி, பிசி-முஸ்லிம், எம்பிசி, டிஎன்சி, எஸ்சி, எஸ்டி, ஆதரவற்ற விதவைகள்) ஏற்கெனவே உள்ள வயது சலுகைகளுடன் கூடுதலாக அமையும். குரூப்-1, குரூப்-2, 2 ஏ, குரூப்-4 உள்பட அனைத்து போட்டித்தேர்வுகளுக்கும் இந்த வயது வரம்பு உயர்வு பொருந்தும்.
குரூப்-1 தேர்வில் பொதுப் பிரிவினருக்கான வயது வரம்பு 32-லிருந்து 37ஆகவும், இடஒதுக்கீட்டுப் பிரிவினருக்கு 37-லிருந்து 42 ஆகவும் உயரும். குரூப்-2, 2 தேர்வில் பொதுப் பிரிவினருக்கான வயது வரம்பு 30-லிருந்து 35 ஆக அதிகரிக்கும்.
இடஒதுக்கீட்டு ப்பிரிவினருக்கு ஏற்கெனவே இருந்து வருவதைப் போல் வயது உச்ச வரம்பு இல்லை. குரூப்-4 தேர்வில் பொதுப் பிரிவினருக்கான வயது வரம்பு 30-லிருந்து 35 ஆக உயரும். இடஒதுக்கீட்டு பிரிிவினரில் பிசி, பிசி-முஸ்லிம், எம்பிசி, டிஎன்சி வகுப்பினருக்கு 32-லிருந்து 37 ஆக அதிகரிக்கும்.
More Read
எஸ்சி, எஸ்டி வகுப்பினர் மற்றும் ஆதரவற்ற கணவரை இழந்தவர்களுக்கு 35-லிருந்து 40 ஆகவும் உயரும். இடஒதுக்கீட்டுப் பிரிவினர் கூடுதல் கல்வித் தகுதி பெற்றிருந்தால் வயது வரம்பு கிடையாது. மாற்றுத் திறனாளிகளுக்கு தற்போதைய விதிமுறையின்படி, கூடுதலாக 10 ஆண்டுகள் வயது வரம்பு தளர்வு உண்டு.
இந்த வயது உச்ச வரம்பு இந்த ஆண்டு அக்டோபர் 30 முதல் 5 ஆண்டுகள் வரை நடைமுறையில் இருக்கும். தமிழக அரசின் இந்த உத்தரவு மூலம் வயது வரம்பு முடிவடையும் நிலையில் இருக்கும் பல்லாயிரக்கணக்கான போட்டித் தேர்வர்கள் பயன்பெறுவர் என்று தெரிவிக்கப்பட்டுள்ளது.
தமிழக அரசு பணிகளுக்கு தேவைப்படும் அலுவலர்களும், ஊழியர்களும் தமிழ்நாடு அரசு பணியாளர் தேர்வாணையம் மூலம் நேரடியாக தேர்வு செய்ய்படுகிறார்கள். இதற்காக டிஎன்பிஎஸ்சி போட்டித்தேர்வுகள் நடத்தப்படுகின்றன. அந்த வகையில், துணை ஆட்சியர், டிஎஸ்பி, ஊரக வளர்ச்சி உதவி இயக்குநர், வணிக வரி உதவி ஆணையர், மாவட்ட பதிவாளர், கோட்ட தீயணைப்பு அலுவலர், தொழிலாளர் உதவி ஆணையர் ஆகிய பதவிகளுக்காக டிஎன்பிஎஸ்சி குரூப்-1 தேர்வு நடத்தப்படுகிறது.
More Read
அதேபோல், நகராட்சி ஆணையர் (கிரேடு-2,), சார்-பதிவாளர், தலைமைச் செயலக உதவி பிரிவு அலுவலர், தொழிலாளர் உதவி ஆய்வாளர், முதுநிலை வருவாய் ஆய்வாளர், பல்வேறு துறைகளில் உதவியாளர், பேரூராட்சி செயல் அலுவலர் (கிரேடு-2) உள்ளிட்ட பதவிகளை நிரப்புவதற்காக ஒருங்கிணைந்த குரூப்-2, 2 ஏ தேர்வும், இளநிலை உதவியாளர, தட்டச்சர், சுருக்கெழுத்து தட்டச்சர், கிராம நிர்வாக அலுவலர் உள்ளிட்ட பதவிகளுக்கு குரூப்-4 தேர்வும் நடத்தப்படுகின்றன. தொழில்நுட்பம் சார்ந்த பதவிகளுக்கு ஒருங்கிணைந்த தொழில்நுட்ப பணிகள் தேர்வுகள் நடத்தப்படுகின்றன.
ஒவ்வொரு போட்டித் தேர்வுக்கும் பொதுப் பிரிவினருக்கும், இடஒதுக்கீட்டு பிரிவினருக்கும் குறிப்பிட்ட வயது வரம்பு நிர்ணயிக்கப்பட்டுள்ளது. அதன்படி, குரூப்-1 தேர்வுக்கு வயது வரம்பு பொதுப் பிரிவினருக்கு 32 ஆகவும், இடஒதுக்கீட்டுப் பிரிவினருக்கு 37 ஆகவும் உள்ளது. அதேபோல், குரூப்-2, 2 ஏ தேர்வுக்கு வயது வரம்பு பொதுப் பிரிவினருக்கு 30 ஆக உள்ளது. இடஒதுக்கீட்டுப் பிரிவினருக்கு வயது வரம்பு கிடையாது. அவர்களுக்கு சில பதவிகளுக்கு மட்டும் வயது வரம்பு இருக்கிறது.
குரூப்-4 தேர்வுக்கும், தொழில்நுட்ப தேர்வுகளுக்கும் வெவ்வேறு வயது வரம்பு நிர்ணயிக்கப்பட்டுள்ளது. மாற்றுத் திறனாளிகளை பொறுத்தமட்டில் அவர்களுக்கு 10 ஆண்டுகள் வயது வரம்பில் தளர்வு அளிக்கப்படுகிறது.
அரசு பணிகளுக்கு ஆண்டுதோறும் போட்டித் தேர்வுகள் நடத்தப்படாததால் வயது வரம்பை அதிகரிக்க வேண்டும் என்ற கோரிக்கை டிஎன்பிஎஸ்சி தேர்வர்கள் மத்தியில் நீண்ட காலமாக இருந்து வந்தது. இதர மாநிலங்களில் இருப்பதை போன்று குரூப்-1 தேர்வுக்கு வயது வரம்பை 45 ஆக உயர்த்த வேண்டும் என்று தேர்வர்கள், குறிப்பாக ஏற்கெனவே குரூப்-4 அல்லது குரூப்-2 தேர்வெழுதி அரசு பணியில் இருப்பவர்கள் கடந்த 10 ஆண்டு காலமாக அரசுக்கு தொடர்ந்து கோரிக்கை விடுத்து வந்தனர். அதேபோல், பொதுப் பிரிவினரும் தங்களுக்கான வயது வரம்பை உயர்த்தக் கோரி தொடர்ந்து அரசுக்கு வேண்டுகோள் விடுத்து வந்தனர்.
இந்த நிலையில், தேர்வர்களின் நீண்ட கால கோரிக்கையை நிறைவேற்றும் வகையில் அரசு பணிக்கா வயது உச்ச வரம்பை 5 ஆண்டுகள் உயர்த்தி முதல்வர் விஜய் உத்தரவிட்டுள்ளார் என்பது கவனிக்கத்தக்கது.
