தமிழ்நாடு சட்டப்பேரவையில் நடைபெற்று வரும் மானியக் கோரிக்கைகள் மீதான விவாதங்களின் போது, மாநிலத்தின் இயற்கை வளங்களைப் பாதுகாக்கவும், சுரங்கத் துறையில் நவீன தொழில்நுட்பங்களைப் புகுத்தி வெளிப்படைத்தன்மையைக் கொண்டு வரவும் பல்வேறு பிரம்மாண்டமான திட்டங்கள் அறிவிக்கப்பட்டு வருகின்றன. அந்த வகையில், இயற்கை வளங்கள் துறை மானியக் கோரிக்கை மீதான விவாதத்திற்குப் பதிலளித்துப் பேசிய இயற்கை வளங்கள் துறை அமைச்சர் டி.கே. பிரபு, புவியியல் மற்றும் சுரங்கத் துறையில் புரட்சிகரமான மாற்றங்களை ஏற்படுத்தும் வகையில் பல புதிய அறிவிப்புகளை வெளியிட்டார். சட்டவிரோதக் கனிமக் கடத்தலை முற்றிலும் தடுப்பது, கனிம வள மேலாண்மையை டிஜிட்டல் மயமாக்குவது மற்றும் பாரம்பரிய சிறு தொழில் முனைவோரைப் பாதுகாப்பது ஆகியவற்றை முதன்மை நோக்கமாகக் கொண்டு இந்த அறிவிப்புகள் தயாரிக்கப்பட்டுள்ளன.
மாநிலத்தின் இயற்கை வளங்கள் என்பது மக்களின் பொதுச் சொத்து என்றும், அவற்றைச் சட்டவிரோதமாகச் சுரண்டுபவர்கள் மீது கடும் நடவடிக்கை எடுக்கப்படும் என்றும் அமைச்சர் தனது உரையில் எச்சரித்தார். இயற்கை வளத் துறையை நவீன தொழில்நுட்ப வசதிகளுடன் மேம்படுத்தும் முதற்கட்டமாக, புவியியல் மற்றும் சுரங்கத் துறையில் ரூ.2 கோடி மதிப்பீட்டில் மாநில அளவிலான அதிநவீன ‘சுரங்கக் கட்டுப்பாடு மற்றும் கண்காணிப்பு மையம்’ (State Mining Control and Monitoring Centre) நிறுவப்படும் என்று அறிவிக்கப்பட்டது. இதன் மூலம் மாநிலம் முழுவதும் நடைபெறும் கனிம வெட்டி எடுக்கும் பணிகள் தலைமையகத்தில் இருந்து உடனுக்குடன் கண்காணிக்கப்படும்.
கடந்த சில ஆண்டுகளாகவே எல்லைப்புற மாவட்டங்களிலும், இயற்கை வளங்கள் நிறைந்த பகுதிகளிலும் சட்டவிரோதச் சுரங்க நடவடிக்கைகள் நடைபெறுவதாகத் தொடர் புகார்கள் எழுந்த வண்ணம் இருந்தன. இவற்றுக்கு நிரந்தரமாக முற்றுப்புள்ளி வைக்கும் நோக்கில், உயர் தொழில்நுட்பங்களைப் பயன்படுத்தத் திட்டமிடப்பட்டுள்ளது. அதன்படி, ஆளில்லா வான்வழி விமானங்கள் (Drones) மற்றும் செயற்கைக்கோள் (Satellite) தரவுகளைப் பயன்படுத்திச் சுரங்கங்களை ஆய்வு செய்யும் பிரத்யேக ‘சுரங்கக் கண்காணிப்புப் பிரிவு’ உருவாக்கப்படும் என்று அமைச்சர் பிரபு பேரவையில் அழுத்தமாகப் பதிவு செய்தார்.
சுரங்கத் தொழிலில் நடைபெறும் முறைகேடுகள் மற்றும் அனுமதி அளிக்கப்பட்ட அளவை விட அதிகமாகக் கனிமங்களை வெட்டி எடுக்கும் சட்டவிரோதச் செயல்களைத் தடுக்க, இந்த ட்ரோன் மற்றும் செயற்கைக்கோள் கண்காணிப்பு அமைப்பு மிக முக்கியப் பங்காற்றும். செயற்கைக்கோள் பட ஒப்பீடு (Satellite Image Analytics) மூலம் குறிப்பிட்ட காலத்தில் நிலப்பரப்பில் ஏற்பட்டுள்ள மாற்றங்கள் துல்லியமாகக் கண்டறியப்படும். இதன் மூலம் அனுமதி பெறாத இடங்களில் சுரங்கம் அமைப்பது மற்றும் எல்லை மீறி வெட்டியெடுப்பது போன்றவை உடனடியாகக் கண்டுபிடிக்கப்பட்டுத் தடுக்கப்படும்.
அதேபோன்று, புவியியல் மற்றும் சுரங்கத்துறை இயக்குநரகத்தின் கீழ் நேரடியாகச் செயல்படும் வகையில் ஒரு சிறப்பு ‘கண்காணிப்புப் பிரிவு’ (Vigilance Cell) அமைக்கப்படும் என்றும் அமைச்சர் அறிவித்தார். இப்பிரிவு சுரங்கப் பகுதிகளில் திடீர் ஆய்வுகளை மேற்கொள்வதுடன், கனிமக் கடத்தல் தொடர்பான புகார்கள் மீது உடனடி நடவடிக்கை எடுக்கும் அதிகாரத்தைக் கொண்டிருக்கும். துறை ரீதியான முறைகேடுகளைக் களையவும், அலுவலர்களின் செயல்பாடுகளைக் கண்காணித்து வெளிப்படைத்தன்மையை உறுதி செய்யவும் இ கண்காணிப்புப் பிரிவு உதவும் என்று எதிர்பார்க்கப்படுகிறது.
More Read
மேலும், பொதுமக்களும் தொழில் முனைவோரும் சுரங்கத் துறை தொடர்பான தங்களது சந்தேகங்கள், குறைகள் மற்றும் சட்டவிரோதச் செயல்பாடுகள் குறித்த புகார்களைத் தெரிவிப்பதற்காக, சுரங்கத்துறை இயக்குநரகத்தில் பிரத்யேகமாக ‘குறை தீர்ப்பு மையம்’ (Grievance Redressal Centre) ஒன்று அமைக்கப்படும். இமையம் மூலம் பெறப்படும் புகார்கள் மீது குறிப்பிட்ட கால வரம்பிற்குள் தீர்வு காண நடவடிக்கை எடுக்கப்படும் என அமைச்சர் பிரபு உறுதியளித்தார்.
மாநிலத்தில் கிடைக்கப்பெறும் உயர்மதிப்புமிக்க கனிமங்களை நேர்த்தியாகக் கையாள்வதற்கும், கனிம விற்பனையில் அரசின் வருவாயைப் பெருக்கவும் ஒரு புதிய பொதுத்துறை நிறுவனம் தொடங்கப்பட உள்ளது. ‘தமிழ்நாடு கனிமவள மேம்பாட்டுக் கழகம் லிமிடெட்’ (Tamil Nadu Mineral Development Corporation Limited) என்ற பெயரில் அமையவுள்ள இந்த புதிய பொதுத்துறை நிறுவனம், கனிமங்களைச் சந்தைப்படுத்துதல், புதிய தொழில்நுட்பங்களைப் பயன்படுத்தி மதிப்புக்கூட்டப்பட்ட பொருட்களை உற்பத்தி செய்தல் மற்றும் வெளிப்படையான முறையில் வர்த்தகம் செய்தல் ஆகிய பணிகளை மேற்கொள்ளும்.
கனிம வளங்களின் விநியோகம் மற்றும் போக்குவரத்தை சீரமைக்கும் பொருட்டு, ‘ஒருங்கிணைந்த மின்னணு கனிம மேலாண்மை தளம்’ (Integrated Electronic Mineral Management Platform) உருவாக்கப்பட உள்ளது. இத்தளத்தின் மூலம் கனிமங்கள் வெட்டி எடுக்கப்படுவது முதல் நுகர்வோரைச் சென்றடைவது வரையிலான அனைத்து நடைமுறைகளும் கணினிமயமாகும். கனிமப் போக்குவரத்துக்கான ஈ-பெர்மிட் (E-Permit) வழங்குவது, வாகனங்களைக் கண்காணிப்பது மற்றும் கட்டணங்களை இணைய வழியில் வசூலிப்பது போன்ற அனைத்து சேவைகளும் ஒரே குடையின் கீழ் கொண்டு வரப்படும்.
More Read
இந்த டிஜிட்டல் தள உருவாக்கத்தின் மூலம் போலி அனுமதிச் சீட்டுகளைப் பயன்படுத்தி நடைபெறும் கனிமக் கடத்தல் முற்றிலும் தடுக்கப்படும் என்று தெரிவிக்கப்பட்டுள்ளது. அரசுக்கு வர வேண்டிய உரிமத் தொகையும் (Royalty) வரியும் எவ்வித இழப்புமின்றி முழுமையாகக் கிடைக்கும் சூழல் இதன் மூலம் உருவாகும். இந்த ஒருங்கிணைந்த மின்னணு அமைப்பை உருவாக்கிச் செயல்படுத்துவது குறித்து அமைச்சர் பிரபு பேசுகையில், “கனிம வள மேலாண்மையில் தமிழ்நாடு இந்தியாவிலேயே முன்னோடி மாநிலமாகத் திகழ இத்தொழில்நுட்ப மாற்றங்கள் வழிவகுக்கும்” என்று நம்பிக்கை தெரிவித்தார்.
கிராமப்புறங்களில் ஆட்டுக்கல், அம்மிக்கல் மற்றும் கற்சிலைகளைத் தயாரிக்கும் சிறு தொழில் முனைவோர்கள் மற்றும் பாரம்பரியக் கைவினைஞர்கள் சந்தித்து வரும் மூலப்பொருட்கள் பற்றாக்குறைக்குச் சிறப்புத் தீர்வு காணப்பட்டுள்ளது. இவர்கள் தங்களது தொழிலுக்குத் தேவையான சாதாரணக் கற்களை (Ordinary Stones) தடையின்றிப் பெறுவதற்குத் தற்போதைய கடினமான விதிமுறைகள் தடையாக இருப்பதாகத் தொடர்ந்து கோரிக்கைகள் வந்தன. இதனைக் கருத்தில் கொண்டு, ஒழுங்குமுறை கட்டமைப்புகள் அனைத்தும் விரிவாக மறுஆய்வு செய்யப்பட்டு, எளிய மாற்றங்கள் செய்யப்படும் என்று அறிவிக்கப்பட்டுள்ளது.
இதன் மூலம் பல தலைமுறைகளாகக் கல் தச்சர்கள் மற்றும் சிற்பக் கலைஞர்களாக வாழ்ந்து வரும் ஆயிரக்கணக்கான குடும்பங்களின் வாழ்வாதாரம் பாதுகாக்கப்படும். மூலப்பொருட்களைப் பெறுவதில் இருந்த தேவையற்ற காலதாமதமும், இடைத்தரகர்களின் சுரண்டலும் தவிர்க்கப்பட்டு, சிறு தொழிலாளர்கள் நேரடியாகவும் குறைந்த செலவிலும் கற்களைப் பெற வழிவகை செய்யப்படும். எளிய மக்களின் வாழ்வாதாரத்தைப் பாதுகாக்கும் இந்த முயற்சியை அமைச்சர் பிரபு சட்டப்பேரவையில் அறிவித்த போது உறுப்பினர்கள் வரவேற்பு தெரிவித்தனர்.
